الموضوع: زيارة إلى المدرسة الألمانية و أمنيات للجيل الثالث من رينو

المشاركة الأصلية كتبت بواسطة chato_eg

الموضوع ده أنا فكرت فيه بعد تجربة الأوكتافيا A5.....و حسيت إن مخى مش قادر يبطل مفارنة بينها و بين الميجان....
الحقيقة الفرق واضح جدا بين الشخصية الألمانية و الفرنسية....بالفعل العربيتين يمثلو المدرستين باقتدار....
و اللى أحب ألفت انتباه الناس ليه إن أكيد أكيد كل واحدة ليها طعم و كل بنى آدم ربنا خالق جواه كيمياء معينة هتخليه يحب واحدة عن التانية حتى بدون أسباب مادية.

عربيتى و العربية ال A5 الاتنين step-tronic ، لكن الميجان طبعا 4 سرعات و الاوكتافيا 6 سرعات.....
فى الآخر زاد اقتناعى بالميجان و إن ربنا وفقنى للاختيار المناسب لشخصى و ظروفى أكتر....
طبعا فرق السعر 35 ألف جنيه ( عربيتى ب 135 ألف ) مع العلم إن الاوكتافيا حديث الموضوع خليجى...صاحبها قاللى غنها فى التوكيل 190 ألف و هو جايبها ب 170 ألف....
بجد بجد لو اللى أنا ركبتها دى المفروض أدفع فيها 190 ألف و أنا عربيتى ب 135 ألف !!!!!!!!!!! أنا مش قادر أعبر بالكلام عن اندهاشى من الفرق 55 ألف ده أنا أخدت بيه إيه ؟؟؟؟ ماقدرتش أحس ب 55 ألف فرق تحت إيدى و رجلى بين الميجان و الاوكتافيا....جايز حد يقدر يبرر ولو إنى أشك إن فعلا الفرق بين العربيتين يستاهل 55 ألف....لذا أنا هالتزم بالمقارنة خارج موضوع السعر....
الاوكتافيا حجمها الخارجى أكبر....للوهلة الأولى خلف المقود تحي إنك راكب تايتانيك....خصوصا مع وضع القيادة اللى أنا باكرهه فى معظم السيارات الخديثة اللى بتميل لوضع قيادة منخفض لاضفاء شعور بالرحابة الداخلية....لحسن الحظ الميجان أعلى شوية من حيث الوضعية دى و ده بيخليك تحس إنك شايف الطريق و زوايا و حدود العربية أفضل...
التعليق فى الاوكتافيا على شاكلة الألمانى و خصوصا الأوبل اللى يعتبر أقرب حاجة لفولكس كله "رياضى و متماسك "...أنا شخصيا فى شوارعنا الممهدة كأنك ماشى على كريم شانتيه أفضل أسميه ناشف و غير مريح لدرجة إنى اعتقدت إن فى مؤامرة بين العربية و الشارع لتعليمى أماكن النتوؤات و الحفر :k5:
صوت الموتور فى الاوكتفيا على السرعات البطيئة عالى بدرجة لا يمكن تجاهلها
خصوصا إن أقل دوسة على البنزين بتخلى الموتور دوراته عالية...لكن صوت الموتور على سرعات أعلى بيقل كتير...لكن عند سرعات عالية سوية 120 مثلا صوت الهوا مزعج مزعج ...إيه ده أنا افتكرت إنى ماشى 180 و بعدين بسلامتها بتدى صوت تحذير عند تجاوز 120 تقريبا....الميجان عربية بتسمع الكلام من غير نقاش.. 130 و لا 140 خلاص مش هاتقعد تصفر إنما على طول تتجاوب معايا...على عكس الاوكتافيا اللى بالرغم من تسارع رائع من الثبات إلا أن بعد ال120 تحس إنها مش عايزة تمشى كما لو إنها بتعاندنى !!!

الصالون فى الاوكتافيا شرح و برح تحس إنك قاعد فى كوشة و دى مش حاجة وحشة....‘نما أنا شخصيا أفضل صالون الميجان اللى لا يبخل على بالراحة و لا الاتساع لكن تحس إنها بتحتويك فى أحضانها على عكس الاوكتافيا اللى بتقولك أهلا بيك الدنيا واسعة اقعد مكان ما تحب...الاتنين مضيافتين لكن كل واحدة ليها طريقتها فى استقبال الناس....
الكونسول الأوسط مليان زراير بطريقة تحسسك إنك راكب طيارة و إنها حاجة بقى آخر تكنولوجيا و مع الاضاءة الخضراء يبقى أنت فى مصنع لانتاج الرقائق الالكترونية...مع إن الميجان فيها كل الوظائف باستثناء المكيف المزدوج لكن طريقة التقديم بيرضه بتختلف....الميجان إضاءة بيضاء هادئة و مش كل خاجة منورة أوى كدة...النور على قد الطلب و هدفه إنه يريحك مش يبهرك
لاحظتو اللمبتين اللى على فتحة السى دى ...يدوب الطرفين علشان تحط الاسطوانة فى النص بسهولة مش كل الفتحة منورة...
و طبعا أنا معجب شديد الاعجاب بطريقة عمل ال sound system و الذراع خلف الدركسيون :k16:....

الشئ الأخير اللى أحب أضيفه " نقل الحركة" ... أنا أشهد إن الفتيس أبو 6 سرعات ده فتيس كويس و أحسن من اللى فى الميجان.....
أولا عدد النقلات 6 و ده إن كان بيخلى الموتور دوراته و صوته بيعلو أوى فى السرعات من الثبات و حتى 70 ...لكنه ناعم جدا فى نفلاته مهما كانت حركة الرجل على دواسة البنزين...حساس جدا لرغبات السائق فى التسارع و الابطاء... متناغم أوى مع الموتور...لدرجة يصعب معها إنك تسوق العربية دى بالراحة و هدوء ...دايما عايز تنبهر بالأداء الرائع ده على السرعات المنخفضة جدا دى و فى عربية عائلية مش رباضية ...دايما العربية بتيتحثك على المزيد على عكس الميجان اللى لو انت نازل من الشغل متنرفز و قرفان هى تطبطب عليك و تدلعك و تهديك نظرا لنعومتها و خصوصا المقود و التعليق و بدن شك عزل أفضل للكابينة و أيضا صوت الهوا فيها أقل بكتير من الاوكتافيا....
لو كان فتيس الميجان أفضل شوية من دلوقتى..... هو طبعا كويس و لو قرصت العربية هتطير و مش بس كده دى دايما بتبهرك إن لازل فى جعبتها المزيد من القوة اللى لسه ماشفتهاش و كل ما تقرص هتلاقى مخزون بيطلع...لكن الاوكتافيا فتيسها مجنون ببساطة كدة تلاقيه و صل ل 5500 و العادى عنده عند الانطلاق من الثبات ال ...3500 أنا عمرى ما بعدى ال 4000 فى الميجان و لو قرصت باستغباء هيوصل ل 4500 لكن 5500 دى أنا عمرى ما عملتها فى عربية...أنا بس مش عارق هل هما عاملين حساب الكلام ده فى الاوكتافيا و لا ده هيأثر بالسلب على المدى الطويل على المحرك....ماهى برضه مش شطارة إنى أخلى العربية تجرى و بعدين تعوز عمرة بعد مدة أقصر...خصوصا إن دى عربية عائلية مش رياضية...

يا إلاهى.....أنا كتبت كتير و صدعتكو....لكن حبيت أشارك الوحوش بالتجربة و لو إنى متأكد إن كتير أكيد جربو ال A5 ...
آخرا كل اللى أتمناه فى الجيل التالت من رينو إنهم يهتمو أكتر بالفتيس من حيث عدد النقلات و نسب الغيارات و الحساسية بتاعته بالنسبة لحركة الرجل عل دواسة البنزين بدون التضحية بنعومة و سلاسة الأداء المعهودة من رينو

يا ترى فى حاجة تانية انتو تحبو تشفوها فى الجيل التالت من كليو و ميجان ؟؟

أتمنى من رينو يعملوا حساب طبيعة أجواء بلدنا ، بمعنى (البربريز الأمامى طبعا) و طبقة الدهان أقل ذرة تراب أثناء السير على سرعة و لتكن 90 كم/س تؤثر تأثير ملحوظ ،أعتقد أغلب السيارات حتى الأغلى من رينو قد تواجه نفس الملاحظة.و لكن أطلب من رينو كأني أطلب من إبني أو بنتي (طبعا معروف غلاوة الضنا) بعض التحسين.
أيضا يا ريت تفضل نظرية تبريد التكييف طبقا للمقاييس الأوروبية لأنها صحية على المدى البعيد مع زيادة الإحساس بالبرودة و أكيد عندهم ضمير و مش حيغلبوا