الموضوع: مشكلة إرث وفيه وصية مش مفهومة

السلام عليكم ورحمة الله وبركاته

عندي صديق توفى والده رحمة الله عليه وساب وصية بس قبل ما أقول الوصية لازم أوضح عدد من النقاط

والده عنده 3 أولاد وبنتين من زوجة وزوجته توفت و بعد ما توفت تزوج زوجة تانية وله منها بنتين وهوا توفى وبناته صغيرين ( معرفش في أي مرحلة دراسية بالظبط بس غالبًا لسه في الإبتدائية )
الزوجة دي أثناء حياته ضغطت عليه عشان يطلع ولاده برا البيت ( بما فيهم البنات )
سكنوا في بيت بعيد عنه وعن زوجته وبناته

ولازم أوضح إنه لما طلعهم كانوا الولاد خلصوا الثانوية بس البنتين اللي من زوجته المتوفاه لسه بيدرسوا ( لكن معرفش في أي مرحلة دراسية كانوا وقتها )

الرجل عنده أملاك كتير ... مفيش مشكلة فيها ... ولكن عنده أملاك بتدر دخل شهري تقريبًا شهريًا 180 ألف أو أكتر بس مش أقل
صديقي ميعرفش دخل والده من أملاكه كام تحديدًا بس يعرف إنها مش أقل من 180 ألف

والده الله يرحمه ساب وصية وكتب فيها ( يصرف الدخل الشهري على فلانة وفلانة -بناته من زوجته التانية ) حتى التخرج من الجامعة

البنتين ووالدتهم مكتوب لهم بيوت باسمائهم وهيدخلوا في الإرث - ودا برضه مفهوش مشكلة -

المشكلة فقط في الدخل الشهري لإن فيه وصية

الزوجة متمسكة بكل الدخل الشهري ليها ولبناتهم وتمسكة بتنفيذ الوصية

وصديقي وإخواته حسين إن والدهم ظلمهم بحرمانهم من الدخل الشهري وخصوصًا إن المبلغ يكفيهم كلهم وبناته من زوجته الأولى برضه لسه بيدرسوا زي بناته من زوجته التانية

الأولاد إختلفوا .. الكبير - صديقي - قال أنا هقطع الوصية ولا وصية لوارث وهوا طردنا من البيت بعد ما ماتت والدتنا وهيحرمنا كمان من دخله الشهري بعد مايموت

وأخوه الأصغر منه قاله أنا هنفذ الوصية حتى لو فيها ظلم ولو حاول حد يخالفها -هقتله -

الأخ التالت مريض ضغط والأصغر بينهم قال أنا مليش دعوة وإخواتهم البنات قالوا ملناش دعوة
وصديقي بيقول اللي هيتنازل لاهوا أخويا ولا أعرفه

وحاليًا في خلاف بين الأخين دول وزوجة الأب

حاولنا نقنعه يديها 50% من الدخل هيا إقتنعت وهوا رفض قال يتوزع بحسب الشرع

ولكن أنا قريت الوصية بنفسي ... ( قريت الأصل مش صورة )
وملاحظاتي دي مقلتهاش لحد فيهم

أولًا : مش مكتوب الدخل يصرف على البنات ويحرم باقي الورثة ... أو حتى مش مكتوب يصرف الدخل على البنتين ( فقط ) .. مكتوب ( يصرف عليهم حتى التخرج من الجامعة )
ثانيًا : الوصية واضح إنها مكتوبة تحت ضغط ..لإنك لما تقارن خطه بخطه فأي حاجة تانية هتحس فيه فرق واضح حتى الإمضاء متعرج ( يمكن كتبها في حالة صحية سيئة دا إحتمال وارد ) ولكن هوا خطه

حتى لو كانت مكتوبة تحت ضغط الوصية تتفهم من النظرة الأولى بطريقة ولكن لو دققت فيها هتلاقي إنها مفهاش حاجة تدل على حرمان الباقي يمكن الراجل كتبها بالشكل دا عشان يرضي زوجته
ويمكن مكنش دقيق في كتابة رغبته ( يعني ممكن فعلًا كان يقصد يصرف عليهم فقط لإنه حددهم هما بس بالإسم )

في النهاية الوصية عملت خلاف كبير بين الإخوات و الخلاف مازال قائمًا وبنحاول نهديهم
ولكن بكل أمانة أنا في صف صديقي و لكن مابينتلوش إني شايف إنه معاه حق

ملاحظة كمان : يبدو إن الأب على فراش الموت وقبل مايموت بلحظات وصى إبنه ( اللي عايز ينفذ الوصية ) على زوجته وبناته
لإنه لما قعدت معاه كان حزين جدًا وبيبكي وهوا بيتكلم قالي والدي كان خايف على زوجته وبناته من أخويا الكبير وقالي دول في رقبتك وأهوه اللي قاله بيعمله أخويا بعد مامات
فهوا متحسس من أي تصرف من أخوه الكبير إتجاه زوجة والده وبناته

المشكلة إن الزوجة رفعت قضايا على الأخ الكبير ( بدون سبب ) بتبديد مال اليتيم وعايزة تبيع كل الأملاك وتاخد حقها وحق بناتها منها
وصديقي قال مش هنبيع حاجة من حق البنات لما يكبروا هما يتصرفوا في مالهم هيا عايزة حقها تاخده
للحق الست دي طماعة وممكن تلبس صاحبي مصيبة ... لإنه بعد مامات والده بكم يوم كان رايح لها وواخد هدايا ليها وللبنات وكان عايز يخرج إخواته يفسحهم فطردته واتصلت بالأمن قالت هيخطف بناتي والأمن هدوها وهما عارفين إنها إتبلت عليه
( مكنش يعرف الوصية فمكنش تصرفه بدافع التودد ليها عشان حاجة )
- الواقعة دي حكهالي أخوه المختلف معاه فأنا واثق من صدقها -

- علاقتي بيها كويسة وإستقبلتني كويس لما رحتلها مع والدتي واشتكتلي من صديقي وكلمتني أكتر من مرة بس أنا بصراحة لما كنت عندها مكنتش عارف أقول إيه وفضلت ساكت لحد ماخرجت عشان يفضل فيه إمكانية إني أتدخل لو تطلب الأمر

ياريت ياجماعة اللي يعرف حل يرضي الجميع ويرضي ربنا يقوله