أولا أنا مش شيخ ولا حاجة :)
وطبعا تعلم العلوم الشرعية منجاة من الفتن لأن الجهل هو مصدر كل انحراف وكل اللغط اللي حوالينا ده ما بين متشدد ومفرّط سببه الجهل من الطرفين
علم الفقه هو المتعلق بالمذاهب الأربعة ، بس المذاهب الأربعة مش هي الفقه خلي بالك
هبسطلك المسألة شوية
المذاهب الأربعة دي هي مذاهب فقهية منسوبة للأئمة الأربعة المعروفين ( أبو حنيفة - مالك - الشافعي - أحمد بن حنبل ) كل واحد منهم ليه طريقة في فهم النصوص من القرآن والسنة وبالتالي استنبط من خلال فهمه أحكام فقهية شرعية والطلبة بتوع كل واحد نشروا المذهب بتاعه وشهروه وصار الأربعة دول أشهر الأئمة في الفقه وكل بلد أو منطقة خدت ليها مذهب التزمت بيه وطبقته هو بس دونا عن باقي المذاهب .. وهنا تكمن المشكلة
المشكلة ان المذاهب الأربعة مش هي الدين بس ومش معنى إن البلد الفلانية مذهبها شافعي مثلا إن الإمام الشافعي مصيب في كل ما يقول ، ده الأئمة نفسهم كانوا بيقولوا (إن صح الحديث فهو مذهبي) و (كل يؤخذ من قوله ويرد إلا محمد صلى الله عليه وسلم) لكن الأتباع بتوع كل مذهب كانوا بيوصلوا لدرجة من التعصب المذهبي وصلتهم لدرجة انهم بقوا يوالوا ويعادوا على المذهب ! يعني كل واحد تبع مذهبهم حبيبهم واللي مش تبعهم عدوهم ! لدرجة إن الأزهر في يوم من الأيام كان فيه 4 قبلات للصلاة كل قبلة بتاعة مذهب من المذاهب الأربعة ومكنش حد من أتباع المذهب الحنفي مثلا يصلي مع حد من أتباع المذهب الشافعي ! تخيل ؟!
الخلاصة إن مفيش حاجة اسمها أنا هلتزم بالمذهب الفلاني بس وهسيب الباقي ، انت بتاخد الصح من كل عالم وإمام أيا كان مذهبه إيه ومتلزمش نفسك بمذهب معين خلي مذهبك هو الإسلام وإمامك هو الرسول صلى الله عليه وسلم ، وموضوع دراسة الفقه المقارن اللي هو آراء المذاهب الأربعة في كل مسألة فقهية مسألة صعبة ومعقدة ومملة وغير مجدية ! أنا هستفيد بإيه لما أعرف إن الإمام الفلاني قال في الحكم الفلاني كذا والإمام التاني قال كذا والتالت قال كذا والرابع قال كذا ؟! أنا كده هحتار أكتر ومش هبقى عارف أطبق الحكم الفقهي ده ازاي لكن أنا أبحث عن الدليل مع أي واحد فيهم وأشوف حجة كل واحد أنهي الأقوى وبالتالي أتبع حكمه المبني على الدليل الشرعي الصحيح مش لمجرد إن الإمام الفلاني هو اللي أفتى بكده
علشان كده متشغلش بالك دلوقتي خالص بموضوع المذاهب علشان هتتعب وهتوه ، انت اتعلم الفقه الميسر المبسط بالدليل وبعدين لما ترسخ في العلم إن شاء الله ممكن تقرأ في الفقه المقارن وتعرف رأي كل إمام وتقارن بينهم وتختار اللي يرتاح ليه قلبك وعقلك ويكون مبني على الدليل الصحيح مش على التعصب المذهبي
مبدئيا كمبتدئ لازم تتعلم الفروض ، يعني انت ملزم بالصلاة فلازم تتعلم ازاي تصلي صح ، ملزم بالصيام لازم تتعلم تصوم ازاي صح ، كل الحاجات دي في الفقه وأنا حطيتلك كتب ميسرة في الفقه وبالدليل الصحيح طبعا ، قبل كده لازم تتعلم العقيدة وتشوف إيه الحاجات اللي بتعملها غلط وتبطلها يعني مثلا لو كنت بتحلف بالنبي فتعرف إن ده حرام وشرك ، لازم تتعلم ازاي تعبد ربنا صح لأن الإنسان مش هيقبل منه أي عمل لو كانت عقيدته فاسدة عياذا بالله ، فلازم تصحح عقيدتك كويس وتعرف أصولها وبعدين تبدأ تدخل في الباقي ، وأنا برده حطيتلك أهم وأبسط كتب في العقيدة وكلها برده بالأدلة من الكتاب والسنة يعني محدش بيألف حاجة من عنده علشان محدش يقولك دي كتب وهابية والكلام الأهبل ده ، الكتب دي لو فيها حاجة من دماغ المؤلف ومن غير دليل ارميها لكن إن شاء الله هتلاقي كل حاجة بدليل صحيح وكلام مبسط بعيد عن سفسطة أهل البدع والمذاهب الضالة عياذا بالله
أتمنى يكون كلامي مفهوم ومنطقي ولو في حاجة مش واضحة قولي