الموضوع: ازاى احافظ على ملفات مهمه عندى على الكمبيوتر ؟

أفضل شيء زي ما تفضل الإخوة وقالوا التخزين السحابي Cloud Storage
عندك خيارين هما الأفضل
1- Google Drive
2 - Dropbox
متقلقش من الخصوصية لأن الملفات دي متخزنة في أمان بعيدا عن أعين الناس ومحدش يقدر يطلع عليها غيرك مش للمشاركة زي مواقع مشاركة الملفات ولزيادة أمان ممكن تضغطهم في ملفات مضغوطة محمية بكلمة سر قوية معقدة
المواقع دي بتديك أكتر من 5 جيجا تخزين وانت مش هتحتاج ترفع الملفات غير مرة واحدة فحتى لو كان النت عندك ضعيف انت بس هتستب البرنامج سواء برنامج جوجل درايف أو دروب بوكس وهترشده إلى مكان الفولدر اللي جواه الملفات الهامة وتسيبه يرفع براحته يقعد يومين تلاتة أربعة مش مهم
الميزة انك بعد ما هترفع الملفات البرنامج بيعمل مزامنة تلقائية Synchronize بمعنى ان أي ملف هتعمله تعديل أو حذف أو هتضيف ملف جديد علطول أوتوماتيك هيترفع على السيرفر بدون أي تدخل منك طالما البرنامج شغال في ال background عندك
لو حصل أي حاجة لا قدر الله للهارد أو النسخة واشتريت هارد جديد بمجرد ما هتستب البرنامج هيعمل دونلود للملفات كلها على الفولدر اللي هتحدده
ميزة كمان وهي إنك تقدر تشارك الملفات وتدخل عليها من أي مكان في العالم بدون ما تقلق من انك ممكن تنسى الفلاشة أو الهارد اللي مخزن عليه الملفات
آخر حاجة واحتياطا برده خزنهم على فلاشة واحميها بكلمة سر وكده تبقى في الأمان لكن ابعد عن حوار الهاردات الخارجية أو الاسطوانات لأنها مش مضمونة ممكن كلها تبوظ في أي لحظة غير الفلاشات بيبقى عمرها الافتراضي أطول شوية بس هات ماركة محترمة زي ما قال الأخ Specialist هات Adata أو Sandisk والكينجستون كويسة برده مفيهاش مشكلة بس تتأكد انها مش مضروبة بأنك تشتريها من مكان ليه سمعته زي راديو شاك أو كمبيومي أو كمبيوتر شوب