الموضوع: إتعرضت لحادثة بسبب عدم عمل فرامل الـ 301

بسم الله الرحمن الرحيم

مقدمة:

بداية أرجو إن الأخوة و الأخوات الأعضاء يتقبلوا إعتذارى عن طول الموضوع لإن أحداثه بتمتد من شهر أكتوبر 2014 (بداية ذهابى للتوكيل فى أبورواش و غمرة عدة مرات و شكوتى من وجود مشكلة فى الفرامل عندى و تجاهلهم التام لشكوتى) وصولاً للحادثة اللى حصلت بسبب عدم عمل الفرامل و تعريض حياتى و حياة أسرتى و حياة الناس على الطريق للخطر نتيجة إهمالهم و جشعهم و تركيزهم على بيع اكبر كم ممكن من العربية على حساب توفير خدمة ما بعد البيع و حل مشاكل ملاك العربية, و ما تبعها من إلقاء التوكيل المسؤلية على عاتقى, بدون تقديم أى مبررات لعدم عمل الفرامل زى ما هاتقرأوا معايا تحت بالتفصيل و عدم محاولتهم إصلاح مشكلة الفرامل قبل حدوث الحادثة بالرغم من إنى رحتلهم 5 مرات بخصوصها, ورفض التوكيل إعطائى شهادة بمطابقة فرامل عربيتى للمواصفات القياسية, بل و رفض التوكيل كتابة شكوتى من الفرامل فى شيت العمل - اللى بتدخل بيه العربية عندهم - و تطاولهم بالكلام و بالتهديد بإستخدام العنف عند إصرارى على طلب إضافة شكوتى من الفرامل فى شيت العمل فى أبو رواش, و الشهود من الموظفين و العملاء موجودين بالإضافة للشكوى الكتابية اللى قدمتها لمسؤلين خدمة العملاء (و اللى كانوا موجودين أثناء حدوث التطاول), و رفضهم لإستقبال العربية فى غمرة بعد ما عملت بيها حادثة لما سألونى عن سبب الحادثة و قلت إن الفرامل مشتغلتش, و إصرار التوكيل على إلقاء المسؤلية عليا بإستخدام إسباب غير صحيحة و هاتقرأوا معايا تحت بالتفصيل إستخدامهم لكل الأساليب لفرض رأيهم الخطأ عليا, و بفضل ربنا كل ما أعدى من إسلوب يشتغلوا على الإسلوب اللى بعديه ... الأساتذة الأفاضل اللى فى التوكيل لو مستواهم الفنى على نفس مستواهم فى محاولة التلاعب بالناس و تحريف الحقيقة لإلقاء خطأهم على الناس, لا كنت أنا إتعرضت لحادثة و لا أياً من ملاك البيجو كان إشتكى من أى مشكلة بتقابلوا فى عربيته, و أنا مش أول واحد يتعرض لحادثة و يشتكى من عدم عمل الفرامل. بس بقت عادة عند التوكيل إنه يضغط على ملاك العربية عشان يخلوا التأمين يتحمل كل حاجه و الله أعلم هل بيصلحوا الفرامل بعد كدا مع تصليح العربية و لا بيعرضوا حياة الناس للخطر تانى.

















1- ذهابى لمركز أبو رواش فى يوم 8 / 10 / 2014

العناصر:

1أ) تجاهل شكوتى بخصوص نظام الفرامل و عدم حل المشكلة رغم ذهابى مرتين.

1ب) رفض كتابة شكوتى من أداء الفرامل فى شيت / اوردر دخول العربية. و رفض عمل شيت جديد لإستقبال العربية - callback - لما رجعتلهم تانى يوم للإسباب الموضحة فى الشرح.

1ت) التطاول بالكلام و التهديد بإستخدام العنف عند إصرارى على كتابة شكوتى من نظام الفرامل فى شيت العمل و مطالبتى بتقرير فنى يفيد إن فرامل عربيتى مطابقة للمواصفات (طالما إنهم مصرين إنها سليمة رغم إن بالتجربة العملى قدامهم فى حاجات غلط), و ده حصل امام العملاء المتواجدين بالمركز و أمام أفراد الأمن و أمام مسؤل خدمة العملاء (أ/ محمد أحمد الرفاعى) و أمام نائب مسؤل المركز (م/ محمد الشرقاوى).

1ث) إستخدامهم لإساليب رخيصة زى إحراج العملاء للتهرب من أخطائهم.

1ج) تجاهل التوكيل لشكوتى المكتوبة ضد مركز أبورواش و عدم إتخاذه أى إجراء.

التفاصيل:

- فى اليوم ده رحت عشان أعمل صيانة الـ 10000ك و أركب المثبت و ابلغهم بملاحظاتى و إشتكيت من أداء فرامل عربيتى اللى بتترجرج و تمشى ما بين متر و نص لمترين لما أكبس فرامل على سرعة 20ك على اسفلت لا عليه رمل او ميه او زيت و بلغتهم شكوتى بخصوص تيل الفرامل اللى بيصفر من بعد حوالى 3500ك.

- خرج معايا واحد من مهندسين المركز و وريته إن العربية بتترجرج و تمشى حوالى مترين لما بضغط فرامل على سرعة 20 مع إرتفاع صوت خبطات التيل على الطنابير بصورة مرعبة (طريقة عمل الإيه بى إس) و الفرق لما بضغط على سرعات تانية سواء 25ك أو 30ك العربية بتكلبش و تقف مكانها (مافيش أى صوت تخبيط للتيل), و إن ده ممكن يكون بداية مشكلة أكبر عندى فى نظام وحدة الفرامل أو فى كمبيوتر العربية و إن الموضوع محتاج فحص, و خصوصاً لما ببقى واقف بالعربية و أدوس فرامل بسمع صوت الفرامل الخلفية (الديسكات) و كأن فيه حاجه بتتطبق. لكن كان إصرارهم جميعاً (م/ محمد الشرقاوى نائب المركز - أ/ مصطفى البرنس مهندس إستقبال) على إن دى طريقة عمل الفرامل و كل شئ تمام التمام. و قالى الديسكات الخلفية محتاجه تتشحم (و العربية لسه معملتش 10000ك).

- أخدوا العربية و بدون خروجى معاه, خرج محمد الشرقاوى بالعربية و أنا فى الحسابات و رجعلى قالى جربت العربية و كل شئ تمام التمام و معلش مضطر اسيبك عشان الحق باص الشغل.

- أخدت عربيتى و مشيت لقيت صوت التيل بيصفر, المثبت مش متبرمج, صوت حاجه بتتطبق عند الديسكات الخلفية و وجود الرجرجة و مشى العربية عند الـ 20ك.

- رجعت تانى يوم 9/10/2014 و إستقبلنى مصطفى البرنس و بلغته إن مشكلة الفرامل و التيل لسه موجودين و المثبت مش متبرمج. و إحنا بنتكلم دخل عميل ب 508 فقام البرنس بسؤاله بصوت عالى "صيانة إيه" العميل رد قاله "صيانة 10000" فقام البرنس قايله "يبقى حسابك 5000 جنيه" طبعاً العميل ضحك, فقام البرنس باصصلى و قال بصوت عالى "شايف الناس اللى جايه تدفع 5000 جنيه على الصبح".

-عديت على سخافاته و طلبت منه عمل اوردر عمل بشكوتى و كتابة اسباب شكوتى من العربية و ملاحظاتى, رفض و قالى بإنفعال "إنت عايز إيه و ناوى على إيه؟"

- فضلت هادى معاه للأخر و وضحتله إنى بضمن حقى, فعلى صوته و زعق و نادى على محمد الشرقاوى و قاله "الباشا بيقول إنه عايز اوردر عمل للعربية و بيشتكى من موضوع التيل والفرامل". و تبع كلامه بإنه يقولى "خلاص بقى إحنا على الصبح مش عايزن دوشه" ... الكلام ده فى التوكيل المحترم توكيل بيجو وقدام الجميع بما فيهم العملاء!!!

- بدأت أنا كمان أنفعل و صوتى يعلى فماكان منه و أنا بتكلم مع محمد الشرقاوى و كل اللى شغالين فى المركز ملمومين حواليا بنظام الربطاية إنه جه يقولى "أخرج معايا بره المركز" ... الكلام ده فى التوكيل المحترم توكيل بيجو!!!


- بعض العملاء تدخلوا و باعدوا ما بينا و المهندس محمد الشرقاوى طلب منى الدخول معاه للمكتب و بعد كده عملت شكوى تفصيليه باللى حصل فى خدمة العملاء و أخدت عربيتى و مشيت.

- لم يتم إصلاح مشكلة الفرامل الأمامية أو الخلفية عندى, كل اللى عملوه محاولة ترضية خيبانة منهم بتغيير التيل تبع الضمان و برمجة المثبت.

- إتصلت بـ 19207 و قدمت شكوى فى مركز أبو رواش و فى مصطفى البرنس و لم يتم التحقيق فيها و لا الإعتذار عن اللى حصل ... ده التوكيل المحترم توكيل بيجو!!!





















2- ذهابى لمركز غمرة فى يوم 11 / 10 / 2014

العناصر:

2أ) خروج فنى معايا لتجربة العربية بنفسه و تأكيد ما ذكرته من رجرجة العربية و مشيها لمسافة ما بين متر ونص لمترين عند كبس الفرامل على سرعة 20

2ب) عدم كتابة شكوتى بخصوص طريقة عمل الفرامل فى أوردر العمل

2ت) عدم مراجعة سوفتوير العربية للتأكد من عمل كل شئ كما ينبغى

2ث) تقليل أحد مهندسين الإستقبال من شكوتى بخصوص الطقة قدام شمال (الباشا فضلت قاعد و سايبهم شغالين على العربية من 8.30 للساعة 3 و فى الأخر بيقولى و هوا معايا فى العربية لما لقيت الطقة لسه موجودة "هوا انت واخد اليوم كله اجازة و لا إيه!".

التفاصيل:

- بعد اللى حصل فى أبورواش رحت غمرة عشان اراجع على نظام الفرامل عندى بالإضافة لصوت الطقة اللى قدام شمال, و خرج فنى معايا يسوق العربية و خليته يجرب بنفسه سيناريو الفرامل عند 20 و على غير سرعة الـ 20 و للإسف الشديد كان رده إن ده نظام الإيه بى إس و دى طريقة عمل الفرامل, و لما سألت طب على اى سرعة تانية غير الـ 20 ليه مش بتعمل كدا ماكنش فيه أى رد غير إن ده نظام الإيه بى إس, فهمته و رجعت فهمت مهندسين الإستقبال إن ده ممكن يكون بداية لمشكلة أكبر قدام, ماكنش عندهم غير إن الفرامل زى الفل و تمام التمام.

- و طبعاً عشان الكلام يبقى ليه مصداقية عند العميل كل شوية يشغلولى إسطوانة "يا باشا لو فيه مشكلة فى فرامل العربية أو وجود عيب صناعة انا فى صفك و من مصلحتى إنى اغيرلك الحاجات اللى فيها عيب صناعة و ابعتها للشركة الأم فى فرنسا و هيا تبعتلنا تمنها باليورو" و ده نفس اللى إتقالى فى أبورواش.

- وفضل الوضع على ماهوا عليه بالنسبة للفرامل بعد نزولى ليهم مره تانية, ومبقتش عارف هما بيكشفوا على الفرامل و لا بيقولولى كشفنا و هما مكشفوش و لا فيه إيه بالظبط. مع العلم إن كل مره مابيتمش كتابة شكوتى من الفرامل فى شيت العمل.



- بل و وصل الأمر لما حصلت الحادثة و رحتلهم على الساعة 4 بالونش فى عز العاصفة الترابية اللى ضربت مصر يوم 10/فبراير, رفضوا إستلام العربية لما قلت إن سبب الحادثة عدم عمل الفرامل و إتقالى "طالما إنها مشكلة فرامل يبقى مش هانستلمها و خد عربيتك و إمشى", ده المستوى اللى وصل إليه التوكيل المحترم توكيل بيجو. و عشان يستلموا العربية منى كان الحل الوحيد قدامى مجبراً إنهم يدخلوا العربية تحت الإصلاح بدون ذكر شكوتى من الفرامل (و العربية على الونش من أكتوبر لغمرة).

- بعد فترة و نتيجة إنى كنت مش مستريح لكلامهم و إن ده شئ طبيعى فى الفرامل, عملت موضوع هنا على نايل موتورز عشان اخد رأى باقى ملاك العربية قبل ما أنزلهم, لكن للإسف حصلت الحادثة قبل ما أروحلهم.

http://www.nilemotors.net/Nile/454918-301.html



3- تفاصيل الحادثة و ذهابى لمركز غمرة يوم 10/2/2015

- الحادثة حصلت و الحمد لله على طريق جانبى مش على طريق سريع و إلا الله أعلم النتيجة كانت هاتبقى إزاى, لكن من الحوادث اللى بتحصل على الطرق السريعة, غالباً صورتى و صور ناس تانية كانت هاتبقى على صفحات الفيسبوك و الجرايد.

- و انا سايق لقيت سرعتى داخله على 50 كيلو, فما كان منى بسبب طبيعة الطريق اللى إنتم شايفنها فى الصور إلا إنى قولت أهدى شوية و خصوصا إن نص كيلو وابقى على الطريق الخارجى, و فى نفس اللحظة اللى بهدى فيها العربية حدفت من نفسها شمال بإتجاه سور على شمالى, لميت العربية يمين و كبست فرامل عشان اقف لكن للإسف العربية فضلت ماشية بيا حوالى 4 لغاية ماطلعت على الصخور اللى إنتم شايفنها فى الصور و الكاوتشات بقت فى الهوا و الصخور مسكت العربية من تحت (وده من ستر ربنا و إلا العربية كانت هاتكمل و تنزل بيا لتحت فى أرض المبانى).

* ملاحظة: فى الوقت - اللى لا يتعدى ثانية - اللى أدركت إن الفرامل مش شغالة حاولت إنى ألم العربية تانى شمال بس كنت طلعت فوق الصخور و يمكن المحاولة دى من الأسباب اللى ربنا كتبها عشان ماأسقطش بالعربية من فوق لزيادة إحتكاك الكاوتش بالصخور, و الطريق زى ما إنتم شايفين مافيش مساحة للمحاولات المتكررة و المناورة.

* ملاحظة هامة جداً: الحساس اللى فى مقدمة العربية سجل إصطدامه على سرعة 45 كيلو, و ده بيأكد كلامى إن الفرامل ماشتغلتش و بيأكد كلامى إنى كنت ماشى على سرعة لا تزيد عن الـ 50 كيلو, و بصوا على الصورة من الجانب الشمال هاتلاقوا إن أول صخرة ضربت فيها العربية هيا الصخرة الأخيرة عند الحافة و هيا نفس الصخرة اللى عشقت مع القايم بتاع العربية.

- إتصلت بونش و نقلنا العربية لغمرة من أكتوبر, وفى الأول كان فيه ترحيب بيا و إبتسامات و لا كإنى عريس و داخل على الكوشة (حادثة بقى و هانعكم منه كام باكو) و لما سألنى مهندس الإستقبال عن سبب الحادثة و قولتله الفرامل مشتغلتش و دخلت فى صخور, طبعاً سابنى و مشى, وجه واحد تانى يقولى حصل إيه, قولتله نفس الكلام, قالى يبقى تاخد العربية و تمشى مش هانستقبلها, طبعاً إنفعلت و قولتله طب انا عايز اقابل مدير المركز, قالى انا مدير المركز ومش هانستقبل العربية. المهندس محمد مجدى كان هناك و تدخل و حكيتله اللى حصل و تم إستقبال العربية, بس برضه بدون كتابة شكوتى من عدم عمل الفرامل.

- طبعاً مكنش قدامى بديل تانى, أنا جاى من أكتوبر و العاصفة الرملية على اشدها و مش هاقدر ارجع بالعربية و مش عارف هارجع بيها على فين, فتم فرض الأمر الواقع عليا ... توكيل بيجو بقى!!

- رحتلهم يوم الأحد الموافق 15/10/2015 أشوف إيه مجريات الأمور و كان يوم طويل و مايعلم بيه إلا ربنا, من الساعة 8.30 صباحاً لغاية الساعة 4.30 بيبدلوا عليا واحد ورا التانى بإستخدام كل أساليب فرض الرأى و بإستخدام كلام لا يمت للمنطق بصلة و بفرضيات عجيبة زى ما هاتقرأوا.

1- فضلوا على مدار ساعات عايزين يقنعونى بإن الكاوتش الشمال فرقع, و إن ده سبب حدفة العربية, و طبعاً أنا متأكد إن قطعة الكاوتش اللى حوالى 10 سم من الصخور اللى بسبب عدم عمل الفرامل دخلت فيها و خصوصاً إنى أنا و الناس اللى واقفين فى الشارع مسمعناش صوت فرقعة كاوتش. و فضلوا يقولولى إحنا 4 مهندسين و رأينا النهائى إنك كنت ماشى على سرعة أعلى من 90ك و لما جيت تضغط فرامل الكاوتش الشمال فرقع و عشان كدا حصلت الحدفة و الدليل على كدا كمان, إن الكاوتش اليمين مش مقطوع ... كان ردى عليهم لدحض النظرية الخطأ دى إن الكاوتشات الميشلان مقاس 16 بتجيب بالونه لو أكلت مطب أو حفرة على سرعة 50 فمابالك بدخول الكاوتشات فى صخور, أما بقى ليه الكاوتش اليمين سليم, برضه نفس السؤال ليه لما فردة بتجيب بالونه لما تاكل مطب الفردة التانية مش شرط إنها تجيب بالونه؟!

2- طبعاً بما إنى متأكد 100% إنى سرعتى لما قربت من الخمسين قلت أهدى عشان الطريق مش قد كدا و بما إنى و الناس اللى وقفين مسمعناش كاوتش بيفرقع فمن المؤكد إن نظرياتهم دى أى محاولة لإلقاء المسؤلية عليا, و مش دى المصيبة, المصيبة إنهم عايزينى أرجع أركب العربية تانى بنفس الفرامل عشان المره الجايه الاقى نفسى أنا و أسرتى تحت مقطورة ... لا حول و لا قوة إلا بالله.

3- أصريت على موقفى, فقالولى نروح للمهندس حسين مسؤل خدمة ما بعد البيع فى صلاح سالم, الساعة كانت تقريباً واحده و نص و فضلت قاعد منتظر عشان نروح لغاية حوالى 3.30 او 4:00





4- ذهابى إلى صلاح سالم لمقابلة المهندس حسين مسؤل خدمة ما بعد البيع

4أ- و بالفعل رحنا و فضلت مستنى المهندس حسين حوالى ساعة لغاية ماخلص الإجتماع اللى كان فيه و قالى إحكيلى بقى إيه اللى حصل.

4ب- لسه بحكيله وجهة نظرى عن السبب المحتمل عن الحدفة و قبل ما أوصل لأهم نقطة فى الموضوع و هوا إن الفرامل مشتغلتش بعد الحدفة,و فضلت ماشية حوالى 4 متر و على سرعة اقل من 50 و العربية طلعت بنفس سرعتها على الصخور (زى الحساس الأمامى ما سجل) و انا بحاول بإستماته المها تانى شمال لإنى شايف فراغ لتحت و قدام, و اللى وقف العربية زى ما إنتم شايفين الصخور الجامدة اللى عشقت من تحت فى القوائم بتاعة العربية. و كل ده و انا كابس فرامل, ما كنت ركبت عربية صينى أحسن و وفرت فى جيبى 60000 فرق, و يبقى ساعتها عارف انا راكب ايه و متوقع إيه, لكن اركب فرنساوى عشان ابقى مطمئن ليها من ناحية الأمان فالاقى الفرامل ماتشتغلش, و أقول توكيل لشركة اوروبى يبقى ناس ملتزمة الاقيهم بيتطاولوا على العملاء و مش هامهم حياة الناس اللى راكبين عربيتهم و لا حياة الناس اللى على الطريق!!!

* أرجو إن الأخوة الكرام ملاك العربيات الصينى مايخدوش كلامى بإهانه, و الله مش قصدى إهانة, بس على حسب ما إتقالى من بعض ملاكها إن للإسف لغاية دلوقتى مستوى جودتها محتاج تحسين أكتر.

4ت- طبعاً الإستاذ حسين قاطعنى و انا بقوله وجهة نظرى و رفضها و قالى لو الفرامل قفلت على فرده و فرده لأ كان زمان عربيتك إتقلبت بيك و العربية لفت حوالين نفسها, وضحتله إنى كنت بهدى مش بكبس فرامل و سرعتى مش عالية و داخله على الخمسين, و سألته طب إيه وجهة نظرك؟ قالى نظريتك غلط و نظريتهم فى مركز غمرة برضه غلط (اللى هيا نظرية إنفجار الكاوتش) لإن إنفجار الكاوتش مش هايخلى العربية تحدف شمال (مبدئياً الحمد لله, وشهد شاهد من أهلها بعد 7 ساعات محاولة لغسيل المخ فى غمرة).

4ث- طيب نظريتك إيه يا بشمهندس حسين؟ قالى إن بيضة المقص المسؤلة عن توجية العجل ممكن يكون حصل فيها مشكلة (وده برضة مايجاوبش ليه الفرامل ما إشتغلتش ووقفت العربية بعد ما لمتها), فقام متصل بمحمد مجدى فى غمرة و سأله عنها, ورجع بلغنى إنها تالفة نتيجة الخبطة فى الصخور ... وبكدا تم رفض كل النظريات بدون إبداء نظرية بديلة ... وبكدا وصلنا لحارة سد.

4ج- سألنى فين المقايسة, قلتله و الله من الصبح و انا معاهم فى غمرة و لسه مجهزتش لغاية ماجيت على هنا, و العربية عندهم من 5 ايام.

4ح- سألنى المهندس حسين فين شيت العمل اللى إنت مكتوب فيه إنك إشتكيت من الفرامل, فحكيتله اللى حصل معايا فى أبورواش و خناقهم معايا عشان أصريت على كتابة شكوتى فى شيت العمل و برضه رفضوا إنهم يكتبوها, و قلتله إن برضه مابيكتبوهاش فى غمرة وصولاً لرفض إستقبال عربيتى بعد الحادثة لما طلبت يتكتب فى شيت العمل إن الفرامل مشتغلتش, يبقى هاجيب منين صورة شيت عمل فيها شكوتى من الفرامل؟!!! و تقدر تنزل بنفسك و تسأل المهندسين هناك و تتصل بـ 19207 بخصوص شكوتى و تسأل عن الشكوى الكتابية اللى قدمتها هناك فى أبورواش لخدمة العملاء و عندى شهود حضروا و سمعوا بنفسهم كل الكلام اللى انا بقوله ده.

4خ- المهندس حسين اخد نمرة تليفونى و إدانى كلمته إنه هاينزل بنفسه يشوف العربية و يشوف إيه اللى حصل و يتصل بيا ... الكلام ده كان يوم 15 من الشهر الحالى و لغاية النهاردة مسمعتش منه.


ختاماً:

بما إن المهندس حسين فى أول بداية اللقاء بيقولى عربيتك مافيهاش اى عيوب صناعة او مشكلة فبإمكانك إنك تلجأ للجهات اللى عايز تلجأ ليها. و عدى إسبوع على لقاءنا بدون إتصال منه أو من شركة بيجو, يبقى محاولة حل المشكلة بصورة ودية خلصت و مافيش غير اللجوء للقانون و للرأى العام للوقوف ضد جشع التوكيلات و الوقوف ضد إستهتارهم بحياة الناس و إسترخاصهم ليها, حياتنا و حياة أسرنا مش رخيصة و لا لعبة. و فى الوقت اللى ربنا إدانا فرصة بدون خسائر فى الأرواح عشان نصلح الخطأ, هما شايفنها فرصة عشان يكسبوا كام الف جنيه زيادة.

بإذن الله تعالى هاتخذ ضد شركة بيجو - و بيمثلها فى مصر شركة سى دى سى - كل ما يمكنى من إجراءات للدفاع عن حقى و إثبات حقى, و بالرغم من إن المشوار هايكون طويل و مرهق, لكن بإذن الله مافيش مجال للتراجع طالما وصلت بيهم الدرجة إنهم يستخفوا بحياتى و حياة الناس.



* كل المعلومات اللى أنا قمت بذكرها فوق موثقة بشهادة شهود من موظفين فى التوكيل و عملاء و أخواتى و غيرهم.

** أنا مش مأمن على عربيتى, لإنى بعتبر التأمين فى وجهة نظرى وسيلة قد تدفع بعض الناس للإهمال و التهور فى السواقة و التنازل عن حقهم عند التوكيلات على إساس إن فيه حد هايغطى عليهم و يتحمل مسؤلية خطأهم.

*** للإسف فعلاً أصبح التأمين وسيلة ضغط من التوكيلات على العملاء للتنازل عن حقهم فى معرفة سبب عدم عمل الفرامل, لإن التوكيلات بتقنع العملاء إنهم يشيلوا التأمين الليلة بدل مايدخلوا فى مصادمات معاهم و يفضلوا من غير عربيتهم لشهور.

مطالبى:

1- إصدار تقرير شامل بالوضع الحالى لسيارتى و توضيح سبب حدوث الأعطال فى وحدة الفرامل مما إدى لإنحراف عربيتى و عدم توقفها بعد ذلك رغم إنى كنت كابس فرامل على سرعة منخفضة.

2- شهادة من التوكيل تفيد مطابقة فرامل سيارتى للمواصفات القياسية بما ينص عليها القانون.

3- تقديم إعتذار عما بدر من موظفيهم فى أبو رواش عند طلب إثبات شكوتى من الفرامل فى شيت العمل, وعما بدر من موظفين الإستقبال فى غمرة بعد الحادثة و رفضهم إستقبال العربية فى حالة إصرارى على إثبات سبب الحادثة - عدم عمل فرامل السيارة - فى شيت إستقبال العربية.

للمرة التانية بكرر إعتذارى عن طول الموضوع و شاكر ليكم جميعاً قرائته و مساندتكم, و إن شاء الله هاضيف هنا أخر تطورات الموقف.

إتصلت بالتوكيل و النتيجة:

1- المقايسة عامله 57964.5 جنيه على ان يتم دفع نصهم قبل عمل الإصلاح.

2- الدعم الفنى للشركة بيقول إن العربية حصلت على سرعة عالية (رغم إن الحساس الأمامى مسجل الخبطة على 45 كيلو) و الشركة غير مسؤلة عن إصلاح العربية. و فى المكالمة اللى بعديها قالولى مافيش حد يقدر يقول إنت كنت ماشى على سرعة كام غيرك إنت.

3- لما طلبت شهادة بحالة الفرامل و مطابقتها للمواصفات القياسية اللى بينص عليها القانون إتقالى مافيش حاجه زى كدا, و لما إستشهدت بواقعة نيسان إتقالى إن الفرامل مالهاش قياس (و ده المختصر بعد حوالى 25 دقيقة كلام لمحاولة إقناعى إن مافيش شهادة زى دى).

4- بيقولولى إن كمبيوتر العربية بيقول إن مافيش تسجيل لإيرور (خطأ) و بكدا الشركة غير ملزمة بتحمل مصاريف الإصلاح.

5- بلغتهم إنى هالجأ لجهاز حماية المستهلك و هما يشوفوا الإجراءات المتبعة فى المواقف اللى زى دى (و ليهم خبرة مع موقف نيسان و رفضه لتقديم الشهادة) و أنا متمسك بكل كلمة قلتها و الحمد لله الحساس الأمامى سجل الخبطة قبل وقوف العربية على سرعة 45 و ده بيأكد على كلامى.