الموضوع: الاحساس بغياب الامن والامان فى البلد دى

استكمالا لمواضيع الاخوه الاعضاء بخصوص غياب الامن والامان فى البلد دى وانتشار السرقات والبلطجيه والمسجلين خطر واحساس غالبيه الناس بالخوف على انفسهم وعلى احبائهم عند نزولهم للشارع المصرى لقيت نفسى وبمحض الصدفه بيتحكى ليا على حوادث خطيره جدااا حدثت كلها فى اسبوع واحد وفى مدينه واحده خلت الواحد يحس بشعور لا ارادى ان يومه جاى وان الدور عليه علشان يتبهدل فى البلد دى ويطلع عليه شويه بلطجيه ومسجلين خطر يعملوله جراحه تجميليه فى جنبه ولا بطنه ينتج عنها اخراج احشائه الى خارج جسمه لكى تستمتع بشم الهواء النقى المحمل برائحه دخان قش الرز او يعملوله عاهه مستديمه فى وشه تجعل من فرانكنشتين بالمقارنه به يبقى شبه براد بيت ..وكل ده علشان الناس اللى مسؤله عن الامن فى البلد دى مابقتش بتهتم بامن المواطن واصبح كل مواطن مسؤل عن حمايه نفسه بنفسه والشاطر اللى يخلص على التانى الاول

اول حادثه هى اختطاف شاب عنه 25 سنه كان طالع من النادى عندنا الساعه حوالى 9 مساء ورايح يركب عربيته فى امان الله لقلى 3 هجموا عليه كتفوه وخطفوه هوا والعربيه وبعد 4 ايام اتصلوا باهل الشاب ده وطلبوا فديه 100 الف جنيه علشان يسيبوه وطبعا مع عدم تبليغ الشرطه والراجل والد الشاب طبعا خاف على ابنه وبعد كام يوم اتصلوا الخاطفين باهل الشاب وحددوا ميعاد ومكان تلقى الفديه وطلبوا ان ام الشاب هيا اللى توصل المبلغ ومن غيلر ما يكون معاها حد وبالفعل حصل كده وبعدها بيوم لقوا الشاب مرمى وهوا مخدر ومتكتف على الطريق السريع اللى رايح مصر .

الحادثه التانيه واحد كان بايع حته ارض زراعيه ومعاه تمنها 50 الف جنيه كان ماشى بعربيته فى امان الله لقى 4 بعربيه بيجو استيشن بيزنقوا عليه لغايه ماوقفوه وهجموا عليه وضربوه لغايه ما اغمى عليه وراحوا راميين عربيته فى الرياح التوفيقى وخطفوه مده 4 ايام وهوا لا بياكل ولا بيشرب واهله افتكروا انه غرق فى العربيه وبعد ال 4 ايام دخل عليه الناس اللى خطفينه وادوله حقنه مخدر ولما صحى لقى نفسه فى مدينه زفتى التابعه لمحافظه الغربيه .

الحادثه التالته واحد صاحبى بيحكيلى ان الاسبوع اللى فات واحد قريبه كان عاوز يفطر الصبح قبل ما يروح شغله راح اشترى ساندوتشات وقعد ياكلها فى العربيه فى ميدان كبير عندنا وزحمه والحركه فيه شغاله على طول يعنى مش حته مقطوعه لقى واحد شمام طالعله من تحت الارض ورافع عليه مطواه سرق منه الموبايل والمحفظه وجرى وولا واحد قدر يوقفه او يعترض طريقه

اختتم باحصائيه صادره عن وزاره الداخليه بتقول :
أكدت إحصائيات رسمية صادرة عن وزارة الداخلية أن مصر بها 92 ألف و 680 بلطجي ومسجل خطر وهم مرتبطون بجرائم عنف متكررة تدور حول القتل العمد أو الشروع في قتل والاغتصاب و البلطجة وجرائم الخطف والحرق والتبديد والضرب المسبب لعاهات مستديمة والضرب المفضي للموت.
في السياق نفسه كشفت دراسة حديثة بالمركز القومي للبحوث الاجتماعية الجنائية حول المسجلين خطر أن حوالي 50% من المسجلين خطر تتراوح أعمارهم بين 18 و 30 عاما وأن اغلبهم يتركزون في محافظات القاهرة وبورسعيد والشرقية بواقع 49.8 من المسجلين خطر على مستوي الجمهورية وذكرت الدراسة أن 2.3% من المسجلين خطر حاصلون على مؤهلات جامعية و 48.59 % منهم مهنيون.

دلوقتى بقى نيجى للسؤال المكرر فى كل مره احنا نعمل ايه فى الموضوع ده ؟ نحمى نفسنا واهلنا واولادنا وبناتنا ازاى ؟ مادام المسؤلين عن الامن مش عارفين يوقفوا طوفان البلطجه والخطف والسرقه ده مايسمحولنا ان احنا نشيل سلاح وندافع عن نفسنا بدل الواحد مايلاقى نفسه تحت رحمه واحد مدمن ولا بلطجى يضيع مستقبله فى غمضه عين .