وضع حد لموضوع فتيس الdsg

**memo_p910** · 20-03-2015 06:38 PM

المشاركة الأصلية كتبت بواسطة ahmzd

أنا أعتقد إن مشاكل الفتيس قلت بدرجة كبيرة فعلا في السنتين تلاتة الأخرانيين.. بس بصراحة برضه ( وأنا بأتكلم عن نفسي بالدرجة الأولى ) أخاف أدفع مبلغ ضخم جدا زي ده علشان أعيش في قلق ووساوس مدة استخدامي للعربية ( اللي في المعتاد بالنسبة لي مابتقلش عن 5 سنين ) .. وبعدين فعلا تصرفات وكلاء شركات مجموعة فولكس - على الأقل عندنا في مصر - تقلق!! يا إما يديلك ضمان قليل جدا ( سنتين بس ) مقارنة بغيره ( 3 سنين غالبا و 5 سنين أحيانا ) !! يا إما يستبدل الفتيس ال dsg ده بعد ما ينزله بشهور قليلة ومبيعاته تقع؛ بفتيس قدييييييييييييم علشان يبيع؛ زي ما عملت سكودا في الأوكتافيا الجديدة!! يا إما مابيديش ضمان مدى الحياة على الفتيس ( أو على الأقل مش واضح كفاية في الحتة دي ) زي توكيل سيات !! طيب إحنا كمستهلكين نطمئن إزاي في جو زي كده؟! أنا أفضّل أشتري عربية بمتعة سواقة أقل بس تمت تجربتها بأمان وتم الاطمئنان ليها على مدار سنوات .. هذا رأيي والله أعلم.

فعلا مندوب المبيعات بتاعهم كلامه عايم لما تيجي تكلمه في نقطة الضمان على الفتيس
كمان التوليدو الجديده نزلوها بفتيس 6 نقلات اوتوماتيك تقليدي وليس dsg يعني بدأوا يرجعوا للقديم

**mnashat77** · 22-03-2015 10:37 PM

dsg اكيد فتيس عبقري
بس انا بصراحه مقدرش ان ادفع ميلغ كبير كده واكون سايق العربيه قلقان
بالتوفيق للجميع

**محمودالسيسي** · 22-03-2015 10:58 PM

حد شاف سكودا سوبيرب 2015 الجديدة اعلنو عنها في معرض جنيف 2015 من اسبوعين انها تحفة فنية ابحثوا عنا وانتم تغيروا رأيكم في الاوكتافيا فورا وتتمنوا نزولها مصرنا الحبيبة قرأت
بعض المعلومات عنها انها بتنزل بال Dsg
وبتنزل مانيوال وموتور 1400cc و 1600 cc
افيدونا هل هدا كلام صحيح وهل التوكيل بينزلها مصر ولا لا
انا شخصيا لن لم افكر فى اى سيارة بها هذا الفتيس المرعب

**ahmed.Elashy** · 23-03-2015 09:37 AM

المشاركة الأصلية كتبت بواسطة محمودالسيسي

حد شاف سكودا سوبيرب 2015 الجديدة اعلنو عنها في معرض جنيف 2015 من اسبوعين انها تحفة فنية ابحثوا عنا وانتم تغيروا رأيكم في الاوكتافيا فورا وتتمنوا نزولها مصرنا الحبيبة قرأت
بعض المعلومات عنها انها بتنزل بال dsg
وبتنزل مانيوال وموتور 1400cc و 1600 cc
افيدونا هل هدا كلام صحيح وهل التوكيل بينزلها مصر ولا لا
انا شخصيا لن لم افكر فى اى سيارة بها هذا الفتيس المرعب

العربيه دي شفتها كذا مره ف القاهره وهيا تقريبا بتيجي بالطلب او بييجي منها عدد قليل بس الشكل القديم احسن بكتير

**TeMoON** · 23-03-2015 03:02 PM

الاخوة الاعضاء الى بيتكلمو عن الفتيس وان مشاكلة اتحلت اسمحولى اقولكم الاتى :
شركة فولكس دخلت بالفتيس دا نقطة ال لاااا رجوع يعنى ماينفعش انها ترجع تانى فى كلامها وتقول انة فية عيوب وهنوقف انتاجة هما مايقدروش يعملو كدا لان اسمهم هيقع فى العالم فا الشركة بتعمل محاولات انها تصلح الفتيس وتطمن الناس بالضمان مدى الحياة وبطريقة السواقة الخاصة بتاعتة الا وهى المانيوال

بالنسبة لمصر وزحمتها وطرقها وطريقة السواقة فيها هتجيب اجدع فتيس فى الارض لان ظروف القيادة عندنا لا تسمح للفتيس dsg انة يمشى وياخد حريتة فى الحركة والنقل والتجميع

وغير كدا العربية فى مصر عاملة زى البيت الوقف يعنى انت بتشترى العربية تعد معاك مش اقل من 5 سنين عشان تغيرها نظرا لسعرها الغالى جدا جدا جدا وفى مصر العربية بتمشى سنة واحدة بتمام مشى 10 سنين برة مصر وبالاخص اوروبا فا الفتيس هو تكنولوجى حلو بس فى مصر فاشل

الاخوة الى بتقول ان مشاكلة انتهت وانة اتصلح الكلام دا لا يوجد بة اثبات من الصحة لان العربية لسة جديدة فا مش هتظهر مشاكلها مش قبل سنة من الاستخدام فا محدش يفتى ويقول انها اتحلت وكلام التوكيلات او مندوبين المبيعات انهم عاوزين يبيعو وخلاص انت اشتريت لبست او مالبستش انت وحظك انما هو حقق تارجت البيع

انما انا راى الشخصى فى الفتيس دا انة فاشل وتكنولوجى لا تصلح فى مصر بسبب كل حاجة غلط فى طرقنا وسلوكنا ومشينا بالعربية على الطرق المصرية
انما برة مصر هو كويس جدا واحسن من مصر بس بردو المشاكل بتظهر في بعض الدول الاخرى
واسف للاطالة

**mario_9111** · 24-03-2015 01:02 AM

انا متفق معاك في الراي وعلى فكره الفتيس dsg, في العادي بتاعه طقم الدبرياج بيبوظ مالايزيد عن 30 الف كيلو ودا من كتره المشاكل الي قرأتها عليه وطقم الدبرياج بحوالي 7000 اصلي على حسب ماقرات في احد الموضوعات بيكون الفتيس ده خراب بيوت

**mario_9111** · 24-03-2015 01:10 AM

يا جماعه للناس الي بتقول الفتيس دا جديد دا نازل في الباسات من 2009 ودا مستحيل ينفع في مصر علشان احنا بنوقف اكتر مابنمشي 'بيحصل تاكل لمكونات الفتيس بسرعه انا كان معايا كورولا 2008 فتيس mmt وهوه نفس الفكره بس بتاع الفولكس ضبل او مذدوج 2 فتيس مانيوال مع بعض واحد سرعات فرديه والتاني زوجيه اما تويوتا مجموعه واحده