الموضوع: سياسه جديده لبعض البنوك عند فتح حساب او الحصول على كارت مدفوع مقدماً

البنوك ماشية علي كيفها .. في اللي بيطبق شروط البنك المركزي وفي مبيطبقش حسب حجم عملائة
كريدي اجريكول من سنة ونص روحت اعمل عنده فيزا قالي المحامين لاء ! استغربت جدا قولتله يعني ايه لاء قالي شروط وتعليمات قولتله شكراً
وعملتها في البنك الاهلي المصري

طبعا خايفين ومش عاوزين الناس تفتح حساب ,لحسن يحولو ترليونات مشبوهة ونغرق في الغلط والحرام ,ما شاء الله خيرنا مهطل وموش عارفين نلمو احنا ناقصين.
سيادتك بتسال 27 بنك وشغالين علي مين ,في بدايه الانفتاح اتفتح 80 بنك.البنوك دي شغاله علي شركات وموسسات ماليه.
طب بالنسبة للعملاء العاديين ولا في دماغهم ليه, عقلية مصرية اصيلة احتقار الفرديات .مديري البزنس كسلا واغبيا لا عاوزين يستحوذوا علي عملا ولا يتوسعوا -بارك الله في ما رزق- ونروح العربخانه -الفنك- من 9 ل 2 .نهجص شوية ونروح ونقبض حلو ومحدش هيمشينا .يبا سيبنا من وجع الدماغ عملا اهالي ايه ,خلينا نلهط في اليغمة.
اقسم بالله اجدع مصرفي فيهم ما ينفع تيلر في بنك عالمي
انجر خانة انجر خانة ,ناس بتاكل وناس سهرانة

المشاركة الأصلية كتبت بواسطة ahmed_eng2001

طيب ححكيلك على موضوع صغير كدة حصل معايا من فترة ....

كنت عاوز احط فلوس فى حساب احد الاشخاص فى الاهلى جنرال سوستيه ( سابقا ) .. و انا كان معايا 20 الف دولار
فقلت للموظف .. عاوز احط الفلوس دى فى الحساب الفلانى
- مينفعش
- ليه ؟

- علشان عملة الحساب مصرى و انت معاك دولار
- لا ياراجل .... انت بتتكلم بجد ؟؟
-
ايوة طبعا امال حهزر معاك

- طيب .... انسى موضوع الحساب ده ... انا عاوز اغير دولار لمصرى بسعر البنك من عندك ... و لما حضرتك تدينى الفلوس المصرى ... حعمل نفسى مجتش قبل كدة و اديلك الفلوس المصرى تحطها فى الحساب ... ايه رأيك فى الفكرة الحلوة دى ؟

- ابتسم و سألنى .... عندك حساب عندنا فى البنك ؟

- قلتله لأ ... بس ده حيفرق فى ايه ؟
- قالى مينفعش .. علشان حضرتك معندكش حساب عندنا !!!!

- حقك عليا .. انا غلطان ... و ادركت ساعتها مدى ما وصلنا ليه من عقل و منطق

خرجت من البنك ده و غيرت الدولارات فى البنك الى سحبته منه و رجعت تانى حطيته فى الحساب فى جنرال سوستيه

الدروس المستفادة ....

قصة البنك الصغيرة دى فضلت فيها من الساعة 10 صباحا و حتى 2 ظهرا
البنك ده تابع للحكومة ... يعنى لما احط فيه دولارات .. و كأنى بحط دولار فى البنك المركزى :018a1d~146:

خد عندك بعض قرارات البنك المركزى الصغيرة كدة على الماشى ....

حد سحب الاقصى للدولار من حسابك الشخصى ... 10 الاف دولار فى اليوم !!!!!
طيب ده حسابى ... فلوسى ... انا حر فيها ... ان شاء الله اسحبها كلها مرة واحدة ... البنك لازم يكون عنده الحد الادنى الى يغطيه
لما سحبت ال 20 الف دولار سحبتهم على يومين

لما تسحب اكتر من 80 الف جنيه لازم تكتب سبب السحب !!!!!

اسمع الى جاية دى .... لما تحط فلوس تقريبا فوق ال 150 الف ( مش متذكر الرقم بالظبط ) فى حسابك لازم تجيب ما يثبت انت جبت الفلوس دى من فين !!!! اه و الله زمبئولك كدة .... و ده حصل مع واحد صديقى و انا كنت معاه ... و كانت قصة و خناقة جوة البنك

احد الحاجات الى تعتبر من مؤشرات الاقتصاد .... مرونة التعاملات البنكية ... الثقة فى العملاء .... الاهتمام بصغار العملاء ... توافر العملات الاجنبية

لنا الله

مصدق حضرتك ,اسالهم بالتليفون عن رصيدي يقولي مينفعش طب اعرف ازاي روح الشباك طب لو انت مسافر روح اعمل توكيل ,الاكيد ان نمر تليفونات البنوك الارضيه 02 مبتردش .مفيش احترام للعملا .هم علي مبدأ الدبة اللي قتلت صاحبها واخدين لوايح مكافحة الاموال المشبوهة ومتشددين فيها وامريكا بجلالة قدرها مبتطبقهاش ,زي الغبي اللي حدد دخول الكاش ب 10 تلاف امريكي طب ليه ,انت محتاج وواحد جايب دولارات لحد عندك . فيلم حي غباءx غباء .ليه تعقيد فتح الحساب. اللي يخاف منو ال اوفر درافت لكن واحد هيودع!!!!!!!! ليه التعقيد.

''(احد الحاجات الى تعتبر من مؤشرات الاقتصاد .... مرونة التعاملات البنكية ... الثقة فى العملاء .... الاهتمام بصغار العملاء ... توافر العملات الاجنبية)''

كل الحاجات الحلوة دي بيعملوها في الخليج وعرب زينا نقلا عن الغرب بس ربنا كرمهم ومخهم نور. عقبالنا

عقليات متأخره بعيد عنكوا

يا جماعة أنا حابب أوضح نقطة بس لأن واضح أن أغلبية الناس مش على دراية كافية بالأنظمة المصرفية,
أعتقد أن أغلبية البنوك اللي بتفرض قيود على فتح الحسابات أو حتى على التعاملات النقدية مع عملائها فالبنوك دي هتلاقيها بنوك أستثمارية تخضع لنظام موحد لكل البلاد المتواجدين فيها..
يمكن القيود و التعقيدات دي مش هتلاقيها ظاهرة في البنوك الحكومية لأن الدنيا فيها بتبقى عشوائية شوية و مفيش قوانين واضحة لمراقبة أنشطة الحسابات, أو بمعنى أصح, مش مهتمين يعرفوا حاجة عن عملائهم..
الموضوع مش كده خالص في أي بنك محترم في دولة محترمة فيها نظام مصرفي محترم,, فالبنوك بيبقى المفروض ليها دور رقابي واضح على الحركة المالية في أي بلد, و الدور ده بيتضمن الكشف عن أي أنشطة مشبوهة زي غسيل الأموال, الأرهاب, التهرب الضريبي,,, و غيرهم..
لو حد متابع أخبار أقتصادية في الفترة اللي فاتت, أكيد هيكون سمع عن الغرامات اللي فرضت على بنوك كبيرة جداً في أمريكا و أوروبا بسبب تقصيرهم في تأدية دورهم الرقابي و اللي نتج عنه حدوث جرائم مالية كبيرة, الغرامات دي كانت بمليارات الدولارات مع التهديد بسحب رخصتهم.. الكلام ده تم في دول عندها قوانين صارمة للرقابة مالية, فما بالكم بقى في مصر اللي مفيهاش قوانين تخص الموضوع ده من الأساس!!..