الموضوع: ازاى قدرت تنسى حبك الاول وتمتص الصدمة ههههههه

كان حب حوالي سنتين تالتة ورابعة كلية والدنيا كانت قشطة وبعدها صدمة التخرج من الكلية ومافيش شغل خالص والدنيا وقفة .. هى اشتغلت الاول وانا كنت شغال حاجة صغيرة ماتنفعش

كلمت اهلي ... فى الاول رفض تام وهى مين وإيه اصلها وتعرف إيه عنها وبعد مفاوضات طويلة جدا جدا جدا بدأو يفكروا فى الموضوع ...خلال الفترة دى اختلفت انا وهى فى الكلام وشدينا مع بعض وبدون تفاهم انفصلنا

بصراحة نفسيتى كانت زى الزفت وعرفت إنها تعبت جامد جدا ... ومافيش شهرين من الانفصال بينا عرفت إنها إتخطبت

والله يعلم ربنا إنى اتمنبت لها الف خير

قدر الله وماشاء فعل

في البداية احب اوضح بأن النقطة دي خصيصا هي توفيق من عند الله عز وجل (( إنما أمره إذا أراد شيئا أن يقول له كن فيكون )) ومعظمنا مش بيبقي شايف في المرحلة دي ، بس هي تجربة وعدت والصح اللي يطلع الدروس والعبر من المرحلة دي
اتعرفت بأنسانة طيبة وجميلة وانا في 2 كلية اتشديت ليها بشكل كبير خصوصا ان كل واحد فينا احنا الشباب بيتمني مواصفات في البنت ،، هي كانت اكبر مني بسنتين و3 شهور طبعا وقتها زي ما بيقولوا ان الحب اعمي والتضحيات ، فانا مكنتش شايف الا بقلبي وقتها مكنش فيه شغل ثابت لسه ولا اعلم موقفي من الجيش وهي كانت بتهون عليا الحاجات دي وتقولي هستناك العمر كلة والكلام دا انتم عارفينة ، فاتحت اهلي ف الموضوع دا وحصل رفض بسبب اني لسه مش واقف علي ارض ثابتة ( الجيش ، الشغل ) لقيت ان الموضوع دا ياما اختار اهلي ياما اختارها هي
واللي ملوش خير في ابوه وامة ملوش خير في حاجه تانية ابدا ، ازاي اصلا تسمح لنفسك تتخير بينهم وبين اي حاجه اخري ف الدنيا ( وجهه نظر ) او( مبدأ ) ،، عرفتها ان احنا دخلنا الطريق غلط وبعيد كل البعد عن ربنا عز وجل وان ربنا عمل كدا لحكمة هو اعلم بيها ودا نصيب في الاول والاخر ولو في نصيب سيجمعنا الله عز وجل وان كان فلا وان الخير فيما اختاره الله عز وجل وتعهدنا امام الله بعدم قيام اي طرف محاولة الكلام للطرف الاخر لاي سبب وتمنيت لها الخير والسعادة وهي تقبلت الموضوع في الاول بضيق وحزن لكن في الاخر فهمت
طبعا بعد الموضوع دا ما انتهي فكرت بعقلي في اللي فات ،، لقيت شوية اسباب كتير كانت غلط للأسف معظم الشباب واقع فيها
ودي الدروس والعبر اللي الواحد طلع منها بالموضوع دا
1- الرضا بما قسم الله لك وان الخير فيما اختاره الله لك وعسي ان تكرهوا شيئا وهو خير لكم وعسي ان تحبوا شيئا وهو شر لكم والله يعلم وانت لا تعلمون
2- بنات الناس مش لعبة بين ايدك وانت ليك اخوات بنات ،، ترضي دا لأختك ؟؟
3- دخول البيت من بابة قبل الوقوع في الحب والعشق والغرام ، حتي لا تحدث كوارث وانهيارات لكلي الطرفيين
4- عدم الوقوف علي ارض ثابتة عند حدوث الموضوع ، لا في شغل ولا حتي عارف موقفك من الجيش
5- فكر بعقلك قبل قلبك واستشير اهل الصلاح في المواضيع دي هتفرق معاك ، يمكن في حاجات متعرفش تحكيها امام والدك ووالدتك ، بس تقتدر تحكيها لمن يشهد لهم بالصلاح و تثق فيهم
6- لعله خير بأذن الله وفي الاول والاخر محدش هيتجوز مرات حد اخر

الكلام ده مر علينا كلنا لاننا من جيل زمان (انا33)
اسئل شاب دلوقت او بنت عن الموضوع ده اكيد حتلاقى ردود صادمه لانهم دلوقت بيحبو بالجمله البت بتمشى مع ممكن توصل لخمس شباب والعكس