الموضوع: تقرير صيانة ال10000 للماروتي عند الميكانيكي

السلام عليكم
اليوم مع تقرير صيانة ال10000للماروتي خارج التوكيل
بعد ما اتبهدلت اخر بهدله في التوكيل وزهقت من عدم فهمهم للعربية ولخبطتهم ليا في كل مرة وغلو الاسعار تخيلو دفع400ج في غيارة زيت
قررت وعزمت اني مش هعتب التوكيل تاني لو حتي كان هيديني فلوس علشان اروحله
وتوكلت علي الله ونزلت التوفيقية اشتريت شوية قطع غيار من اللي بنحتاجها ديما وقولت اتابع مع الميكانيكي
نزلت جبت2ابلاتين+2كوندينسر +2فلتر هواء+2فلتر زيت وبدات رحلة الكفاح
صور المشتريات

في المشاركة القادمة ان شاء الله

ورحت رايح علي محل زيت مشهور جدا هنا في الزقازيق وخدت منه جركن موبيل 20w50 كام ياعم قالي78جنية مشيت ورجعتله تاني قولتله ده اللي بيمشي5000 قالي لا هات 42 واداني موبيل برضو xhp 20w50 قالي هو ده بس اوعي تسمع كلامهم وغيره علي3.5 قولتلة تمام
وخدت الحاجه وطلعت علي الميكانيكي
السلام عليكم ازيك يا اسطي محمود تمام
غير الزيت عنيا
ونزل تحت العربية وجاب جركن فضي فيه الزيت القديم حب يرسم الدور شوية قالي انت ماشي عليه كام كيلو ده قولتله5000 لاني كنت سألت مهندس التوكيل وقالي متغيروش الا علي5000 قالي ياعم ده حمار ولا بيفهم حاجه الزيت محروق لو فضلت علي كده العربية هتبوظ لانها3سلندر ضعيفة وروحها الزيت المهم قولتلة والعمل قالي الزيت ال5000ده تغيره علي3000 او3500بالكتير اوي وغير فلتر في كل غيارة زيت لان الجو والطرق عندنا غير برة خالص وكمان الزيت اللي في مصر ده كله مغشوش يعني اشتري دماغك وغيرة بدري بدري
غير الزيت والفلتر وكله تمام قالي علي فكرة العربية دي بتاخد3لتر بالفلتر مش3الا ربع زي مانا قولتله
قولتله عادي تاخد اللي تاخده
كان عندي شكوي ان العربية بتاكل بنزين يعني الصفيحه الاول كانت بتعمل300كيلو بقالها شهرين بتعمل240او250كيلو قالي ثواني وفتح الاسبراتير وقعد يلعب عند الكاوتش ودور مارش كده قالي الابلاتين مبيفتحش المهم لعب فيه شوية وقالي كده بقي تمام
فلتر الهواء لما عرف اني معايا قطع غياري في شنطة العربية راح رامية ومركب واحد من اللي معايا
طيب يا اسطي محمود بصلي علي العفشة اي حاجه مفكوكة ربطها قام راكب العربية ولف بيها لفة وقالي العفشخ تمام مفيهاش مشكله والعربية جميله ماشاء الله
يعني كده تمام يا اسطي قالي تمام
عايز كام خليها علينا ياعم عايز كام20جنية اتفضل وشكرا ومشيت علي كده
الصراحه العربية كانت داخله شئ وخارجه شئ تاني خالص
بسم الله ماشاء الله الصوت اتظبط والسحب بقي مية ميه وحاسس ان العربية في غاية الانبساط
التكلفة
120جنية جركت زيت
15جنية فلتر
40جنية فلتر الهواء
20 مصنعية
الاجمالي 195جنية
وان شاء الله ال200جنية اللي اتوفروا معايا لما مصينتهاش في التوكيل هصرفهم عليها واجيبلي تسجيل وسماعات وانا اولي بكل جنية من بتوع التوكيل النصابين دول اللي كانوا بيخربولي العربية ويدفعوني فلوس
ان شاء الله قررت اغير الزيت بعد كده علي3000 وي ما نصحوني
ومن خلال هذه التجربة احب اقول ان لو التوكيل هيدفعلي فلوس بعد كده مش رايحله لو حتي هبيع العربية كرامالهم وكرامة لغبائهم المتناهي
لو حد عنده اي تعليق علي قطع الغيار او علي اي شئ يسعدني مروركم الطيب
شكرا ليكم
والي اللقاء في تقارير اخري ان شاء الله

المشاركة الأصلية كتبت بواسطة Ahmed Tarek 00

أنا متفق معاك في موضوع المصنعية الـ 20 ج ده قليلة جداااااا جدااااااااا

وعاوز اسألك كام سؤال :

1 - تقصد ايه بـ طقم الكهرباء ف تعليقك ؟؟؟

أبلاتين - بوجيهات - كوندنسر

و التقدير ده بالظبط كده فى كتيب المالك owner's manual و متتخيلش حضرتك قد إيه الماروتى بتشتغل عليه زى الساعة لدرجة إنى ساعات بفتكر إمتى بالظبط عدت عليا أو قربت تعدى 10 آلاف كم لما أبتدى أحس بالتنتيش على السرعات العالية :)

2 - مصنعية عمل سيرفيس للماروتى كام ؟

مختلفة من مرة للتانية و موحدة لجميع توكيلات سعودى جروب بس مش بتزيد عن 400 جنيه و متقلش عن أزيد من 200

فيه جدول بيكون متعلق فى مكتب التوكيل بأسعار المصنعية بس للأسف مش فاكر تفاصيله

وشكرا