هوندا سيفيك هاي لاين سعرها 217 الف
ميتسوبيشي لانسر 150 الف
تويوتا كرولا سعرها 216 الف
أوبل 295 الف
اوكتافيا 222 الف
باسات 239 الف
احد الاخوه يقولك المميزات والعيوب ويفاضل ما بينهم
عرض للطباعة
هوندا سيفيك هاي لاين سعرها 217 الف
ميتسوبيشي لانسر 150 الف
تويوتا كرولا سعرها 216 الف
أوبل 295 الف
اوكتافيا 222 الف
باسات 239 الف
احد الاخوه يقولك المميزات والعيوب ويفاضل ما بينهم
افضل بديل حاليا من وجهه نظرى البيجو ٥٠٨ ... عربيه اثبتت نفسها من ٢٠١٢ و الفيس ليفت الجديد مميز ...
موتور تربو قوى ١٦٣ حصان ... تصميم شيك جدا ... عفشه ناعمه ... خامات جودتها ممتازه ... اوبشنات كتيره ... قطع غيار اسعارها اقل عن الالمانى ... بنزين ٩٢ بدون مشاكل مع اداء ممتاز ... تصنيع فرنسى بالكامل ...
و الفئه الثانيه ب ٢٦٨ الف و بها اوبشنات معقوله جدا و موجوده فى المعارض و تسليم فورى ...
تحياتى ...
كلام مظبوط 100%
شوف حضرتك انا معايا دلوقتي BMW-328i موديل 2015
وكان قبلها معايا مرسيدس C250 موديل 2010 من الزيرو برضه وبعتها علشان اشتري ال بي ام
ودي خبرتي احب اشاركها مع اخوانا فى المنتدي المحتارين يمكن اعرف اساعدهم
1- مفيش عربية من الاتنين مش بيفرق معاهم نوع البنزين لو ان سواقتك علطول حرق على الغيار و كون العربيه ممكن تمشي ببنزين 92 ده علشان كومبيوتر العربية بيأخر توقيت الشرارة وبيستعملوا بوجيهات درجة حرارتها اقل . و بيقللوا ظبط boost التربو وملخص كل ده ان العربية بيقل اداءها لكن مش بصورة كبيرة
2- مميزات المرسيدس الفخامة و المتانه و محبوبة فى مصر علشان تاريخ توكيل مرسيدس فى مصر كويس و ده خلى ميكانكية العربية و محلات قطع الغيار كتير و بالتالى نفسيا المرسيدس بتمسك نفسها زي ما الناس بتقول. طيب ايه تجربتي في اعادة البيع
انا اشتريتها سنه 2010 C250 Avantgard زيرو ب 398 الف (ال C180 كانت باظن 315 الف) ولما جيت ابيعها بعد 4 سنين كانت عامله 64 الف كلم و جابتلي 300 الف و كان سعر ال C180 الجديدة 435 الف (كماليات مساوية موتور 1600 اقل فى القدرة من C250 اللي مرسيدس وقفت تصنيعها فى مصر فعلشان الجمرك مبقوش ينزلو الا ال 1600 .
طيب لو ال C250 لسة بتتصنع واخدناها نسبة و تناسب يبقى سعرها النهاردة زيرو حوالي 535 الف) دي يعني سعر اعادة البيع 300/535= 56% من سعر الجديدة و بالتالي ده برضه سعر اعادة بيع ال BMW برضه لو كانت نفس الحالة
3- عيوب الC250 2010 كانت محرك بطيئ فى التسارع turbo lag و 1800 سي سي 200 حصان و جير بوكس 5 سرعات مش حلو. لما شفت ال C180 الجديده على ال يوتيوب برضه الناس لسة بتشتكي من ضعف التجميع (الموتور اصغر 1600 و 156 حصان) و حتي ال جير بوكس ال 7G-tronic عليه ملاحظات (اكرر انا مسوقتش ال C180 الجديدة ومقدرش اعلق على اللي قالوه على يوتيوب) ضيف على كل ده مشكلة ال بنزين 95 وده اللى خلاني اخد قرار عدم شراء ال c180 الجديدة
4- مميزات ال BMW-328i-F30-2015 محرك ما شاء الله جبار معدل تسارعه رهيب و جيربوكس 8 سرعات تحفة. موفرة جدا فى البنزين. بحطلها 92 ومعاه اوضاة اوكتان و مش بسمع فيها اي تسقيف حتى مع الحرق. فراملها احسن بكتير من ال C250
ال بي ام اوسع بكتيييييير من المرسيدس
5- عيوب BMW-328i . فخامة اقل من المرسيدس (الخامات فى العربيتين متساويه فى الجودة و لكن الشياكة و الذوق لصالح المرسيدس). عفشة ال بي ام طريه جدا و مش حلوه فى مطبات الهواء اللي موجودة عل الدائري. الكاوتش RUN-Flat يعني مفيش استبن و لسه واخد نقرة فى الطريق من كام اسبوع عملت بلونه و غيرت الفرده ب 2800 جنيه (مقاس 225/45/17)
6- لو بتصلح فى التوكيل اسعار الصيانة الدوريه متقاربه
الخلاصة:
- لو مش فارق معاك الجري بلاش BMW
- المرسيدس لازم تستحمل ثمن بنزين 95
- اسمع ان الفولفو او ال بيجو عربيات ممتازه ولكن اللى يحدد هوه مدي راحتك للعربية (نصحتي اعمل test drive بنفسك علشان دي ازواق) . و قد ايه التوكيل قوي ماليا و قادر على توفير قطع الغيار مش انك تطلب قطعة غيار تقعد تستناها شهرين تلاتة زي توكيل أودي (عن تجرة زملائي محدش شكر فى التوكيل ده)
- الباسات مش عارف حلو مشكلة الجيربوكس وللا لسة
- الاوكتافيا اعتقد ان سعرها مبلغ فيه ولكن هي السيارة الشعبية الاولي فى رنج الاسعار اللى حضرتك حطيتها و هي عربية ممتازه للى عاوز شياكة لكن طبعا الاداء دي حاجة نسبية حسب طلباتك ايه من العربية
- اخيرا test drive. test drive. test drive
وربنا يوفقك وتلاقي عربيه تحبها و تبقي مبسوط بيها حتي لو Betels المهم تكون مبسوط بيها
متفق مع معظم كلامك :)
لكن حضرتك بتقارن ال c250 القديمه w204 مع عربيتك ال f30 ال 328 و طبعا لا وجه للمقارنه :)
٢٠٥ حصان مع فتيس ٥ سرعات مقابل ٢٤٥ مع فتيس zf ٨ سرعات ..
ايضا الحجم و الوسع لصالح ال f30
اعاده بيع اى مرسيدس افضل كثيرا من البى ام ... دا وضع و واقع السوق :)
السى ١٨٠ الجديده تعتبر غاليه فى التسعير لان لا وجود لاى فئه اخرى مثل ال ٢٠٠/٢٥٠ ... و لو كان فيه تجميع لل ٢٠٠/٢٥٠ كانت حتبقى ب ٤٩٠/٥٠٠ ... و بالتالى حسبتك حتبقى ٦٢ ٪
ايضا كمثال اخر شوف ال 320 مو ٢٠١٠ بكام اليوم بشرط الحاله الممتازه ... رنج ٢٤٠ الف ... و كانت ب ٣٤٥ زيرو ... و حاليا مو ٢٠١٥ الجديده زيرو ب ٤٥٠ ... حسب حسبتك ٥٣٪
الصيانات و قطع الغيار ... المرسيدس اقل بحوالى ١٠٪ ...
المرسيدس الجديده w205 كمساحات داخليه تقريبا مثل f30 ... لكن الشكل القديم w204 اضيق من f30 ...
كل الران فلات به مشاكل البلالين خصوصا للجنط ١٧ و طبعا لل ١٨ ...
و فعلاعمل تست درايف بيفرق كتير و بيحسم القرار ... لان كل واحد تفكيره و متطلباته و نظرته للعربيه غير الاخر ...
و مبروك عليك الوحش ال ٣٢٨ :) استمتع بها و ربنا يباركلك فيها ...
تقبل تحياتى ....
طيب بما اني فشلت الاقي جراند٢٠٠٩ نضيفه و هي عموما نادره و خلاص بعت عربيتي (على فكره انا جايبها لما كانت ٢٠١٢ ب ٣١٨ و بعتها ب٣٢٠ ) و دلوقتي لازم اخد قرار بكره اجيب السي ١٨٠ (المفروض اروح اخلص الاجراءات السبت) ولا ال٣٢٠ ٢٠١٥ جديده ولا ٢٠١٤ كسر زيرو بتعديلات ٢٠١٥ او ٣٢٨ ٢٠١٣
انا بعشق البي ام و عاجباني جدا مع بفرق فخامه لصالح المرسيدس بس انا اتعورت قبل كدا في سعرها جامد و اضطريت اروح للنجمه و مخيبتش ظني في اعاده البيع و كمان خايف الفيس ليفت بتاع البي ام ٢٠١٦ ينزل سعر الي موجوده جامد (صحيح حد عنده فكره عنه؟) و هي حاجه محدش جاب سيرتها و تاثيرها هيكون ايه
انا دماغي ورمت من التفكير و مش عارف اخد قرار برجاء المساعده
طبعا لو واحد من اصحابي حطلي كل الاختيارات دي مع بعض و طلب مني اساعده . انا ممكن اخسره فى ثانية (بهزر طبعا)
خلينا نفك المواضيع من بعضها علشان نقدر نوصل لمنطق يريحنا فى الاختيار
1- رتب اولوياتك : ميزانية . ماركة ووضع اجتماعي . سعر اعادة بيع . كماليات. باور و شد و غرز (حتقوللي انا عاوز كل ده. حرد عليك برضه رتبهم بس حطهم ازواج مع بعض)
مثلا (ميزانية وللا ماركة ووضع اجتماعي) ردك مثلا مزانية و مش مهم الماركه مادامت اوروبي
(كماليات وللا باور وشد) ردك مثلا كماليات عشان انا مش بجري و كل طرقى زحمة
وهاكذا تفضل تحط كل التباديل و التوافيق لحد ما تحط اولوياتك بالترتيب اللي يريحك
2- زيرو وللا مستعمل . من خبرتي فى المرسيدس ال C250 كان فيها و مازال عيب مساعدين امامي و خلال 4 سنين عملت 64 الف كلم و غيرت جوز المساعدين الامامي فى الضمان اربع مرات . وواحد صاحبي عنده اختها غير الامامي مرتين و الخلفى مره. وواحد صاحبي تاني عنده C180 2010 غير فتيس لكن للاسف خارج الضمان . حتقوللي مش ممكن حقولك يمكن صدف ولكن دي خبرتي
ال BMW 520 2011 برضه من زملائي ظهرت مشاكل كومبرسور و دينامو و تزييق سقف بانوراما و عفشة فى BMW X3 2013
علشان كده لو حتشتري مستعمل لازم تفحص فى التوكيل و تجيب تاريخ العربية ولو لقيت ان الصيانة مش منتظمة نصيحتي ما تخاطرش
بالنسبة ل BMW و مرسيدس بيعرضوا عربيات مستعملة ومعاها ضمان 6 شهور
بتبقى اضمن شوية و اغلي من السوق. لكن خلي بالك اغلب العربيات دي بتاعت test drive و بيطلعوا بيها معارض الساحل و الغردقه فلازم تفليها كويس جدا
3- الفيس ليفت فى ال F30 BMW مش حيكون جوهري . من على النت حيحصل تغيير بسيط فى شكل الاكصدام الامامي و الشبكة الاماميه و فيه كلام ان الفوانيس الخلفية حتبقى LED لكن مش اكيد انها حتبقي standard فممكن تنزل اوبشن بفلوس. مفيش كلام عن تغيير تابلوه او عدادات
4- سعر اعادة البيع انا مش بنسبة لسعر الشراء الاصلي ولكن بنسبه لسعر شراء نفس السيارة زيرو موديل السنة و السبب طبعا انهيار سعر الجنية المستمر امام الدولار
5- تحديد سعر البيع محتاج صبر و تعرف قيمة عربيتك كويس. لما جيت ابيع ال c250 التجار حطتلي 275 الف رحت و شوفت العربيات المعروضه بالسعر ده و شفت حالتها و بعد كه حددت السعر اللي عاوز ابيع بيه وقعدت شهرين علشان صممت على 300 الف لحد ما جالها زبونها اللي لف و شاف عربيات كتير لحد ما جالي وشاف اهتمامي بالعربية مافيهاش خربوش و صيانة توكيل وصالون زيرو (النصيحة البيع و الشراء عاوز صبر و نفس طويييييييييل)
6- لو سألتني عن ال C180 الجديده فانا ما انصحكش علشان سعرها مبالغ فيه و مرسيدس شطار فى تعطيش السوق و عمل قائمة حجز طوييييله علشان يرفعو السعر. بنزين 95 اساسي و ممكن يكون سبب اساسي ان سعر اعادة البيع يبقى واطي. و لو توكيل الفولفو محترم (انا لم اتعامل معه) و عنده مخزن كويس لقطع الغيار يبقى انصحك تروح تجربها يمكن تعجبك عن ال c180
ربنا يوفقك للى فيه الخير
المرسيدس الجديدلازم ٩٥ .... لو مش فارق معاك فرق السعر للبنزين ... توكل على الله فيها لانها من وجه نظرى افضل تصميم و اختيار ...
لو عايز قوه موتور مفيش قدامك غير ال ٣٢٠ او طبعا ال ٣٢٨
لو عايز توفر اكتر ابحث عن ٣٢٠ كسر مو ٢٠١٣ فى رنج ٣٥٥ الف و هى هى مثل مو ٢٠١٥ لكن شاشه اصغر ...
و الفيس ليفت لها نازل لمو ٢٠١٦ ... و اكيد حيقلل القديم ...
لو يهمك سعر اعاده البيع يبقى مرسيدس وش :) و مع تكلفه فرق البنزين ... ايضا المرسيدس حتكون افضل ...
صديق لي مسافر و عارض عربيته سى ١٨٠ الجديده للبيع كسر ٤ الاف كم ... اكتر من تاجر عارضين عليه كاش ٤٠٥ .. لكن هو عايز ٤١٥ .... و سعرها الرسمى زيرو ٤٣٠ ...
لو لسه حتحجز المرسيدس ... مفيش عندهم عربيات ... و التسليمات حتكون فى يناير ٢٠١٦ لمو ٢٠١٦ ...
تحياتى ...
انا متشكر ليكم جدا جدا انا فعلا رغم بنزين ٩٥ المرسيدس هتكون افضل كاعاده ببع و انا اخري ١١ او ١٢ الف كيلو في السنه و بعد سنتين فرق سعر البنزين مش هيكون كبير للدرجه مقابل الخساره الكبيره في سعر العربيه ال BMW و انا غالبا خلاص هاخدها من واحد عايز يبيع الوصل هتبقي ب ٤٣٠ بدل ٤٢٠ و دا اوفر لقطه الصراحه الحمد لله على كل شيء بس انا لسه لاغي الحجز في يناير بعد قصص المواتير الي باظت و الكلام دا الي مش عارف صحته فغالبا هتوكل على الله فيها و ربنا يسترها و خلينا في خانه الي بيخافوا مش الي بيخوفوا
عندي كام استفسار لو امكن هو يعني ايه كراسي نص كهرباء و هل زراير الكراسي في باب السواق ولا ايه؟
هل فيه سخانات كراسي؟
هل حد سمع عن التغليف الشفاف بتاع العربيه و مين احسن حد بيعمله؟
هل حد عنده فكره عن سعر تركيب الحساسات ورا و قدام كام للc180 حاجه تنرفز الصراحه عربيه بالسعر دا استخسروا فيها حساسات؟
هل العربيه عاليه عن ٢٠١٢ ؟ علشان شوارعنا الجميله و هل الران فلات ناشف زي الBMW?
ا
انا اسف على كتر الاسئله بس انا لتاني مره هسيب حبيبتي bmw علشان اتجوز بنت الناس المحترمه جواز صالونات عقل من غير عواطف يعني
شكرا جزيلا تاني