نظريه : كميه المضايقات اللى تتعرضلها تناسب مع القيمه الماديه للعربيتك
موضوع خفيف نطلع بيه من الغم اللى احنا عايشينه
هل صحيح ان كميه المدايقات و قله الادب اللى الواحد بيتعرضلها من الميكروباصات و خلافه (اجره و نقل فقط و ليس ملاكى) و هو سايق تتناسب مع القيمه الماديه لعربيته ؟؟؟
الموضوع انى لما ببقى راكب البيجو 504 (المعلم عتريس العتره) - مافيش حد بيكلمنى او سواق يغلس عليا
و فى خلال اسبوعين لما ببقى راكب العربيه التانيه البيجو 406(سوزى) طبعا مش غاليه و لا عربيه زيرو لكن اغلى من 504 نسبيا - مره الاقى سواق ميكروباص بيريح على الاكصدام الخلفى مرتين فى الزحمه بدعوى (يلا يا عم اطلع لقدام ) و كان المكان قصادى مايكفنيش و نزلت معاه و اتخانقت و عملها مره تالته و انا طالع لما الطريق سلك و انا طالع فعلا !!
- مره تانيه امبارح لاقيت عربيه ربع نقل جايه من ورا على اليمين و كان عاوز يحود شمال فى اللحظه اللى انا كنت فيها جنب الملف شمال فبدل مايهدى لغايه لما اعدى لاقيته بيضرب كلاكس جامد و جهه جنب الزجاج و بيشتم و بعد كده سبقنى و كسر عليا جامد كأنه حيحود فى الملف اللى جاى و بعد كده كمل طريقه عادى !!!!!
و حصل كام موقف سريع مش فاكره اوى دلوقتى - بس اللى لاحظته ان الكلام ده بيحصل لما ابقى راكب 406 فقط لكن 504 ماحدش يستجرى يغتت !!!!
و انا نفس السواق فى العربيتين و بقالى 10 سنين بسوق اساسا فمش معقول حعمل اخطاء سواقه فى عربيه و عربيه تانيه لاء
امال لو كنت راكب مرسيدس بقى او bmw موديل السنه دى كان ايه اللى حصل
