مشكلة فى كاوتش الفيرنا 14/60/185

**ramy_shousha** · 18-02-2015 01:20 PM

[justify] السلام عليكم ورحمة الله وبركاته
طبعاً إنتوا عارفين عربيتى فيرنا 2009 gl
لسه شاريها من فترة بسيطة
الحمد لله متابع الصيانة بتاعتها والعربية ما شاء الله أدائها كويس
من فترة غيرت فردتين كاوتش من نوع (ديليوم) جبت الفردة ب 350 ج لأن بريدجستون أقل فردة عندهم المقاس ده كانت ب 740 ج
ركبتهم مكان الفردتين إللى قدام ورجعت الإتنين إللى قدام ورا - والحمد لله الكاوتش تمام
مقاس الكاوتش 14/60/185
جنوط سبور ودى صورته

من ساعة ما جبت العربية ما جربتش حمولة تقيلة فيها أو 4 ركاب مع بعض
من حوالى إسبوع كنا راكبين العربية 4 أفراد وفيه شنط فى العربية
لاحظت مع كل مطب هوا الكاوتش بيحك فى الكاوتش من الجنب
مع أى مطب عادى علبة الشكمان بتحك أو أرضية العربية تحك برضه
شيلت الشنط من العربية وجربت 4 ركاب فى العربية
من غير ركاب المسافة بين الكاوتش والرفرف كويسة
أى حد يركب فى الكنبة الخلفية - المسافة تقل جداً ومع أى مطب تحك
رحت لحد بتاع ترصيص وزوايا قعد يضغط على العربية من عند الشنطة لتحت كده بتنزل وترجع معاه بسهولة جداً كإنها لعبة
قالى المساعدين الخلفى تمام مفيش مشكلة - وهى العربية السوست بتاعتها كده خفيفة بتروح وتيجى معاك
والجنط عنك خارج سنة صغيرة لبره وهو ده اللى بيخلى الرفرف يحك
طب والحل يا ريس قالى :-
1- يا تركب علايات للعربية ورا بس - بس العربية هتعلى جداً من ورا و ممكن تعوم منك على الطريق
2- يا تغير سوست بنفس مقاس السوست بتاعتك بس مقاومتها أنشف شويه علشان ما تردش وترجع معاك بسهولة -

ودى عاوزه حد عفشجى محترم
3- يا تغير جنوط وكاوتش وتجيب جنط أقل فى العرض وده غالباً مش هتلاقيه فى مقاس 14 إللى إنت مركبه - وهتبقى

مضطر تنزل بالمقاس ل 13 المقاس الفابريكة بتاعها - مع إنى عارف إن مقاس 14/60/185 ده بتاع المصنع وبتنزل بيه برضه
4- يا تعدل فى سمكره صاج الشفة بتاع الرفرف الخلفى وتخرجها سنة صغيرة لبره ودى عاوزه سمكرى نضيف

- بالنسبة لعلبة الشكمان - قالى إنت مغيرها - قولتله آه مغيرها علشان كانت اتخرمت - قالى إللى راكبه عندك دى المصرى بتبقى أكبر من الكورى بشويه - يا تروح لحد بتاع شكمانات يرفعهولك شويه مش فاكر الطريقة إزاى بس هو قالى عليها

- كنت مغير زيت شل 5000 ك - وآخر غيار زيت حطيت زيت موبيل 1 3000 ك
بلاحظ إن صوت العربية فى الدوارة الصبح عالى جداً "أعلى مما كنت حاطط شل" بس لما بتسخن الدنيا تمام

يا ترى أرجع لزيت شل تانى - لأن فى بنزينه توتال قالى مفيش شل - فيه توتال وهو بديل شل - ولا أخلينى فى موبيل 1 ؟!؟

معلش أنا طولت عليكم جداً - بس أخوكم لسه جديد فى حوار العربيات ده ولسه أول عربية ومش عاوز أخربها بدرى بدرى
[/justify][justify][/justify][justify][/justify]

**alpoka779** · 18-02-2015 05:01 PM

بالنسيه للز يت --انا عندي العربيه بيبقي صوتها عالي جدا برده ولما تسخن بتهدي وده عادي - بالنسبه للكاوتش عشان تريح نفسك طالما العربيه مبتحكش عالطريق الا في المطبات ومع الحموله لازم حضرتك تاخذ الطب بهدوء ولو مطب عالي لازم بالجنب لان اغلب المطبات هي الي بتخرم علبه الشكمان

**ramy_shousha** · 18-02-2015 06:03 PM

والله مفيش مطب فيكى يا مصر إلا ما باخده بالعرض مش بالجنب كمان علشان ما تحكش من تحت فى العربية
لو معايا حد فى الكنبة ورا - بتحك فى الشكمان وساعات ما بتحكش لو أخدت المطب بالراحة جداً وقالولى العلبة دى عريضة عاوزه تتغير بواحده أصغر

الحاجة التانية بقى إنى المشكلة الأكبر مطبات الهوا - وأنا معايا حد برضه فى الكنبة ورا
تبقى ماشى فى أمان الله على الدائرى "مصنع مطبات الهوا فى مصر"
تلاقى مرة واحدة العربية طلعت ونزلت وأخدت مطب الهوا وهوب حكة فى الكاوتش والصوت الجميل بقى يخليك تبقى متعصب على آخرك حتى لو على سرعة عادية 80 مثلاً
كبر الصورة كده وبص عليها هتلاقى فيه حز على جنب الكاوتش مكان الحكة دى
غير كده فى المشى العدل وحتى وأنا محمل مفيش مشكلة والمطبات العادية بالجنب ممكن تحك بسيط بس تمام مقبولة
إنما مطبات الهوا دى مش عارف أعمل معاها إيه وخايف الكاوتش يحصله حاجة وأنا ماشى على سرعة تبقى كارثة - ربنا يسترها
مش عارف أعمل فيه إيه دى

**Ashraf_Ibrahim** · 06-04-2015 02:03 PM

العضو العزيز
مقاس الكاوتش الخاص ب 14 هو
185/60 زي اللي راكب عندك
بس محتاجين نعرف ابعاد الجنط نفسه ايه ! لأن غالبا المشكلة في الجنط نفسه :]

اما عن علبة الشكمان ففيه علبتين شكمان للفيرنا عند ابو اليزين العلبة الصغيرة والعلبة الكبيرة
طبعا العلبة الصغيرة مبتحكش في المطبات زي الكبيرة :]

اما عن مشكلة المساعدين او السوست فدي محتاجة عفشجي كويس يبص عليهم اذ غالبا وباحتمال كبير ممكن السوست فعلا تكون فقدت المرونة بتاعتها بقدر كافي او تكون ريحت نتيجة الاستهلاك والضغط المتكرر عليها :]

**mshmshm3** · 14-04-2015 10:41 PM

استاذي
انا مركب علايات ورا بتاعت الفيات 124 و قدام اسمها 3 زنبة
و كنت متخيل العربية هتعلي اوي
النتيجة العربية عليت 2 سم بس
بعد ما العفشجي خلص مكنتش مصدق ان العلايات دي ركبت لولا اني واقف و شايف كل حاجة و من بعدها مابتحكش في المطبات الا خفيف خفيف لو مركب 4 غيري
و علبة الشكمان اللي ورا عندي بقي صوتها زي الديفيل و الله كنت مستخسر اغيرها من صوتها العذب الجميل (ديفيل طبيعي )
غيرتها بالعلبة الصغيرة و بقيت انزل من علي المطب عادي و مبقتش تحك
الخلاصة ممكن تعلي العربية بس اختار العلاية اللي تعليها بيها
انا لما عليتها بقولك عليت 2 سم و زي ماهي في الثبات

**wael6** · 22-04-2015 05:24 AM

السلام عليكم
انا الحمد لله مجرب مقاس 13/70/185 ع الفيرنا
وهو كويس ومعلى العربيه شوية ومش مأثر ع العفشة الحمد لله
وكنت مركب صدادة وعلاية
لكن بعد فتره لقيت ان لما بيركب اتنين ورا مع اسطوانه الغاز العربيه بتهبط لتحت
الرفرف يكاد يلزق فى الكاوتش لكن مش بيحك فيه
بس فى المطبات الغبيه مع الحموله بتحك فى الشكمان رغم انه علبته صغيره ؟
وساعات فى اخر العربيه من تحت العتب ؟

هل المشكلة فى السوست ولا العلاية طرت ولا ايه ؟

وكل ما اقول للعفشجية يقولولى علوه حلو متزودتش عن كده ؟ مع العلم انى مش بجري ومش بزود عن 100 كم سرعه

متابع
وشكرا جزيلا

**ramy_shousha** · 22-04-2015 11:25 AM

السلام عليكم ورحمه الله وبركاته

الإخوة الكرام (mshmshm3 - Ashraf_Ibrahim )

والله يا رجالة من غيركوا مش عارف كنت عملت إيه - أنا متشكر ليكوا جداً على إهتمامكم بالرد على مشكلتى

ربنا يبارك فيكم ويجعلكم سبب للخير دايماً .

**Ashraf_Ibrahim** · 25-04-2015 01:23 PM

المشاركة الأصلية كتبت بواسطة wael6

السلام عليكم
انا الحمد لله مجرب مقاس 13/70/185 ع الفيرنا
وهو كويس ومعلى العربيه شوية ومش مأثر ع العفشة الحمد لله
وكنت مركب صدادة وعلاية
لكن بعد فتره لقيت ان لما بيركب اتنين ورا مع اسطوانه الغاز العربيه بتهبط لتحت
الرفرف يكاد يلزق فى الكاوتش لكن مش بيحك فيه
بس فى المطبات الغبيه مع الحموله بتحك فى الشكمان رغم انه علبته صغيره ؟
وساعات فى اخر العربيه من تحت العتب ؟

هل المشكلة فى السوست ولا العلاية طرت ولا ايه ؟

وكل ما اقول للعفشجية يقولولى علوه حلو متزودتش عن كده ؟ مع العلم انى مش بجري ومش بزود عن 100 كم سرعه

متابع
وشكرا جزيلا

عزيزي المشكلة الاساسية في مقاس الكاوتش :]
مقاس ال 14 هو 185/60
اللي حضرتك مستعمله 185/70 مزود حيز الاطار وبالتالي بيحك في الرفرف ودا طبيعي جداااااااااااااااااااااا
عدل مقاس الاطار هيتعدل معاك كل شيء :]

-

-

الموضوع: مشكلة فى كاوتش الفيرنا 14/60/185

LinkBack

أدوات الموضوع

عرض

مشكلة فى كاوتش الفيرنا 14/60/185 - انشر الموضوع فى :

-

-

-

-

-

-

-

المواضيع المتشابهه

مقاس كاوتش الفيرنا

كاوتش الفيرنا

حد جرب كاوتش r13/70/185 في الفيرنا ؟

حد جرب كاوتش 13-70-205 على الفيرنا؟

تغيير كاوتش الفيرنا

الكلمات الدلالية لهذا الموضوع

المفضلات

المفضلات

ضوابط المشاركة