من اسبوع او اكتر عرضت عربيتي للبيع و عملتلها اعلان , و طبيعي عشان وجع الدماغ جبت خط و حطيته في تليفون قديم عشان اعرف اقفل التليفون في اوقات اللي مش عاوز تليفونات الخ ..... ( معلومات ملهاش لازمة )
المهم يوم الجمعة اللي فات جالي واحد محترم جدا , اتفرج علي العربية .... هنرجع للمعلومات اللي ملهاش لازمة ( قابلته في مكان بعيد عن منزلي )
انا في الاعلان حطيت سعر عالي حبتين و اول ما الراجل جه واتفرج علي العربية و لسه هيتكل علي الفلوس قلت له علي السعر اللي انا عاوزة في العربية .. فضحك و قالي مش هفاصل معاك
المهم
... اتفقنا ان احنا نتقابل السبت و نخلص باقي الاجراءات و لو مش السبت يبقي الاحد و ما بينا تليفونات لحد كدة و كله تمام ....
طب فين المشكلة .... المشكلة ان الاخ اصر انه يديني مبلغ 2000 جنيه ( ربط كلام ) و فات سبت و احد و اثنين و احنا التهاردة الثلاثاء و تليفونه مقفول ... و انا محتاس و اللي بيكلمني بيسأل هي العربية موجودة برد اقوله تقريبا ... و اللي بيشوفها بقوله علي الموضوع و اقوله ان انا مقدرش ابيع الا لما اشوف الاخ اللي دفع 2000 جنيه
الجدير بالذكر ان الموضوع ده حصل مع صديق لي من فترة طويلة و كانت نصيحته لي استني اسبوع و اعرض العربية تاني و اخلي معايا في البيت مبلغ 2000 جنيه عشان لو الراجل اتصل
طيب افرض استنيت اسبوع و بعت العربية و في نفس اليوم جالي الراجل و عاوز يكمل الشراء ... انا هيبقي منظري ايه .... خصوصا انه اداني 2000 جنيه بدون وصل ولا عقد ابتدائي و لا حتي شهود
ملحوظة رقم 1 - مش متاكد من اسمه هو احمد بس ايه مش عارف
ملحوظة رقم 2- ابتديت اشك ان الرقم اللي انا بتصل بيه مش هو رقمه لاني محفظتش رقمه علي التليفون و طبعا فيه ارقام كتيرة علي الموبايل لناس اتصلت عشان العربية و فيه احتمال اني اتلخبط
طبعا انا غلطان اني مكنتش بركز مع اسماء الناس اللي جت او اتصلت علي اعتبار ان هم اللي محتاجين لي مش انا اللي محتاجلهم
انا اعمل ايه بقي دلوقتي ؟؟؟؟؟؟
اللي باع عربية قبل كدة هيعرف قيمة مشتري قمة في الادب و الذوق و هيقدر عذاب الضمير اللي انا فيه بسبب الانسان المحترم ده