موظف سفارة مصر فى كندا !!!!!!!!!!!!!!!!
السلام عليكم و رحمة الله و بركاته
النهاردة حصل معايا موقف غريب جدا. مش عارف أزعل و لا أضحك.
اتصلت بالسفارة المصرية فى كندا عشان أجدد جواز سفرى و رد عليا الموظف و تقريبا شدنى فى التيلفون و قاللى عالمطلوب و قفل السكة.
أنا كنت اتصلت بيه من 3 شهور عشان أجدد الجواز و اتفقنا أنى بدل ما أجدده و أعمل الجواز المميكن الجديد, هعمل تمديد فى الجواز القديم لحد نوفمبر 2015 و أما أنزل مصر أبقى أعمل الجواز المميكن الجديد.
أما اتصلت بيه النهاردة, قاللى هات الرقم القومى, و أما قولتله أنه منتهى و مش معايا أصلا قاللى فيه لجنة جاية فى شهر مارس و ممكن تعمل معاهم الرقم القومى. و أما قولتله أنى بالشكل ده الجواز مش هيلحق يخلص قبل شهر ابريل و أنا ناوى أنزل فى ابريل, قاللى آه مش هيلحق يا فندم. ده بياخد 3 شهور. أول ما قولتله أنى كنت اتصلت بيك من 3 شهور و أنه قاللى ممكن أعمل تمديد فى الجواز. قام ركبه غفريت و بدأ يشدنى فى التيلفون و يزعق و يقول أنى كان لازم من الأول أقول لسيادته أنه أنا اتصلت بيه قبل كده و أنه هو قاللى كذا و كذا و كذا و أن أنا قولتله كذا و كذا و كذا. لأنه أنا بالشكل ده بضيع وقت كتير و قعد يزعق و حسسنى أنى بكلم سكرتير الأمم المتحدة عشان أجدد الجواز.
و الله ده أول موقف من هذا النوع يحصلى من ساعة ماجيت هنا.
و الله و هو عمال يشدنى فى التيلفون, قلت فى بالى, العيب مش عليك, العيب على اللى قعدك هنا من غير ما يعرفك أن أنت هنا لخدمة المصريين. مش عشان تشدهم. آه يا واااااااااااااااااطى. و الله لولا انى محتاج الباسبور عشان أنزل مصر فى ابريل الجاى, كنت فضلت متلقح هنا و خلاص !!!!!
الغريبة أنه ده لو حصل هنا, كنت هبعت شكوى لوزير الخارجية بتاع كندا. بس أنا لو بعت شكوى لوزير خارجية مصر و لا للسفير المصرى, مش هيفهم أنا عاوز ايه.
الغريب بقى, أنه أنا قبل الحوار ده بيوم واحد بس, كنت بتصل بالسفارة الأمريكية فى كندا عشان أسأل على حاجة تخص أختى. و أنا لا أمريكانى و لا كندى. و تشوف أحسن معاملة فى التلفون و الله العظيم من الموظفة اللى ردت عليا رغم أنى هريتها أسئلة. و هى ترد بكل أدب و صبر.
لينا رب اسمه الكريم.
بكره تتعدل ان شاء الله.
