تقرير 9000 كيلو - قشقاي 2015 و اول مشكله:)
السلام عليكم :
الكل عنده تساؤلات عن العربيه و بإختصار هوضح اهم النقاط :
و اهم حاجه الناس عاوزه تعرفها هو اداء العربيه مع البنزين 92 احب اقول انه ممتاز بدون اي مشاكل حتي الان .
سحب العربيه ممتاز . تسارع ممتاز
استهلاك البنزين حوالي 10 ليتر لكل 100 كيلو
ثبات العربيه : انا مشيت بيها لحد 180 و 190 . فعلا ثبات ممتاز و تحكم كامل في العربيه و الفرامل .
الحمد لله مفيش مشاكل ظهرت غير مشكله واحده و هي اني في مره اتحركت بالعربيه مسافه حوالي 4 كيلو و بعد كده ركنت لمده 30 دقيقه و جيت ادورها مادرتش و طلعلي تحذير علي الشاشه انوا مستوي زيت الموتور منخفض و مينفعش ادور العربيه ( الكمبيوتر بتاع العربيه مرديش يخليها تدور ) شوفت مقياس الزيت لقيتوه مظبوط و العربيه مردتش تدور تاني اليوم ده و سبتها مكان معطلت لتاني يوم بعدين جيت اجرب ادورها راحت دارت تمام بدون اي مشاكل و بدون ظهور اي مشاكل علي الشاشه . نفس اليوم وديتها التوكيل ( اوتو ايجيبت ابو رواش ) بصو علي الزيت لقوه تمام . وصلها بالكمبيوتر لقاها مطلعه ايرورز كتيير قولته ايه الايرورز المهندس قالي الايرورز دي لو واحد منها صح العربيه مش هتتحرك فكان تقيموا للموقف ان كمبيوتر العربيه مهيس . اخدوا العربيه و خرجوا بيها جربوها و وصلوها تاني بالكمبيوتر و عملوا ريست للكمبيوتر بتاع العربيه و الايرورز اختفت . مشيت بالعربيه بعدها حوالي 1500 كيلو بدون ظهور المشكله تاني الحمد لله .
غير كده بجد العربيه تمام و مع بنزين 92 تمام . اللي بيفكر فيها يتوكل علي الله
لان مشكله زي تهييس الكمبيوتر اعتقد انها ممكن تحصل في اي عربيه فيها تكنولوجيا عاليه . و مستني رأيكم برضوا في الموضوع ده .
