الموضوع: ■ليه تركب جيب؟ (للمناقشه)■

المشاركة الأصلية كتبت بواسطة ahmed_eng2001

ربنا يباركلك فى عربيتك ...

متفق معاك فى ان العربيات العالية .. ليها طابع خاص .. و الى بيحبها ... ياخدها كدة على بعضها .. حلوها و مرها
فيه ناس كتير بتسأل عن الجيب و هى مقدمة رجل و مأخرة رجل ..... و تسأل عن استهلاك البنزين ... اسعار قطع الغيار ... طيب ممكن نركب غاز طبيعى ؟!! ... طيب ممكن نركب كربراتير اصغر ؟!! و الكثير من الاسئلة التى تبين قلق السائل و عدم اقتناعه التام بالجيب

و اختلف مع حضرتك فى باقى ما ذكرته ....

الناحية الاقتصادية ...
استهلاك البنزين ... اكتر من الى حضرتك ذكرته .... ( بالنسبة لتجربتى و مشوارى )
انا معايا لانسر 1300 .. و بليزر 5700 ... البليزر بتستهلك اد اللانسر 3 مرات فى الفلوس ... و كنت بحط للبليزر بنزين 80 و لللانسر 92 ... تقريبا البليزر كان بتستهلك فى الاسبوع 160 جنيه بنزين 80 .. و اللانسر 50 جنيه بنزين 92
فالفرق فى الاسبوع تقريبا زى ما حضرتك ذكرتك .... و لكن ... ساعات كتير مش بلاقى بنزين 80 ...فبجط 92 ... مش بحب احسب الفرق ساعتها علشان متعقدش

قطع الغيار ....
بغير 8 بوجيهات بدلا من 4 بوجيهات

الصيانة الدورية ....
بزود زيت كارونتين و فتيسين ... فى حين ان اللانسر زيت الفتيس فقط
بشحم العربية و فيها 6 صلايب + 2 بيض العجل +مشرشر كردان الغرز + دواسة الدبرياج

المصنعية بتكون تقريبا مرة و نصف اى عربية تانية ... و ده فى اقل الاحوال

اما عن ناحية القوة فى السواقة ....

ما ذكرته حضرتك كعنصر امان ضد اخطاء الغير صحيح تماما .... بس اخطاء حضرتك ضد الغير اخبارها ايه ؟؟!!!!!

غلطت مرة و انحرفت قليلا و لم انظر فى المراية و انا بلف يمين ..... خبطت فى باب عربية شاهين ... كسرت الاكرة و الزجاج و المراية ده غير سمكرة الباب ... و الموضوع كلفنى 400 جنيه تقريبا من حوالى 4 سنوات

العربية اتحركت بعد ما ركنتها بساعتين تقريبا ( و هى راكنة تحت البيت ) ... علشان نسيت اشد فرامل اليد او اعشقها و مشيت لوحدها فى الشارع حوالى 30 متر .. و الحمد لله انى كنت كاسر الدركسيون شوية يمين ... طلعت فوق رصيف جراننا ... و وقفت قبل سور منزلهم ب 20 سم ... الحمد لله ان مفيش عيل صغير كان بيلعب فى الشارع ساعتها ... كان زمانى فى السجن

واحد بيعدى الشارع و لما وصل لنصفه .. قرر انه يرجع الشارع تانى بضهره و هو مغمض عينيه ... علشان شوية هواء بتراب دخلوا فى عينيه ... طب ده تقلوا ايه ؟؟!!!!! فرملت و حدفت شمال ... و ربنا كرمنى انا ... و يادوب فاديته

و حاجات من دى كتير و ربك هو الحافظ ... انا عاوز اقول لحضرتك ان الحجم الكبير ساعات بيكون نقمة كبيرة ... مش نعمة


الطلوع على الرصيف ....

فى اغلب الاحوال اجد ان دى حاجة مش كويسة ....
لو عربية نيسان خبطت فى عربية تانية ... او الكاوتش انفجر و حدفت جامد على الرصيف .... الرصيف معمول علشان يوقف اندفاع العربية ( المفروض انه يوقفها )
فى العربيات العالية ... ممكن تعدى الرصيف ده بسهولة و تكون فى مواجهة العربيات الى فى الاتجاه الاخر ... و انت و نصيبك

فى اكثر من حالة ... اجد بعض سيارات الرانجلر تحديدا .... بيعدوا الجزيرة الى فى منتصف الطريق لتغير الاتجاه .. و بالطبع عطلة و وقفة للسيارات فى الاتجاهين

عدم النظر فى المراية .....
جرب حضرتك ان تريلا ترمى عليك و هو مش باصص فى مرايته ...و يكسر لك المراية.... حتعرف شعور اى واحد بيسوق عربيته و حد تانى يرمى عليه ... انا مش بحب حد يدعى عليا او يحسبن ربنا فيا

من المناظر الى مش حنساها حادثة على الدائرى ... عربية رانجلر داخلة فى صندوق عربية جامبو من الخلف
الوش و الكشافات و الردياتير و غطاء الكبوت بايظين ... و الله اعلم بالى حصل جوة الموتور

متزعلش من كلامى ... ربنا يباركلك فى عربيتك و يسترها معانا جميعا

ولاه يهمك يافندم مفيش زعل كلنا هنا عشان نستفاد من بعض
بنسبه لموضوع الفرق دة انا ذكرتو على نفسى عشان انا بطبعتى مش بتحرك كتير يمكن بعمل فى الشهر 1000 كيلو فافرق البنزين دى انا حاسبها مظبوط معى
وما انصحش حد بالعربيه دى اذا كان بيتحرك كتير
وبعدين حضرتك بتتكلم على 5700 زاى تكنولوجيا قديمه اكيد سفاحا بنزين
كل سنه بيتم التطوير فى الماتوير من اجل تخفيض استهلاك البنزين
انا كان معايا رنجلر 2011 وبعتها وبعديها اشتريت رنجلر 2012
تم تعديل الماتور والفتيس والاستهلاك قل بدرجه 25 فى الميه
معا انى ارى ان العربيه دى موجها لفئه معينه من الناس انو بيطلب متطلبات خاصه من العربيه وبيحط استهلاك البنزين بعد كدة فى الحسبه
العربيه ياسيدى الفاضل دلوقتى تقريبا بالترخيص بالتامين وصلت ل 360 الف
لو كانت الناس بتحسبها زاى ما حضرتك حسبتها كان سعر العربيه نزل الارض اول ما البنزين غلى انما العكس العربيه سعرها ارتفع من ظل سنيتن اكتر من 100 الف
المهم زاى ما كان قال استاذنا الكبير م. احمد عبد الفتاح
لازم تتنزال عن حاجات مقابل حاجات
وبعدين انا ظل ارتفاع الاسعار الغريب الى انا شايفو الكورى وصل ل250 الف مستريح
ومالبك بالجيب معروفه انها عربيه ذات هيبه من زمان
اما بنسبه للصيانه انا كان معايا للتنترا 2012 وبى ام دبليو 2011
وكنت بعمل صيانتهم وتقريبا نفس الاسعار ومش عايز اقول الجيب ارخص عشان مبقاش ببالغ
هو الى ممكن يكون ذياده فيها موضوع تغير زيوت الكارونه الاماميه والخلفيه
الصراحه انا معرفش نوع عربيتك ايه بليزر انا اول مره اسمع عنها لكن على العموم خلينى اتفق معاك فى حاجه كل ما العربيه بتقدم فى الماوتير الكبيره مصاريف تشغلها بيكون اكبر يعنى الكلام دة بينطبق على الى قبل موديل 90
دى نقطه النقطه التانيه بتاعيت الاخطاء
حضرتك فهمتنى غلط انا مش ماشى بالعربيه ادوس على الناس وانط فوق الارصفه ماهما كان انا راكب عربيه سعرها مرتفع وبخاف عليها
انا كان قصدى ان العربيه لو طلبت منها اى حاجه فى وقت زنقه مش هتقول لا
بنسبه لموضوع الاخطاء الشخصيه زاى موضوع حضرتك انك نسيت تعشق العربيه
الموضوع دة مالوش علاقه بنوع العربيه لو راكب 128 ونسيت تعشقها هتتحرك وممكن تموت بردو طفل لو قدمها

المشاركة الأصلية كتبت بواسطة Hussein_Ramdan

ولاه يهمك يافندم مفيش زعل كلنا هنا عشان نستفاد من بعض
بنسبه لموضوع الفرق دة انا ذكرتو على نفسى عشان انا بطبعتى مش بتحرك كتير يمكن بعمل فى الشهر 1000 كيلو فافرق البنزين دى انا حاسبها مظبوط معى
وما انصحش حد بالعربيه دى اذا كان بيتحرك كتير
وبعدين حضرتك بتتكلم على 5700 زاى تكنولوجيا قديمه اكيد سفاحا بنزين
كل سنه بيتم التطوير فى الماتوير من اجل تخفيض استهلاك البنزين
انا كان معايا رنجلر 2011 وبعتها وبعديها اشتريت رنجلر 2012
تم تعديل الماتور والفتيس والاستهلاك قل بدرجه 25 فى الميه
معا انى ارى ان العربيه دى موجها لفئه معينه من الناس انو بيطلب متطلبات خاصه من العربيه وبيحط استهلاك البنزين بعد كدة فى الحسبه
العربيه ياسيدى الفاضل دلوقتى تقريبا بالترخيص بالتامين وصلت ل 360 الف
لو كانت الناس بتحسبها زاى ما حضرتك حسبتها كان سعر العربيه نزل الارض اول ما البنزين غلى انما العكس العربيه سعرها ارتفع من ظل سنيتن اكتر من 100 الف
المهم زاى ما كان قال استاذنا الكبير م. احمد عبد الفتاح
لازم تتنزال عن حاجات مقابل حاجات
وبعدين انا ظل ارتفاع الاسعار الغريب الى انا شايفو الكورى وصل ل250 الف مستريح
ومالبك بالجيب معروفه انها عربيه ذات هيبه من زمان
اما بنسبه للصيانه انا كان معايا للتنترا 2012 وبى ام دبليو 2011
وكنت بعمل صيانتهم وتقريبا نفس الاسعار ومش عايز اقول الجيب ارخص عشان مبقاش ببالغ
هو الى ممكن يكون ذياده فيها موضوع تغير زيوت الكارونه الاماميه والخلفيه
الصراحه انا معرفش نوع عربيتك ايه بليزر انا اول مره اسمع عنها لكن على العموم خلينى اتفق معاك فى حاجه كل ما العربيه بتقدم فى الماوتير الكبيره مصاريف تشغلها بيكون اكبر يعنى الكلام دة بينطبق على الى قبل موديل 90
دى نقطه النقطه التانيه بتاعيت الاخطاء
حضرتك فهمتنى غلط انا مش ماشى بالعربيه ادوس على الناس وانط فوق الارصفه ماهما كان انا راكب عربيه سعرها مرتفع وبخاف عليها
انا كان قصدى ان العربيه لو طلبت منها اى حاجه فى وقت زنقه مش هتقول لا
بنسبه لموضوع الاخطاء الشخصيه زاى موضوع حضرتك انك نسيت تعشق العربيه
الموضوع دة مالوش علاقه بنوع العربيه لو راكب 128 ونسيت تعشقها هتتحرك وممكن تموت بردو طفل لو قدمها

ربنا يباركلك فى عربيتك و فى صحتك ....

انا كنت بحكى قصة حبى لعربيتى و حكايتها معايا بداية من يوم ما امتلكتها زى ما حضرتك ذكرت
و انا مش قصدى توجيه اللوم لحضرتك او نقدك لا سمح الله ... انا كنت بوضح بعض النقاط الى تعرضت لها

كنت بعمل 60 كيلو رايح للعمل ... و زيهم راجع .. ده غير المشاوير الجانبية ... يعنى تقريبا 120 كيلو فى اليوم .. فى الشهر 22 يوم عمل فى 120 كيلو تقريبا 2600 كيلو فى الشهر بحد ادنى
و ما كنتش بشكى من البنزين ... انا عارف انى راكب عربية موتورها 5700 و قديمة كمان

و بالفعل التكنولوجيا الحديثة فرقت كتير فى البنزين زى مواتير الهيمى وانظمة الحقن المختلفة

عربيتى شيفروليه ( جيمس ) بليزر ... موديل 1980 .. عربية كبيرة و قديمة ... انا شخص كلاسيكى متحفظ .. و دقة قديمة فى العربيات ... و بحب العربيات القديمة لركوبى الشخصى
اشتريت عربيتى ب 35 الف جنيه تقريبا ... يعنى الرانجلر تجيب 10 عربيات من عربيتى ..
و كنت اتكلمت مع الباشمهندس احمد على موضوع الاسعار ....

الى بيبين حقيقة الاسعار سعر المستعمل .... الى بيحدده بصفة كبيرة العرض و الطلب .. و بيأثر فيه كتير سعر نفس العربية او العربيات المشابهه الزيرو

اول ما سمعت عن سعر الرانجلر تقريبا كان ب 280 الف على ما اذكر ..... و كانت ال بى ام 316 تقريبا قريبة جدا فى السعر من كدة
النهاردة العربيات كلها غليت بما فى ذلك الرانجلر ..... فدى زيادة سعر العربيات عموما ... مش زيادة سعر البنزين

احد مؤشرات السوق .... نسبة العربيات الدفع الرباعى للعربيات السيدان المباعة فى 2014
و نسبة الرانجلر لعربيات الدفع الرباعى فى 2014 .... او 2013
و نقارنهم بمبيعات 2015 ... بعد غلو البنزين

ارتفاع اسعار السيارات كشف شوية حاجات .. منها ان السيارات الامريكية طلعت مش غالية اوى

و كلام حضرتك عن قطع غيار الالنترا و البى ام يؤكد ان الرانجلر مش غالية اوى زى ما الناس فاكرة


و بعدين عربية مين الى قبل ال 90 ؟! يا باشا انا مركبش اكتر من موديل 80

التصميم الى اتحط للبليزر كان فى السبعينات .... الفتيس موجود من اواخر الستينات ... الكربراتير من السبعينات ... يعنى زمن الفن الجميل ... العربيات دى المفروض يكرموها زى الام المثالية كدة و يقطعوها خردة ... ده ازا كان فيها حاجة تنفع خردة
انا بهزر طبعا .... بس انا بحب العربيات دى

بيكون فيه تفاعل و احسلس متبادل بينك و بين العربية ... العربيات الجديدة بتروح تتفرج عليها و هى فى الصيانة ... و فى خلال الاستخدام اليومى مفيش تفاعل بينك و بين العربية ... حاجة جافة جدا

انما العربيات القديمة .. يا سلام على التواصل .....
عرفت كل مسمار تحت العربية بيعمل ايه نتيجة نومى تحتها لفترات طويلة
كنت حاطط اكل خفيف و زجاجة مياه فى العربية دائما علشان لو وقفت منى على الدائرى او فى حتة مقطوعة و اضطريت ابات فيها
بتعلمك التواصل الاجتماعى مع الناس .... تنزل تسأل الناس على اقرب ميكانيكى .. و اقرب بنزينة ... و تتعود على اراء الناس الهادفة ... زى .... هو لسة حد بيركب العربيات دى ..... هى لسة العربيات دى موجودة ..... ياترى هى بتشتغل بالبنزين و لا بعصير القصب ..... و غيرها من التعليقات الجميلة

بتقربك من ربنا .... بتفضل تستغفر ربنا طول ما انت سايق ... و تدعى ربنا انه يرجعك البيت بالسلامة و العربية متعملهاش معاك

بتريح دماغك من ازعاج الاهل فى البيت من توصيلهم مشاوير سخيفة ... فيفضلوا اخذ المواصلات عن ركوبهم العربية

بتعلمك الرفق بالحيوان ... اليومين دول بلاقى قطة نايمة على كرسى السواق اول ما بفتح الباب .. و خلاص كدة هى عملتها بيتها ... طيب يا قطة معاكى رخصة و لا حتسوقى برشطة ؟!

رجال المرور الافاضل بيحبونى جدا .... فى اى كمين تلاقيهم راحوا واقفين و جايين يرحبوا بيا .. معجبين بيا جدا

ربنا يسترها معانا جميعا و تقبل مرورى

المشاركة الأصلية كتبت بواسطة احمد فهمى

قصة الاخطاء بالفعل وارده فى اي عربيه انا اعرف واحده ست فى الاربعينات كانت راكبه 128 وبتوصل صاحبتها كل يو وهم مروحين من الشغل وفيوم بعد ما نزلتها وهى بتعدى من اودامها داست بنزين غلط او شالت دبرياج الله اعلم بس النتيجه انا داست عليها وموتتها بالخطاء والله يكون فعون اهل المتوفيه والست التانيه انا كل ما بتخيل اللى حصل بتجيلى حالة اكتئاب بتخيل انى دست صاحبى بالخطاء اذا الخطاء البشرى هو اللى فتاك مش العربيه انا بشوف ناس ب125 وبيجو 504 ماشيين يخبطو فى ناس ويجرحو عربيات الناس بمنتهى الاجرام ..

بجانب ده طلوع الرصفان على فكره بيبوظ عفشة العربيات الجيب عادي جدآ والكاوتش لأن اللى صممها مش عامل حساب الرصفان فى القصه دى ومعظم جيبات مصر بتلاقى المستعمل عفشتو خربانه بالكامل فى خلال اصحابها عمرهم لا دخلو صحرا ولا بيعرفو يشغلو الدفع الرباعى وده بسبب قصة الرصفان دى انا ممكن اطلع تل رمل او جبل عادي وانزل فرمل لكن اطلع رصفان معلش دي سلوكيات واحد مش فاهم فى الميكانيكا ..

والعربيات الدفع الرباعى بشكل عام زى كل شئ لو صاحبو شخص سوي هيتعامل بأدب وحرص اكتر من لو راكب عربيه سيدان انا ركبت دفع رباعى كتير واكبرهم كانت فورد اكسبدشن ثم لاند كروزر وشريوكى بعدهم اكس تريل واصغرهم فيتارا من السيدان لأكبرهم كنت بحرص على الناس وبصلح اخطائهم على الطرق وفى البلد فى ناس كتير سلوكيتها هباب وللأسف كنت بسيبهم يتزنقو ويتنفخو لأن البديل انى اخبط حد جنبي وده من النوادر لأنى دايمآ بسيب الناس تعدى الاول وغالب الناس لوحدها كده بتحترم نفسها يعنى المستهترين اللى فى الزحمه يخبطوك من ورا ويطلعلك ايدو يقولك معلش وهو بيضحك فعلآ مبتشفش الناس دي تانىلأن اى عربيه دفع رباعى من او التريوس للهامر اكصدامتها فوق اكصدام العربيات السيدان يعنى اي لمسه هيكون مفيش تكافؤ فى الضرر انا دخل فيا تاكسي فيرنا فى الاكس تريل وانا واقف فى الكمين بجد صعب عليا هة هبط بالكابوت من فوق فى الاكصداك من تت واكصدامو دخل تحت العربيه فطبعآ جاب ريداتيير وكبوت ومراوح وسدر فثانيه وانا مشيت بشوية تجاريح عاديه وطبعآ مفيش حد امن انا يا ما شفت عربيات دفع رباعى بين التريلات معجونه وعربيات مقلوبه ...

كل المطلوب منك اعمل الصح وراعى الناس وربنا هيكرمك والله خير الحافظين ومحافظتك على الناس ومالهم هيعد لك فى كل شئ

كلام حضرتك انا موافق عليه 100% ... مفيش فيه كلام ...
و لكن تحفظى فى التالى .....

لو افترضنا ان الست دى كان معاها رانجلر .... مش محتاجة انها تدوس بنزين غلط علشان ده يحصل .... و بالطبع الاقدار دى فى ايد ربنا .... بس لو داست بنزين بالغلط بالرانجلر ممكن تدوس 2 كمان مع الست الى توفت

اخويا مرة داس على رجل بنت خرجت من شارع جانبى بتجرى .... ربنا كرمه و فرمل .. بس داس على رجلها
لو انا راكب جيب ... كنت دوست على ايه ؟؟؟!!! مكنتش شفت انى حدوس على حاجة اصلا

فالعربية ليها دور كبير فى الضرر الواقع على الاخرين

المهم جدا الى حضرتك ذكرتوا فى ان الواحد لازم يحرص على الاخرين بزيادة شوية

مساعدة المحتاجين على الطريق حاجة جميلة جدا ... و لم تعد منتشرة زى زمان
واحد سواق تريلا قال لى فى مرة ان انا لازم اقف اساعد الناس ... و ده مش بمزاجى و لا تفضل منى ... ده فرض عليا طالما ان انا ممكن اساعدهم

مرة سحبت عربة مسافة صغيرة .... غيرت بعدها ديسك و اسطوانة ... انا استفدت جدا من تغيير الديسك و الاسطوانة و عرفت حاجات مهمة جدا .... عن عربيتى و عن الميكانيكى الى كنت بتعامل معاه .. و عن قطع الغيار .. وعن حاجات كتير ربنا كرمنى بيها و عرفتها

اخطاء الغير موجودة دائما ... ربنا يسترها معانا جميعا


لو فيه عربية خبطت فيا من الخلف حتنزل ببوزها كله تحت الاكصدام الخلفى .... و حتخبط تانك البنزين عندى ... التانك فيه صاجة تصفيح 3 مم ... بس ايه العمل لو الخبطة كانت جامدة و كسرت تانك البنزين ؟!!!
ربنا يستر

الحقيقة المناقشة فى هذا الموضوع شيقة و انا تابعت جميع المشاركات و احب اعلق انى من ساعة ما أشتريت ال KK و انا اللى بخاف و احاسب على العربيات اللى جنبى مش العكس و النتيجة الواحد بعد ما كان بياخد غرز بقى ماشى خط مستقيم. العربية صعب التحكم فيها فوق ال 100 .
انا كتبت موضوع فى المقارنات و يا ريت اسمع رأى حضراتكم و ده اللينك

http://www.nilemotors.net/Nile/460867-4x4-vs-sedan.html
و لكم جزيل الشكر