الموضوع: دايهاتسو تيريوس أو كياريو هاتشباك

المشاركة الأصلية كتبت بواسطة مارينجوس الاول

انا والله في نفس حيرتك دي وحاسس بيها ...وعارف كويس اننا بنتكلم عن نوعين للعربيات
لكنهم بيدونا معظم الي عايزينه ...
خوفي زيك بالضبط ..
التيريوس للاسف محدش عامل فيها تقرير يديك راي قاطع فيها هي واقفه في النص
لا قادر تبلعها ولا قادر تسيبها ..
الكيا ريو حلوه في كل حاجه لكنها برضو فيها مشكله الضيق ومشكله انها واطيه مع شوارعنا
المبهدله ...
مشكله التيريوس والي ياريت اجابه واضحه قاطعه
صوت الموتور عالي ولا لا
العزم كويس ولا مش بيساعدك
لو مشيت علي 150 فتره 2 ساعه مثلا بتجيب وش سلندر ولا لا
الثبات فوق 140 ضايع ولا ممكن بالتحكم مفيش مشكله
الدوران وميلها الجامد
هو دي الي مخوفني من التيريوس طبعا بالاضافه للاوبشن الرهيبه بتاعه الكيا والسؤال اسيب الاوبشن واروح للتيريوس ليه ....؟؟
معلشي هي مخاوف بدايه الشراء بتبقي كده

أنا هكلمك بشكل عام لإني ما سقتش التيريوس قبل كده..

بس فيه حاجات معروفة عن سيارات الـSUV والسيارات اليابانية عموما ودايهاتسو خصوصا.. وأتوقع إنك تلاقيها موجودة في التيريوس طبعا.


أول حاجة لازم حضرتك تعرفها إن دايهاتسو شركة متخصصة في السيارات الصغيرة المخصصة للمدينة... بس!!!

يعني سيارات دايهاتسو هتلاقيها صغيرة من بره وكبيرة من جوه .. موفرة في البنزين .. وأداء موتورها وعفشتها على قد استخدام المدينة.

يعني لو عايز عربية لاستخدامات أخرى فأنصحك تدور على ماركة تانية.



بالنسبة لموضوع صوت الموتور... فلو الموتور على كاتينة جنزير.. فشيء طبيعي إن الصوت يكون عالي حبتين.

ومع إن الموتور بالطول.. بس مروحته مش ميكانيكية.. إنما مروحة كهربا زي كل العربيات اللي موتورها بالعرض.. وده بيقلل الصوت بشكل واضح.

عموما.. حسب معلوماتي إن موتور الكيا ريو هو كمان على جنزير!!

ورأيي إنك تحاول تسمع صوت كل عربية علشان تقرر.



بالنسبة لموضوع العزم .. فأتوقع إن الاتنين زي بعض.. وممكن يكون موتور التيريوس عزمه أعلى بفرق بسيط قوي.. بس ما تنساش إن التيريوس أثقل.. ولو العربية 4×4 فالعزم هيقل أكتر.

بس ميزة الكيا ريو الأساسية إن الفتيس الأوتوماتك بتاعها فيه وضع يدوي وتقدر لما تعشقه تاخد الأداء اللي انت عايزه منها.



أما بقى موضوع إنك تمشي على 150 لمدة ساعتين.. فحضرتك لازم تعرف إن السرعة القصوى للتريوس هي 155 كم/س... يعني الـ150 دي تعتبر هي السرعة القصوى فعلا..

والمشي على السرعة القصوى لمدة طويلة ممكن يسبب مشاكل لأي عربية ... مش التيريوس بس.

عموما.. ما تنساش إن دايهاتسو هي إحدى شركات تويوتا... يعني اعتمادية.. والناس دي لما بتنزل عربية لا يمكن يخلوها تسخن بسهولة.



آخر حاجة بقى.. الثبات

عايزك تحط قاعدة في دماغك.... مفيش عربية SUV تقدر تقول عليها ثابتة.. بمعنى إن لا يمكن تلاقي عربية SUV تبقى ثابتة زي عربية سيدان من نفس الحجم...

دي حقائق فيزيائية لا يمكن تغيرها.


علشان كده دايما بقول إنك لازم تحدد الأول انت عايز إيه من العربية.. لإن لو واحد عايز عربية عملية أو عائلية أكيد بيدور على حاجات مختلفة عن اللي عايز عربية سريعة أو شكلها حلو.


ده كتالوج التيريوس
http://www.daihatsu.com/catalogue/te...cat_dl_003.pdf

وده التيريوس الـ7-راكب
http://www.daihatsu.com/catalogue/te...at_dl_0021.pdf


وده كتالوج الريو (سيدان وهاتشباك)
http://www.kia-sa.com/sites/default/...alogue/rio.pdf


...