شوف .. الجريمة موجودة في كل حتة .. بس انا بصراحة شايف الموضوع في مصر أكبر من كدة بكتير جداَ و ده من خلال تجربة شخصية سيئة لسة مطلعتش منها .
انا لا أخفي عليك إني خايف علي نفسي و علي أهلي و علي أصحابي حالياَ خوف يصل لدرجة الرعب و الهلع بعد اللي شفته .. و إني مكتئب جداَ .
فالمشكلة واحدة واحدة .. أولاَ مفيش أمان في الشارع و ده لا يخفي علي أحد .. و بقي بيحصل في شوارع سكنية عادية جداَ خناقات بالأسلحة الحية و الرشاشات الألية و علي أتفه الأسباب ، و خناقات الأسلحة البيضاء دي بقت عادية جدا و لايت يعني .
ثانياَ مفيش أمان في المكان اللي هتتعالج فيه بعد ما تضرب أو يحصلك حادثة أو تتعرض لأي إعتداء ما .. هيشيلك ممرضين يهبدوك عالترولي ده لو جابوه أصلاَ و شالوك بطريقة هيلا هيلا صلي عالنبي .. و ده طبعاَ بعد ما عربية الإسعاف تيجي و إنت بتنازع .. و تطلع عربية إسعاف تانية معدية بالصدفة غير اللي إنت طلبتها و مترضاش تاخدك .. ولو حصل و عربية الإسعاف جت فهيبهدلوك برضه و هيرعاك دكاترة تحس إنهم بيتكرموا علي سعادتك بالمساعدة و برضه مش هيقوموا بعملهم علي أكمل وجه و هتتمني بس لو ربنا يديك الصحة و تقوم من محنتك عشان تاكلهم قلمين .
ثالثاَ .. الشرطة ولا الجن الأزرق مش هيجيبولك حقك .. ده ساعات بيبقوا عارفين الحرامي و مبيجيبوهوش .. و ممكن حتي ميرضوش يعملولك محضر لأن من رأيهم المحضر ميت و الأدلة اللي معاك مش كافية حتي لو رايحلهم و شايل راسك علي إيدك علي رأي مرسي الزناتي .. ولو جبت واسطة هيهتموا بالموضوع إعتذاراَ و تقديراَ للشخص اللي إنت جبته واسطة ليس أكثر إنما إنت بالنسبة لهم لا تساوي شئ .
أضف إلي ذلك إن في ظل الظروف دي الناس بقت تخاف تعمل الخير حتي لو هينقذ حياة بني أدم و بقت تكتفي بالفرجة .
فا مسألة إن ممكن يحصل أي حاجة لحد قريب منك و إنت مش دريان .. و تبقي عارف إن محدش هيساعد الشخص اللي إنت خايف عليه ولا يسعفه ولا يجيبله حقه .. فا ده شئ مرعب للغاية و كافي إنه يجيبلك إكتئاب مزمن .. خاصة في ظل وجود إحتمالية إن ده يحصل ليك شخصياَ .. انا مش عايز أكون كئيب و لكن ده الواقع اللي ظاهرلي .
المفضلات