الموضوع: أخبار الانفي ايه؟؟

انا بفكر اشتريها قسط
رجاء لملاكها يفيدونا افادكم الله

تجربتى فى ابو رواش مع اسبيرانزا انفى 2014 تقفيل محلى وصيانة 10000 كيلو .... اولا المشاكل اللى قابلتنى فى العربية
1- مشكله تسريب الميه من غطا القربة
2- تزييق مع لف الدريكسيون شمال
3- خبط فى المساعد الامامى شمال مع المطبات والنقر الصغيرة
4- زن فى منطقه التابلوه عند الطارة فى الطوالى
دى كانت اهم حاجات كانت مقابلانى وفى حجات تانيه بس مقلتش ليهم عليها لانى كنت رحت من غير حجز وكان فى عربيات كتير موجوده ... والغريبه انهم حلوها من غير ما اقلهم عليها
بعد الصيانه كالاتى
1- تغيير زيت موبيل تخليقى بالكامل مع فلتر
2-كشف على دورة التبريد وحل المشكلة
3-غسيل الموتور
4-معالجة مشكلة الدركسيون والزنة اللى كانت موجوده راحت بنسبة 90 %
5-مشكلة المساعد هى كانت مقابلانى من يوم ما استلمت العربية بس دلوقتى الصوت تقريبا مش ملحوظ
6-تم تربيط العفشة كانت العربية حسيت انها كانت نزلت شويه من ورا قبل الصيانة حوالى 2 سنتى انا قلت يمكن المساعدين من اللى بتشوفه على الطريق هبطت شويه وانا عندى الطرق محتاجه 4*4 علشان تستحملها
المهم لقيت العربية رجعت تانى بعد الصيانة عالية مش عارف عملوا فيها ايه !!!!!!
نيجى بقى للانطباع العام بعد الصيانة
1- صوت الموتور هدى ونعم كده لانه كان عالى شوية قبل الصيانه
2- العربية بقت ماسكة حيلها وناعمة
3- السحب بقى افضل من الاول واستجابة الموتور بقت اسرع من الاول كنت بحس فى الاول انها مخنوقه بس دلوقتى فاقت كتير عن الاول
4- كان بدال الفرامل بياخد مشوار شوية على ما التيل يمسك فى العجل هما عملوها من غير مقولهم وبقت على الشعرة
تقييمى للتوكيل بصراحة من غير مجاملة ناس محترمين انا مشفتش منهم حاجه وحشة وبيتعاملوا بكل ادب والحترام وكل الشكر للمهندس احمد غريب لانه كان محترم جدا معايا ومتفهم لكل حاجه كنت بساله عليها
..... بالنسبه بقى لموضوع تانى الاستهلاك لان فى ناس كتير كانت بتسال عليه
المتوسط العام جوه البلد وطوالى بس جوه البلد اكتر كل 100 بيستهلك 10 لتر
ودى كانت تجربتى فى مشوار اسكندرية زراعى رايح جاى وانا رايح قطعت 290 كيلو فى 6 ساعات !!!!! لان الطريق كان زحمة وكنا 4 فى العربية اخدت منى 22 لتر ده كده رايح .... وانا راجع رجعت بليل فكان الطريق فاكك شوية و قطعت حوالى 400 كيلو لانى عملت مشوار تانى بعد ما رجعت ومكنتش فولت ا خدت منى 30 لتر وبالنسبه للسرعه كانت من 90 ل 120 على حسب حاله الطريق والكميوتر كان حاسب المتوسط 6.5 لتر لكل 100 كيلو
ودى كانت تجربتى مع الانفى تقفيل محلى بكل امانة والعربية معايا من 7 شهور شايلانى ومش مزعلانى وتمنها فيها ارجوا انى اكون افدتكوا ولو حد عنده استفسار عن حاجه ان شاء الله اعرف اجاوبة وانا تحت امركم ...تحياتى

نفس الحال بردوا لما عملت صيانة ال 20000 كيلو وكنت اشتكيت ان لمبة الABS بتنور هما الصراحة اول مرة مسحوا ال Error بس قالولي لو نورت تاني تعالي ونغيرها في الضمان وفعلاً روحت لما نورت وفعلاً صرفوا الحساس ولكن بعد تغييره اكتشفوا ان المشكلة كانت في الفيش والضفيرة وتم عمل اللازم بصراحة وبدون اي تكلفة