الاحساس بغياب الامن والامان فى البلد دى

**Mohd_Adel_Amin** · 08-11-2008 06:59 PM

المشاركة الأصلية كتبت بواسطة Ahmed Samy

أنا من رأي اننا نسيب الغابة دي

و نعيش وسط البشر

معاك يا باشا

**rafeee2** · 09-11-2008 07:50 AM

أنا عندى سؤال لو ماكانش فيه قلة أدب

هو عربيات الدورية بتاعت زمان راحت فين؟؟

ولا هو بعد ما البيجو ال 405 والكورولا انتحروا الداخلية كبرت دماغها؟؟

تكونش ديه كمان رفاهية؟ أنا مستعد أدفع ضريبة دورية لو ده هيرجعها!

**EslaM_NagY** · 09-11-2008 08:31 AM

تقدر تضيف حادثة جديدة نوفى

صحيت النهادرة الساعة 5.30 ص على صوت والدتى بتقولى الحق فى حرامى فى الصالة !!!!!!!!!
قمت بجرى لقيت الشباك مفتوح على مصرعيه وآثار جزمة الحرامى وبصيت من الشباك مفيش اى حد فى الشارع !!
ببص فى الصالة لقيت شنطة والدتى مقلوبة فى الارض ومسروق منها كل ما له قيمة.
قعدت الف فى الشقة اشوف ايه الى ناقص لقيت البيت :-
1- خالى من اى شىء اسمه موبايل.
2- مفيش فلوس فى البيت.
3- المشغولات الذهبية ودى اكبر مصيبة عشان المشغولات دى غالية جدااااااااااا.
تم الاتصال بموبينيل وايقاف جميع الخطوط.
والحمد لله كان معايا السيريل بتاع الموبايلات كله على الكمبيوتر.
تم عمل محضر شرطة والمباحث جت بصت بس مش عارف شكلهم من بوليس خالص يعنى متحسش انو فاهم هو بيعمل ايه اكنو داخل يتفرج على الشقة عشان يشتريها مش بيعاينها.
والى غاظنى ان شطنة الوالدة طبعا عليها بصماتو وخصوصا ان الشنطة كبيرة الحجم ومعظم الجوانب مسطحة يعنى مفيهاش عالى وواطى يعنى سهل جدا ارفع بصماتها وبقول للظابط يقولى لالا ملهاش لزمة !!!!!!

يعنى الحرامى نط من الشباك ودخل الشقة وقعد يلف فيها ومحدش حس بيه خالص !!!

ومما يدل على الغباء ان الحرامى - حسبى الله ونعم الوكيل فيه - مخدش بالو ان علبة الدهب فضة وتساوى فاضية الشىء الفلانى .........................

والغباء برضو الحمد لله عمل على انو مخدش بالو فى نص السكة ان المفاتيح المتعلقة على الحيطة بتاعة الشقة والعربيات فيهم ميداليات دهب وفضة. الحمد لله

انا مش عارف بعد كدة حنام ازاى فى البيت دا ؟؟؟؟؟

بس اهم حاجة الحمد لله محدش حصلو حاجة ودى طبعا اهم من اى شىء فى الدنيا.

يعنى انا لو كنت قمت فى نص الليل وشافنى كان زمانى متشرح وربنا يرحمنى.

بجد دلوقتى مش عارف افرح انى لسة عايش ولا ازعل على الحجات الى اتسرقت ؟؟؟؟

الحمد لله الذى لا يحمد على مكره سواه.

الحمد لله

**Ahmed Samy** · 09-11-2008 01:32 PM

المشاركة الأصلية كتبت بواسطة rafeee2

أنا مستعد أدفع ضريبة دورية لو ده هيرجعها!

اسكت يا رفيق يا خويا الله يسترك

هو ابليس ناقص أفكار ؟!!!!

**سمير يونس** · 09-11-2008 01:56 PM

المشاركة الأصلية كتبت بواسطة rafeee2

أنا عندى سؤال لو ماكانش فيه قلة أدب

هو عربيات الدورية بتاعت زمان راحت فين؟؟

عربيات الدورية باعوها و جابوا بتمنها عربيات مصفحة و مدرعة .. مرابطة ليل نهار أمام الجامعات و النقابات لحماية الجامعات و النقابات من

الخارجين على القانون (من طلبة و دكاترة جامعة و نقابيين)

**fiatto** · 09-11-2008 02:40 PM

فاكرين اغنية محمد ثروت عنيا السهرانين !!!
الله سبحانه راعيها ..... وأمانها أحلى ما فيها !!
والغالى رخيص للغالى ... وحياتى منها وليها !!!

**tamohsen** · 11-11-2008 12:06 PM

Esso_90
الله يكون في عونك
موقف صعب جدا فعلا

بس حضرتك ساكن في دور أرضي مثلا
لو كده حاول تأمن الشباك بحديد
لأن للأسف الحرامي ممكن يرجع تاني لو حس أن المكان ده سهل وأكل منه عيش

**MoToRiZeR** · 11-11-2008 02:29 PM

انا محبتش أقول ده في موضوع جديد عشان مجبش للناس إكتئاب فا قلت أكتبهم هنا

لقيت من كام يوم كدة لجنة في الشارع بتاعنا بكلاب و بتاع .. في إستغربت أوي أصل إحنا شارع جانبي يعني و انا أول ما بخش الشارع بقلع الحزام .. فا مبصوش عالحزام أصلا ! شافوا الرخص و سألوني ساكن فين و بس .

و اللي لاحظتوا إن ده بيتعمل مع الناس اللي ماشية علي رجليها برضه فا واضح إنه كمين شرطة مش مرور .. عرفت بعد كدة إن فيه 4 إتقتلوا في الشارع !

و اللي صدمني أكثر .. إنهم في حوادث متفرقة !!!!!

شخص معوق ذهنياَ أخوه عميد شرطة .. حرامية طلعوا عليه الشقة و قتلوه و سرقوا كل حاجة في الشقة .

و شابة تانية إغتصبوها و قتلوها و رموها عند طلعة الدائري .

و طفلين خطفوهم و سرقوا أعضائهم البشرية (سرقة أعضاء) و رموا ما تبقي من أجسادهم في الزبالة !!

انا بجد مش عارف إحنا رايحين علي فين .

**elassar2010** · 11-11-2008 02:43 PM

ربنا يستر علينا الواحد مبقاش عارف يعمل اية ولا يروح فين يعنى اشيل دبابة فى البيت علشان احمى نفسى

**EslaM_NagY** · 11-11-2008 06:04 PM

المشاركة الأصلية كتبت بواسطة tamohsen

Esso_90
الله يكون في عونك
موقف صعب جدا فعلا

بس حضرتك ساكن في دور أرضي مثلا
لو كده حاول تأمن الشباك بحديد
لأن للأسف الحرامي ممكن يرجع تاني لو حس أن المكان ده سهل وأكل منه عيش

انا فى الدور الثانى والى مجننى ان الشباك الى دخل منه مفيش اى حاجة تحتيه بتاتا يعنى لما ابص من الشباك ده الاقى الارض على طول مفيش حاجة يطلع عليها.
الاحتمال الغريب انو يكون طلع بسلم بس دى صعبة محدش فى الشارع يلاحظها.

انا متوقع ان ممكن يرجع تانى ومن ساعتها الساعة 5 بليل بقفل جميع شبابيك البيت وازنقها بخشبة عشان يبقى مستحيل تتفتح بسهولة.
والله ولا اكنى قاعد فى سجن.

بس هو مش اكل من عندنا عيش بس دا اكل كباب وكفتة وكروسون كمان.

ربنا يستر

الموضوع: الاحساس بغياب الامن والامان فى البلد دى

LinkBack

أدوات الموضوع

عرض

-

-

-

-

-

-

-

المواضيع المتشابهه

قفل الدريكسيون والامان

الامن والامان

مصر واهانة المواطن على جميع المستويات انا عايز اطفش من البلد دى البلد دى مش بتاعتنا

اهواة القوة والامان والرفاهية

الكلمات الدلالية لهذا الموضوع

المفضلات

المفضلات

ضوابط المشاركة