الموضوع: مشاكل الشيفروليه كروز

المشاركة الأصلية كتبت بواسطة drcobra

فين يا جماعة تقارير الملاك
اية هى الاجاء المشتركة بين الكروز والاسترا زى الموتور والفتيس والعفشة

انا واحد من الناس كنت محتار بين الفلوانس والكروز لاخر لحظة
قسم رينو مفصص العربية عايزين قسم شيفى هو كمان يعمل احلى تقارير

لازم تقرير مفصل بالصور بين كروز 2010 و2015

تحياتى للجميع

المواضيع المثبتة مليانة تقارير عن الكروز كتيرة اوي، ومهما اتكلمنا مش هنقول زي ما الاخوة الافاضل تفضلوا وقالوا، ويمكن الرجوع للمشاركات المثبتة وهتلاقوا فيها فايدة كويسة، أنا هحاول أعمل تقرير خاص بيا كمالك ومستخدم للعربية دي، ولكن بمنتهى البساطة.

التقرير الشخصي ليا كمالك كروز بقالي حوالي 4 سنين، معايا موديل 2011
- فخامة وقوة في الشكل الخارجي، بيعبر عن كدة أشكال الفوانيس والمقدمة الشرسة والضخمة.
- شياكة وفخامة رائعة من الداخل مع ملائمة أنوار التابلوه للعين وهدوءها الرائع إللي بيدي شياكة حلوة أوي للوحة العدادات والكونسول الأوسط.
- عزل الصوت سواء الخارجي أو صوت الموتور رائع جداً جداً وهتبقى قاعد في العربية في منتهى الهدوء والراحة، بغض النظر عن إن صوت الموتور هادي جداً من الأساس.
- العربية واسعة جداً من جوة خصوصا للراكب الامامي والسائق، وأيضاً من الخلف بس بشرط ماترجعش الكرسي كله لورا، عشان مشوار الكراسي الامامية طويل فبيدي إيحاء بضيق المساحة الخلفية.
- ثبات العربية مع السرعات ممتاز جداً وبيخليك سايق وإنت حاسس بأمان مع أي سرعة، ممكن توصل لـ 160 كم/س ومش هتعرف من غير ما تبص للعداد، في بعض الطرق بمشي على 200 كم/س والعربية متماسكة وثابتة جداً ما شاء الله، مقاس الكاوتش 205/65/15 ودا مقاس معقول ومش بيخلي الاحساس بالمطبات واضح.
- تسارع العربية من الثبات وبدء تحركها مش سريع، يعني لا يقارن بالهيونداي والكيا ومثيلاتهم، الطلعة بتاعت العربية تشبه الأوكتافيا والجيتا، بعد الغيار التالت للفتيس هتلاقي التسارع مختلف عن البداية والإستجابة أسرع.
- الفتيس 6 نقلات ودا هيديك نعومة في الغيارات جميلة جداً ومع وجود الستيبترونيك هتقدر تتعامل مانوال وقت ما تحب وخصوصا في الطرق المزدوجة عشان تقدر تتخطى بسهولة، والعربية هتساعدك على القيادة الرياضية بالشكل دا وهتستجيب استجابة ممتازة.
- استهلاك البنزين جيد جداً من وجهة نظري وبالمقارنة بسيارات كتير، متوسط الإستهلاك على مختلف الطرق (سفر او داخلي) 250 - 260 كم/ صفيحة، مع مراعاة إن الإستهلاك بيزيد طبعاً مع السرعات العالية، فوق الـ 110 و 120 كم/س مثلاً (عشان فيه ناس مش بتاخد بالها من كدة)
- هتقعد فيها وإنت سايق مرتاح ومش مجهد وحابب السواقة وإنت جواها وقاعد في منتهى الراحة والإسترخاء.
- الإرتفاع عن الأرض ممتاز جداً، ومش بتحك في مطب إلا لو محملة أوي وأنا ماهتمتش بإني أخد المطب بهدوء كويس، شخصياً ممكن أتحرك أو أسافر ومعايا المدام وبنت وولد صغير وشنط سفر وماتحكش نهائي في أي مطب وبدون عبور المطب بميل.
- غيار زيت الموتور 3.5 لتر بدون فلتر و4 لتر لو هتغير الفلتر.
- تانك البنزين سعة 60 لتر، ودي سعة ممتازة لطرق السفر الطويلة، القاهرة - الغردقة بتانك إلا ربع، إسكندرية رايح جاي مع جولة في البلد بردو بتانك إلا ربع، بشرط ماكونش ماشي على سرعات عالية أوي لزيادة الإستهلاك مع سرعات فوق الـ 120 كم/س.
- إستجابة الفرامل كويسة جداً رغم عدم وجود abs وما إلى ذلك.
- المرايات كحجم وتوجيه ممتازة في إنك تقدر تظبطها بكل الأوضاع إللي هتحتاجها وتديلك الرؤية المطلوبة بأي شكل إنت عايزه، وحجمها كويس لرؤية كويسة جداً
- مساحة الشنطة الخلفية كويسة جداً ومناسبة للسفريات العائلية.
- شاشة البيانات بتوضحلك أي مشكلة تحصل لا قدر الله في العربية مع توضيح كود للمشكلة فوراً.
- كمبيوتر رحلات بيحتوي على كيلومتراج، متوسط سرعة، متوسط إستهلاك بنزين، إستهلاك بنزين لحظي، المسافة المتبقية حتى فراغ التانك.
- تحكم في السنترلوك والإنذار، عن طريق التحكم الشخصي للسائق، مثل: فتح الأبواب كلها مع التوقف أو فتح باب السائق فقط أو عدم فتح أي باب.
- السنترلوك بيقفل أوتوماتيك مع سرعة 15 كم/س مباشرة.
- لو نسيت الأنوار وإنت طالع البيت، العربية بتفصل كل الأنوار لتأمين البطارية بعد دقيقتين.
- فيه إمكانية تشغيل النور العالي اوتوماتيك قبل قفل السنترلوك عشان ينور الطريق لو انت طالع البيت والدنيا ضلمة وبيفصل بعد 30 ثانية.
- العفشة من وجهة نظري كويسة جداً جداً والعربية ناعمة ومريحة ومش متعبة نهائي
- قطع الغيار مش رخيصة، ودي من عيوب العربية من وجهة نظري.

الخلاصة:
العربية ممتازة ما شاء الله ولكن ماينفعش الموتور يتقارن بالإلنترا أو السيراتو (دا عشان معظم أو كل الناس بتقارن العربية من الأساس بالإلنترا والسيراتو)، أما فعلياً فالعربية دي مش من فئتهم خالص، مع إحترامي وحبي للعربيتين، العربية دي مقارنتها فعلياً وعالمياً مع الكورولا أو الفانتازيا.
هتبقى راكب ركوبة جميلة وشيك وفخمة وقوية

أعتذر للإطالة وأعتذر لأن معظم التقرير كان كلام بالعامية لسهولة توصيل المعلومة.

أخوكم م. إيهاب الشرقاوي