الموضوع: لمﻻك ال 620 عندى تاخير فى عمل المراوح

ثرموستات الكوع ملوش أي علاقه بكون السيارة من النوع اللي بتسخن جامد ..أو من النوع اللي ما بتسخنش جامد ..لإن بمنتهى البساطة البلف اللي في ثرموستات الكوع بيكون فاتح فتح كامل قبل درجة حرارة تشغيل المروحه بعشر درجات تقريبا ..بمعنى ..إننا لو إفترضنا إن المروحه بتشتغل على درجة حرارة 90 مثلا ..فلازم هتلاقي إن ثرموستات الكوع بيكون مفتوح فتح كامل على درجة حرارة 80 مثلا ..يعني في فرق بين فتح الثرموستات على الآخر وبين تشغيل المروحه تقريبا عشر درجات ..وأنا لما بقول ثرموستات الكوع مفتوح فتح كامل بقصد إن ثرموستات الكوع في الحالة دي بيبقى كأنه مش راكب أصلا ..لإنه بيكون مفتوح على آخره ..فكأنه ملوش وجود ..الثرموستات وظيفته بتظهر على الطرق المفتوحه أو لما درجة حرارة المياه تكون أقل من درجة الحراره المكتوبه على الثرموستات واللي المفروض إن الثرموستات بيفتح تدريجيا بدرجه تناسب حرارة المياه لغاية المياه ما توصل لدرجه الحرارة المكتوبه على الثرموستات يكون كده الثرموستات مفتوح فتح كامل ....بالنسبه بقى لمشكلة حضرتك وهي الهبو والصهد والحرارة الغير عاديه والخراطيم اللي منفخه والغطا بتاع الريداتير اللي بيضرب ..فأنا كده هبدأ أشك أو يتجه تفكيري ناحية الهيد بتاع المكنه ..أو ..وش السلندر ..حضرتك لازم تتأكد إن الهيد بتاع المكنه ما بينفسش هوا داخل دورة التبريد ...ودي اللي يقدر يفتيك فيها ميكانيكي ..أو لو عندك ثرموستات الكوع متشال في إختبار بسيط قوي ممكن تعمله وهو إنك تخلي العربيه بايته من قبليها بيوم ..يعني بارده تلاجه وبعدين تزود مياه في الريداتير لغاية ما تخليها على فوهة الريداتير وبعدين تقوم مدور العربيه والريداتير مفتوح لو لقيت المياه عملت jump من الريدايتر أو نطت لفوق يبقى كده الوش عندك منفس ..خلي بالك ..لازم وإنت بتعمل الإختبار ده تكون ثرموستات الكوع متشاله ..جرب وشوف ..وخلي بالك ..ثرموستات الكوع برئ من تهمة إنه بيخلي العربيه تسخن زيادة عن اللزوم ..لإني زي ما قولتلك ..هو ليه درجه حرارة معينة لما المياه بتوصلها بيبقى كأنه مش موجود أساسا ...أما بقى حكاية إنه ممكن يقفش وممكن يعمل الدنيئه معاك ..فدي ليها حلول ..منها إنك تستخدم مياه موصى بها و تعمله جدول تغيير زي إنك تغيره كل سنتين مثلا أو أربع سنين ..لكن في النهاية يظل ثرموستات الكوع برئ من تهمة رفع درجة حرارة السيارة أكتر من اللازم ..قبل ما أنسى ..المفروض اللي حطلك العربيه على الإسكانر يقولك الطبيعي بتاع المراوح تشتغل على درجة كام ..لإن بيبقى الإسكانر اللي معاه مكتوب فيه قدام درجة الحراره ال Recommended بتاع درجة تشغيل المراوح ..عشان كده موضوع توقيت تشغيل المراوح مش بالإحساس الشخصي ..لأ ..ده متسجل في الإسكانر

المشاركة الأصلية كتبت بواسطة tasaka

شكر لهذه المشاركه من العضو الكريم

و يظهر ان 620 بتعمل الدنيئه , اعتقد ان الثرموستات بيعلق جوه الكوع , و اعتقد برضه ان الشكوى دى عامه و مستمره .. و الله اعلم

و فيه كهربائى توكيل نصحنى مره من فتره ان اشيله لو انا اشتريت ال 620

و لكن شيل الثرموستات بيغير درجه الحراره التصميميه المثلى للحصول على افضل اداء للموتور و لذلك افضل تركه

تحياتى

ما هو لو الثرموستات اللي حضرتك مركبه أصلي وبتاع العربيه والرقم المكتوب عليه هو بتاع العربيه يبقى بإذن الله مش هيعمل معاك مشكلة ..وبعدين برضه شيل الثرموستات مش حل ..لإن زي ما قلت لحضرتك هو ليه درجة حرارة معينة بيبقى بعدها مفتوح على آخره وبالتالي بيعدي كل المياه ..وبالتالي بيبقى كأنه مش راكب أصلا ..عشان كده لازم الحراره تتعالج بعيد عن مشكلة الثرموستات ..ما هو لما العربيه بتسخن الثرموستات بيكون فاتح على آخره ..طيب آدي الثرموستات وفتح على آخره يعني كأنه مش موجود ..المشكلة إتحلت ..لأ..لسه برضه العربيه بتسخن ..الله ...يبقى في مشكله تانيه بقى هي اللي عامله السخونه دي