رحلة الى الاقصر واسوان..تقرير متكامل بالتفاصيل والصور الفيديو والاسعار(الجزء التانى)
السلام عليكم ورحمة الله
دة الجزء التانى من رحلتى الى الاقصر واسوان
ولو انت مش متابع دة رابط الجزء الاول
http://www.nilemotors.net/Nile/458110-a.html
لكن لو انت متابع يبقى كمل قراية
فى اليوم التالت قررت الذهاب الى البر الغربى لزيارة وادى الملوك وهو عبارة عن وادى او منطقة ممرات اختارها ملوك الفراعنة لدفن انفسهم فيها فى مقابر تحت مستوى سطح الارض فى باطن الجبل
ودى معلومات كاملة عن الوادى فى الرابط دة
وادي الملوك - ويكيبيديا، الموسوعة الحرة
طريق الوصول لية سهل لو انت معاك العربية هتاخد كوبرى الاقصر اللى على النيل وتعدى علية طوالى وفى نهايتة هتلاقى اتجاة اجبارى يمين ويسار
هتاخد اليمين وتفضل ماشى علطول مسافة حوالى 8 او 10 كيلو لحد ما تلاقى كمين نقطة شرطة القرنة هتخش شمال فى الشارع الواسع وهتمشى بتاع كيلو ونص لحد ما توصل التقاطع اللى بيسموة
التفتيش ودة فية شبابيك لقطع التذاكر بتاعة معبد الرامسيوم ومدينة هابو
هتاخد يمين لحد ما توصل الصينية وتاخد الصينية شمال فى الطريق المتعرج لحد ما تلاقى نفسك فى الباركن بتاع وادى الملوك ودى خريطة الطريق
http://i1357.photobucket.com/albums/...ps28d3f815.jpg
الطريق كلة بياخد اقل من نص ساعة .............ووصلت عند الطريق المتعرج اللى بيدخلك على وادى الملوك
http://i1357.photobucket.com/albums/...ps4b4e4f40.jpg
وصلت الباركن وركنت العربية
http://i1357.photobucket.com/albums/...ps1ab0c70d.jpg
ودخلت على الصالة الرئيسة
http://i1357.photobucket.com/albums/...ps1e3dac20.jpg
ولقيت فى نصها ماكيت معمول لوادى الملوك بالكامل
http://i1357.photobucket.com/albums/...ps7f3d9df4.jpg
عشان تفهم الماكيت دة انا هشرحهولك
الخطوط السوداء التخينة والرفيعة دى الممرات بتاعة وادى الملوك
والنقط السودا دى مداخل المقابر
والجزء الشفاف العالى والواطى دى تضاريس الجبل والوادى اللى احنا فية
وعشان تفهمها اكتر انا هحط لك صورة من مكان عالى عشان تستوعب وهتلاقى فيها الممرات اللى بنمشى فيها ومداخل المقابر
http://i1357.photobucket.com/albums/...s61c5f160.jpeg
نيجى بقة لصورة الماكيت من تحت
http://i1357.photobucket.com/albums/...ps02758597.jpg
وبردو عشان تفهمة
الحاجات اللى نازلة منة لتحت زى ما تكون مواسير مربعة ولكنها متعرجة هيا فى الحقيقة المقابر
وعشان تبقى متخيل النسبة والتناسب فى الماكيت هقولك ان المواسير المربعة اللى انت شايفها دى احنا بنمشى فيها وارتفاعها تقريبا 3 متر وعرضها حوالى مترين الى مترين ونص
عشان تبقى متخيل حجمها
والفراغ اللى حواليها دة هو باطن الجبل وهو مصمت طبعا لكن الماكيت سايبة فراغ عشان تشوف تصميم كل المقابر
يعنى من الاخر الماكيت من تحت عبارة عن صورة لبطن الجبل
بتطلع من الصالة بتلاقى طفطف بتقطع لة تذكرة ب 2ج بياخدك من عند الصالة الرئيسية يوديك عند مكان قطع التذاكر
والصورة اللى جاية صورة الطفطف
والفيديو اللى بعدها تصوير المسافة ما بين الصالة الرئيسية ومكان قطع التذاكر
http://i1357.photobucket.com/albums/...psb862ef67.jpg
https://www.youtube.com/watch?v=lsL_...ature=youtu.be
وادى الملوك فية 63 مقبرة لكن مش هتلاقيهم كلهم مفتوحين
ممكن تلاقى 12 او 15 او 20 انت وحظك وطبعا فيهم مقبرة توت عنخ امون اللى اكتشفت فى اوائل القرن المنصرم
سعر التذكرة العادية 3ج وبتدخل بيها 3 مقابر وبعض المقابر ممكن تكون 4ج او 5ج للمقبرة الواحدة
ومقبرة توت عنخ امون غالية شوية على ما اذكر كانت 15 او 25 ج رغم ان كل محتوياتها اتنقلت الى المتحف المصرى بالتحرير
جدير بالذكر ان التصوير مسموح فقط فى الوادى وخارج المقابر لكن ممنوع داخل المقابر ولو تم ضبط كاميرا معاك هتتصادر واحتمال تدفع غرامة
الصور اللى انت هتشوفها فى الوادى متصورة عادى
لكن كل الصور اللى فى الموضوع اللى ملتقطة داخل المقابر تم التقاطها خلسة
لكن من باب المسؤلية انا قفلت الفلاش عشان مسببش ضرر للاثر التاريخى
ودى صورة ليا وانا بستعد لدخول احدى المقابر
http://i1357.photobucket.com/albums/...psef9882fe.jpg
ودى صورة لتصميم المقبرة
http://i1357.photobucket.com/albums/...ps0ca4ca76.jpg
والحقيقة على المستوى الشخصى لما كنت بسمع ان احنا المصريين حضارة 7000 سنة كان الكلام بيعجبنى اكيد لكن عمرى ما شفت معناة او لمستة بايدى الا لما رحت وادى الملوك
وهحكيك دلوقتى يعنى اية احنا المصريين فراعنة وحضارتنا 7000 سنة
الاول قبل ما ننزل المقبرة لازم تبقى عارف ان احنا نازلين مقبرة عمقها قرابة 100 متر اى ما يعادل مبنى من 33 طابق بزاوية ميل سالب35 درجة
لحد ما نوصل لغرفة الدفن اللى هيا حكاية لوحدها
يلا ننزل
http://i1357.photobucket.com/albums/...ps37e9cb74.jpg
ودى صورة ليا بعد ما نزلت قرابة 30 متر اى ما يعادل 10 طوابق تقريبا
بزاوية ميل 35 درجة تقريبا بالسالب
وبنتى ملك على كتفى منبهرة وخلف منى سياح طالعين
وطاقة النور البعيدة اللى فى الصورة هيا مدخل المقبرة
http://i1357.photobucket.com/albums/...ps291c0b19.jpg
وبعد كدة صورتين من عمق قرابة 45 متر تقريبا
http://i1357.photobucket.com/albums/...psa98bc9b9.jpg
http://i1357.photobucket.com/albums/...psf6d0bcce.jpg
وهنا بقة هنقف شوية عشان ناخد نفسنا واقولك على بعض المعلومات
اولا المقابر دة منحوتة فى بطن جبل جيرى مش جبل صخرى وعمرها 7000 سنة اللى انا كنت بقولك عليهم
طيب انت ممكن تسأل واية الاعجاز فى كدة ؟؟
اقولك انا
بص يا سيدى
اولا الجبال الجيرية دى اضعف انواع الجبال عشان تحفر فيها نفق او كهف
ولو حصل وحفرت نفق او كهف فلازم تدعم الحوائط والجدران بدعائم خشبية او حديدية لمنع الانهيار بسبب الضغط الهائل للجبل على الفراغ اللى حصل بداخلة نتيجة الكهف او الممر
او النفق اللى انت حفرتة
الكلام دة بيتطبق على المناجم كلها بصفة عامة رغم ان المناجم على مستوى العالم بتكون فى الغالب فى جبال صخرية مش جيرية
ولعلك من وقت للتانى بتسمع عن انهيار منجم فى اى بقعة فى العالم على العمال بداخلة رغم انة بيكون فى جبال صخرية ومدعم من الداخل بدعائم خشبية او حديدية
طيب بالنسبة للشخص العادى ايةالفرق بين الجبل الجيرى والجبل الصخرى؟؟
الفرق ببساطة شديدة انك ممكن بميدالية المفاتيح بتاعتك تحفر وتكتب وتخدش وتلعب زى ما نت عايز فى الحجر الجيرى لضعفة
لكن الحجر الصخرى انت محتاج مطرقة قوية وضربة بكل قوتك على الصخرة اكتر من مرة لحد ما تعمل فية شرخ او تكسرة
انا بضرب لك المثلين دول عشان تعرف الفرق بين قوة الحجر الجيرى والصخرى
طيب واحد ممكن يسأل واية الاعجاز فى كدة ؟؟
اقولك الاعجاز ببساطة ان فية فجوة او ممر او كهف متمثل فى مقبرة فرعونية فى بطن جبل جيرى وما زالت صامدة بقالها 7000 سنة بدون اى دعائم خشبية او حديدة وبدون ما تنهار
علما بان اتخن كهف فى اى مكان فى العالم بيكون فى جبال صخرية وبيكون مدعم بدعائم حديدية او خشبية وبيكون معرض للانهيار فى ى وقت وفية مناجم كتير بتتقفل علشان بتكون
ظهرت عليها من الداخل علامات الانهيار
هتقولى طب ازاى الفراعنة عملوا كدة
هقلك لما يبقوا يعرفوا هما بنوا الاهرامات ازاى هيبقوا يعرفوا المقابر دى صامدة زاى
ونكمل طريقنا وننزل لتحت شوية
http://i1357.photobucket.com/albums/...pscd6f80c4.jpg
http://i1357.photobucket.com/albums/...ps4a8d68ab.jpg
هنا برضوا هنقف شوية
عشان برضوا الصورتين اللى فاتوا فيهم اعجاز وحضارة 7000 سنة
وهقولك ازاى
بص الاول فى الصور وركز وتابع معايا
انا كنت بسمع عن مقابر الفراعنة وعن الرسومات والالون اللى متغيرتش بقالها 7000سنة لحد ما شفتها بعينى ووقفت اتاملها
وسألت نفسى بمنطق الشخص العادى او البسيط
هيا الالوان دى بتتكون من اية؟؟
اكيد طبعا من مواد كيماوية
طيب زى الفل
لو رحنا دلوقتى لاتخن واعظم شركة كيماويات بناء فى العالم وقلنا لها ان احنا عاوزين لون ندهنة على مبنى بس
الشركة دى تضمن لنا ان اللون مش هيتغير او يبهت او يتلف لمدة1000 سنة
بلاش نقولها 7000 سنة
يعنى الشركة تدى لنا ضمان 10 قرون على اللون ضد عوامل الطبيعة
يا ترى الشركة دى هيبقى ردها اية ؟؟
اكيد طبعا الرفض لغرابة واستحالة الطلب
طيب يا ترى نطلع من النتيجة دى باية !!!!!
اقولك انا وبمنطقى انا كشخص عادى ......... ....نطلع بنتيجة ان اعظم كيميائى مواد بناء فى العصر الحديث
اخرة يشتغل صبى عند الكيمائى الفرعونى او يعمل لة شاى وقهوة وينضف لة المعمل ....ههههههههه
وبمنطوق علمى ان الفراعنة وصلوا لدرجة فى علم الكيماويات على الاقل كيماويات البناء لسة لحد دلوقتى موصلناش ليها
ونكمل طريقنا وننزل
http://i1357.photobucket.com/albums/...ps97bc2773.jpg
http://i1357.photobucket.com/albums/...psebf3e3d8.jpg
ووصلنا اخيرا لغرفة الدفن اللى هيا على عمق 100 متر اى ما يعادل مبنى من 33 طابق بزاوية ميل 35 درجة بالسالب تقريبا تحت سطح الارض فى بطن الجبل
http://i1357.photobucket.com/albums/...pse6a5dbf3.jpg
http://i1357.photobucket.com/albums/...ps23fb48d8.jpg
http://i1357.photobucket.com/albums/...ps239fe3ee.jpg
عايزك بقة تتفرج على ال3 صور اللى فاتوا دول بتروى وبصبر عشان فيهم حكاية كبيرة قوى وشغلانة جامدة
اولا غرفة الدفن واسعة وفى نهاية المقبرة تحت والنقوش بتزين السقف زى ما انت شايف بالالوان اللى متغيرتش بقالها 7000 سنة وفية اعمدة شايلة السقف المقوس
خد عندك اول اعجاز فرعونى
السقف المقوس دة معروف علميا انة السقف الاكثر تحملا للضعوط لان الضعظ بيتوزع على كامل محيط السقف مش على نقطة واحدة
وتم استخدامة فى العصر الحالى وفى العصور السابقة فى بناء اكبر المبانى الهندسية لفاعليتة
واحد هيسال وفين الاعجاز بقة ؟؟
اقولك انا ان الاعجاز ان من 7000 سنة فى الوقت اللى فية شعوب بعض دول اوربا بتحصل على طعامها عن طريق مطاردة الحيوانات فى الغابات بالرماح الخشبية
كان الفراعنة وصلوا لمستوى فى علم الهندسة المعمارية اللى يخليهم يفهموا ان الشكل المقوس للسقف هو الاكثر تحملا للضغط الهائل من الجبل والذى قد يصل لبعض الاطنان على البوصة المربعة
مش بس كدة
ارجع تانى بص للـ3 صور
هتلاحظ ان فية اعمدة شايلة السقف
الاعمدة دى لم تبنى
يعنى مجابوش حجارة وصخر من برة وحطوها فوق بعضها وحشروها عشان تشيل السقف المقوس اللى بدورة متحمل الضغط الهائل للجبل
لا
الاعمدة دى منحوتة من قلب الجبل فى ذات نفس المكان
يعنى الفراعنة لما دخلوا ينحتوا غرفة الدفن فى بطن الجبل كانت عبارة عن كتلة صماء فقاموا بتفريغ المساحة حوالين مواقع الاعمدة عشان يبقى العمود منة فية وبعد كدة قاموا بنحت السقف بالشكل المقوس اللى انت شايفة
مش بس كدة
لا خد عندك اللى جاى
معروف انك كل ما تنزل لتحت وتقرب من مركز الكرة الارضية الحرارة بترتفع ودى مسلمات علمية مفروغ منها
مفيش الكلام دة
انا كنت واقف فى غرفة الدفن والجو جميل جدا ولطيف ومنعش
حالة واحدة بس ممكن تكون فيها المقبرة حر وهيا ان يكون فيها كثافة عالية للسياح فبفعل التنفس بتلاقى حرارة الجو بتزيد شوية
غير كدة الجو زى الفل
خليك ملاحظ ان انا بتكلم عن غرفة دفن على عمق 33 طابق تحت سطح الارض وبزاوية ميل 35 درجة بالسالب تقريبا
وقفت اتامل المقبرة وانا عمال اتخيل العمال والمهندسين الفراعنة وهما شغالين على قدم وساق فى المقبرة ومش عايز اطلع من المقبرة لكن الرغبة فى تغطية ورؤية بافى المقابر هيا اللى اجبرتنى انى اطلع من المقبرة
واضطريت استريح 3 مرات وانا طالع وخصوصا انى كنت شايل بنتى على كتفى
وطلعت من المقبرة
ودخلت غيرها
ودخلت غيرها
خلى بالك ان التذكرة ام 3ج بتدخلك 3 مقابر وانت داخل كل مقبرة الحارس بيخرمها خرم واحد ولما التذكرة تتخرم 3 مرات يبقى كدة انتهت
وانت ممكن تقطع تذاكر العدد اللى انت عايزة طالما فيك صحة تنزل وتطلع المقابر
خلى بالك برضوا من حاجة تانية ان انت غالبا ممكن تقضى اليوم كلة فى وادى الملوك فانت اعمل زى ما انا عملت .......خد معاك زجاجتين مياة وبعض البسكويت لان مفيش كافتريا هناك غير عند الباركن بتاع العربيات
وعشان تشترى زجاجة مية لازم ترجع للمكان اللى ركنت فية العربية يعنى على بعد حوالى كيلو
دى حاجة
الحاجة التانية انك حاول متشيلش اى حاجة فى ايدك لان نزول المقابر والطلوع منها هيرهقك وحطها فى شنطة على ضهرك
وكملنا المسيرة فى المقابر نزولا وطلوعا
لحد انتصاف اليوم
وكنا تعبنا
قعدنا على السور المجاور للاستراحة لالتقاط الانفاس جنب مقبرة تحتمس الثالث اصعب المقابر فى الدخول
وسالت بنتى ملك تطلعى مع بابا ولا تستنى مع ماما
لقيتها محتارة ومش عارفة تاخد قرار
تطلع معايا
ولا تلعب بالتذاكر اللى فى ايديها
http://i1357.photobucket.com/albums/...ps0addfdce.jpg
قلتلها طيب على ما تاخدى قرار تعالى نقعد فى الاستراحة شوية
يدوب قعدنا ناخد نفسنا ومفيش دقيقتين ولقيتها دخلت فى نوم عميق
http://i1357.photobucket.com/albums/...ps923f96ee.jpg
راجعت التذاكر اللى معايا كلهم ودورت على تذكرة لسة فيها خرم واحد
عشان ادخل بية مقبرة تحتمس الثالث اللى هي غريبة شوية فى دخلتها لانها الوحيدة اللى مدخلها مرتفع عن سطح الارض
http://i1357.photobucket.com/albums/...psf7f3702f.jpg
لقيت تذكرة لسة فيها مقبرة خدتها وطلعت على مقبرة تحتمس الثالث
اللى احنا عشان نوصلها لازم نطلع لها بسلم حديدى
http://i1357.photobucket.com/albums/...ps577e8ff2.jpg
http://i1357.photobucket.com/albums/...ps85f27d41.jpg
http://i1357.photobucket.com/albums/...ps79e8c505.jpg
بس للاسف الشديد لقيتها مقفولة
فجبت الصورتين دول من النت للمقبرة
http://i1357.photobucket.com/albums/...ps5113ab6d.jpg
http://i1357.photobucket.com/albums/...pse892406a.jpg
بكدة ابقى خلصت الجزء التانى من الرحلة
ونلتقى فى الجزء التالت اللى هيكون اسمة
( رحلة الى الاقصر واسوان....تقرير متكامل بالتفاصيل والصور والفيديو والاسعار ( الجزء التالت)
