الموضوع: تقدر تعيش فى مصر ب 1000 جنيه

لو شاطر ... تعرف تعيش فى مصر بـ 1000 جنيه ! ! !

ودى اقل من القليل لمتطلبات الحياة رينا يستر ونقدر نكمل

* عيش بلدي - مصروف يومي ( 1 ) --- مصروف شهري ( 30 ) بس لازم تلحق دورك فى طابور الفرن وتلحق شغلك فى نفس الوقت ربنا معاك

* حليب - مصروف يومي ( 4 ) ---مصروف شهري ( 120 ) عدد واحد لتر يومياً ويارب ميطلعش بودرة سيراميك ويكفى العيال

* فول - مصروف أسبوعي ( 8 ) --- مصروف شهري ( 32 ) كيلو فول اسبوعيا يعنى 125 جرام يوميا رضا والحمد لله

* جبنة بيضاء - مصروف أسبوعي ( 20 ) --- مصروف شهري ( 80 ) كيلو في الأسبوع 125 جرام يوميا انت عايش

* بيض - مصروف أسبوعي ( 5 ) --- مصروف شهري ( 20 ) عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة

* خضار - مصروف أسبوعي ( 10 ) --- مصروف شهري ( 40 ) عبارة عن صنف واحد بس + كيلو طماطم + لمونه وحزمة جرجير اسبوعيا

* فواكهه - مصروف أسبوعي ( 5 ) --- مصروف شهري ( 20 ) عبارة عن كيلو برتقال أو قشر موز مرة اسبوعيا علشان العيال تفتكر اسمة

* شاى --- مصروف شهري ( 10 ) لزوم الكيف اللى بيذل والضيوف الرزلين

* سكر - مصروف أسبوعي ( 4 ) --- مصروف شهري ( 16 ) عدد واحد كيلو اسبوعيا مش بقولكم الكييف يذل وضيوف معندهمش دم

* ارز - مصروف أسبوعي ( 4 ) --- مصروف شهري ( 16 ) عدد واحد كيلو اسبوعيا للعائلة كلها يعنى 125جرام يوميا متوسط الفرد 40 جرام

* زيت - مصروف أسبوعي ( 10 ) --- مصروف شهري ( 40 ) لتر اسبوعيا علشان تشرب بق على الريق يزيت معدتك 000 يستعمل كبديل للخضروات

* مكرونه - مصروف أسبوعي ( 8 ) --- مصروف شهري ( 32 ) عبارة عن عدد 4 كيس 400 جرام اسبوعيا 0000 خلى العيال تنبسط

* دجاج - مصروف أسبوعي ( 20 ) --- مصروف شهري ( 80 ) عدد واحد دجاجة اسبوعيا للعائله 000000 اظن معقول

* لحم - مصروف أسبوعي ( 30 ) --- مصروف شهري ( 120 ) عدد واحد كيلو لحم اسبوعيا لزوم صنف الخضار واللمونه وحزمة الجرجير 000 الف هنا

* بقوليات --- مصروف شهري ( 10 ) عبارة عن كيلو واحد بس شهريا ونقى اللى بتحبه براحتك ( عدس - لوبيا - فاصوليا )

* توابل --- مصروف شهري ( 10 ) عبارة عن دقيق + ملح + كمون + فلفل + كسبرة + وممكن تديها خل براحتك

* صابون --- مصروف شهري ( 15 ) عبارة عن صابونه واحدة للحمام + صابون مواعين + مسحوق للملابس ( النظافة عموما )

* مواصلات - مصروف يومي ( 2 ) --- مصروف شهري ( 60 ) بعد طابور الفرن تركب أتوبيس الهيئة ذهاب وعودة وبهدله وفرهده لفرد واحد يوميا

* حلاق --- مصروف شهري ( 10 ) عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

* مدرسة - مصروف أسبوعي ( 10 ) --- مصروف شهري ( 40 ) عبارة عن مصروفات المدرسة + مصروف العيال اليومى + كراسات واقلام وجلاد 00ألخ

* دكتور --- مصروف شهري ( 30 ) نمرض بالدور طبعا عدد اربع افراد مرة واحدة للفرد كل 4 اشهر وربنا يستر

* ادوية --- مصروف شهري ( 50 ) أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه

* تليفون --- مصروف شهري ( 10 ) اشتراك الهيئة هنرد بس ومش هنتكلم معدش ينفع كلام

* مياة --- مصروف شهري( 10 ) للاسف لازم نشرب مياة ملوسة بالمجارى

* غاز --- مصروف شهري ( 5 ) الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية

* نور --- مصروف شهري (20 ) لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع

* قمامة --- مصروف شهري ( 10 ) اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين

* بواب --- مصروف شهري ( 15 ) مهو من حقه يعيش هو كمان لو عشر شقق يبقى 150 جنية شهريا خليه يهيص

* صيانة --- مصروف شهري ( 30 ) لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ

* ملابس --- مصروف شهري ( 100 ) عبارة عن الصيفى والشتوى داخلى وخارجى واحذية وشربت وكلونات واتصرف بقى

الاجمالى -------- ((( 1081 )))

اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض معلش الجنية اللى فاضل صعب شوية بس ممكن تروح الشغل مشى فى يوم او تاخدو اجازة مهو برضو من حقك ...





ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه



وبالمناسبة ...



عيد الام ربنا يخليها ويديها الصحه ------ و كل سنة وهى طيبة

عيد الكحك -- مضر وملهوش لزمة ----كل سنة وانتم طيبين


عيد اللحمة -- مضر وملهوش لزمة ----كل سنة وانتم طيبين
حلاوة المولد -- السكر مضر وملهوش لزمة ---- كل سنة وانتم طيبين

ورمضان كريم وخيره كتير






أخ خ خ نسيت احسب زكاة الفطر بس مش عارف هدفع ولا هأخد ؟


عموما هقولكم على قائمة الممنوعات والمحظورات 000 متقربوش منها علشان تعرفو تتنيلو وتكملو الشهر

ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين ( الجبنه البيضا )

المعلبات تونه بلوبيف لانشون سالمون فول وطبعا البسطرمة والزيتون والمخللات ممنوووووووووووووووع


اوعى قلبك يحن لعيل من العيال وتجيبله شيبسى ولا ببسى أو كراتيه ونايتى عسلية بسكوت شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهوهوز حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاص

احظر اللحوم بانواعها البفتيك والاستيك والذى منه


الموضوع منقووووووووووووووووووووول

المشاركة الأصلية كتبت بواسطة medo55

في مقوله شهيره اوي وهي حكمه عن الامام حسن البصري


سئل الحسن البصرى عن سر زهده فى الدنيا فقال أربعة أشياء:

علمت أن رزقى لا يأخذه غيرى فاطمأن قلبى،
وعلمت أن عملى لا يقوم به غيرى فاشتغلت به وحدى،
وعلمت أن الله مطلع علي فاستحييت أن يرانى عاصيا،
وعلمت أن الموت ينتظرنى فأعددت الزاد للقاء ربى.


والله ماشي في يوم في شارع مع اخويا لقيت واحده عجوزه بتنادي على بنت ابنها بتقولها انتي اخدتي الربع جنيه الي هنا مامعناش غيره .. واكيد طبعا لاخر الشهر او لما ربنا يرزقهم

سبحان الله عايشين بربع جنيه واحنا مش عارفين ب3000 حتى !!!

{فَكُلُواْ مِمَّا رَزَقَكُمُ اللّهُ حَلالاً طَيِّبًا وَاشْكُرُواْ نِعْمَتَ اللّهِ إِن كُنتُمْ إِيَّاهُ تَعْبُدُونَ} (114) سورة النحل

كل واحد ربنا خلقه وبيرزقه على اده

{إِنَّ رَبَّكَ يَبْسُطُ الرِّزْقَ لِمَن يَشَاء وَيَقْدِرُ إِنَّهُ كَانَ بِعِبَادِهِ خَبِيرًا بَصِيرًا} (30) سورة الإسراء

ماهو الرزق اصلا مش فلوس وبس !! الرزق ممكن تلاقي حماتك داخله عليك مثلا يعني ب 10 فرخات :) دا رزق ,, ممكن تلاقي واحد صاحبك جابلك مثلا تورتايه وجاي يزورك ماهو رزق

انت لو ربنا عافاكم وان شاء الله مفيش حد يمرض هتوفر تمن العلاج والدكتور ودا رزق .. نسأل لكم ولجميع المسلمين العفو والعافيه وان يرفع الله عنا البلاء والغلاء

{قُلْ إِنَّ رَبِّي يَبْسُطُ الرِّزْقَ لِمَن يَشَاء وَيَقْدِرُ وَلَكِنَّ أَكْثَرَ النَّاسِ لَا يَعْلَمُونَ} (36) سورة سبأ



طيب الناس الي حاسه انها مرتبها مش كفايه ليها ولاسرتها في الزمن دا اقولك على حاجتين

الاولى ان الواحد المفروض يتقي ربنا وخليك على يقين ان المعصيه ساعات كتير بتحجب الرزق .. ولو نفتكر قصة سيدنا موسى لما منع عنهم المطر بسبب واحد بيعصي ربنا في وسط القوم 40 سنه ولما تاب المطر نزل عليهم ( المطر رزق )


{فَإِذَا بَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ فَارِقُوهُنَّ بِمَعْرُوفٍ وَأَشْهِدُوا ذَوَيْ عَدْلٍ مِّنكُمْ وَأَقِيمُوا الشَّهَادَةَ لِلَّهِ ذَلِكُمْ يُوعَظُ بِهِ مَن كَانَ يُؤْمِنُ بِاللَّهِ وَالْيَوْمِ الْآخِرِ وَمَن يَتَّقِ اللَّهَ يَجْعَل لَّهُ مَخْرَجًا} (2)
{وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا} (3) سورة الطلاق


الحاجه التانيه .. الصدقات , وسبحان الله لسه الصبح قاري قصة واحد سعودي مش عارف يعيش ب 4000 ريال سعودي في الشهر مرتبه ( الحياه في السعوديه ارخص من هنا ) وعليه ديون وووووو وفي الاخر صديقه نصحه انه يوفر مثلا من مرتبه مبلغ يتصدق بيه على الفقراء بدأ الشخص دا فعلا يحجز مبلغ 300 ريال من مرتبه علشان يتصدق بيه وبيقول بعد شهرين حس بارتياح شديد نفسيا وان ربنا هيفرجها عليه وبالفعل لقى اصحابه بيعرضو عليه انه يساعدهم في شغلهم ( سمسره في البورصه ) وحاجات كتير وربنا رزقه بسبب الصدقه

{مَّن ذَا الَّذِي يُقْرِضُ اللّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً وَاللّهُ يَقْبِضُ وَيَبْسُطُ وَإِلَيْهِ تُرْجَعُونَ} (245) سورة البقرة

ربنا ذكر البسط في الرزق في الايه بعد الي بيقرض الله قرضا حسنا ( الناس الي بتتصدق )
لان دا ان شاء الله هو جزاء الناس الي بتتصدق

اقولك ممكن تستغنى عن شوية حاجات من الي في القايمه علشان توفر جزء للصدقات ولو شيئ قليل جدا مثلا 50 جنيه في الشهر


والله ياخي يعني فعلا خلتني افوق نفسي لاني كنت في غيبوبه ولما شوفت كلامك وكتبت ردي عليك بدأت فعلا افوق وكلامي ليك كان نصيحه لنفسي قبل ما يكون نصيحه ليك

ربنا يجعلنا من المخلصين ويجعلنا دايما من الي بنقول وبنعمل الي بنقوله ومش يجعلنا من المنافقين الي ينصحو الناس وبيعملو عكسه ... اللهم آمين

ماشاء الله عليك

الله .... الله عليك