المشاركة الأصلية كتبت بواسطة م/أحمد عبد الفتاح
لمبة الـ GEN دى معناها ان الدينامو بعافية شوية - اول حاجه حتنضف قواطيش وصوابع البطارية كويس وبعدين تنضف ترامل الدينامو( أطراف الدينامو) وتشوف شد السير مشدود كويس ولا لأ وتظبطه وبعدين تركب كل حاجه لو اللمبة طفت يبقى خلاص يادار مادخلك شر ولو فضلت منورة يبقى تدور العربية وتقيس على البطارية بالفولتميتر موجب وسالب وانت دايس بنزين نص دوسة وتشوف الفولتميتر قرا كام - لو قرا ١٤ وكسور يبقى الدينامو كده تمام ولو قرا أقل من ١٣,٨ يبقى الدينامو فيه مشكلة تفكه وتشوف عاوز دايودات (ريكتفير) ولا عاوز يتغير.
تانى حاجة لمبة الـ security المفروض على ما أعتقد لو عندك باب مفتوح تنور فممكن تكون اللمبة فى التابلوة محروقة أو تراجع على الفيوزات .
لمبة الـ abs أعتقد ان الموديل ده فيه abs لان الـ abs موجود من قبل كده اعتقد من سنة ٨٩ - روح لميكانيكى بيفهم فى الجيب يكشف عليه ويشوف المشكلة فين سنسور ولا إيه الحكاية.
بالنسبة للمبة فرامل اليد اكشف على مستوى زيت الفرامل فى علبة زيت الفرامل اللى على الماستر العمومى لو ناقص كمله - لو طفت يبقى يادار مادخلك شر :) ولو فضلت منورة اكشف على التيل الامامى والخلفى يمكن يكون خلاص جاب اخره.
لمبة البيت الخشب دى بقى مش عارف بصراحة بس ممكن تكون خاصة بحاجه بتحصل ساعات اسمها limb home ودى لو حصل مشكلة فى الفتيس بتخلى العربية تمشى بالراحة وماتنقلش اكتر من التانى علشان بس توصلك البيت او لمركز الصيانة - والله اعلم