عرض للطباعة
ربنا رزقني بمريم 5 سنين و خالد و سلمي توأم 3 سنين…
المشكلة مع خالد لنه بيعمل علي نفسه اوقات كتير… اظن انه بيكسل يقوم من علي اللعب او الكرتون عشان يروح الحمام ..
طبعا امه بتتنرفز و تزعق و احيانا تضربه و احيانا بيتعاقب بان مفيش لا تابلت ولا موبايل و لا كرتون…
المعاملة بين التلاتة واحد و مش بنفرق بينهم و الاهتمام واحد. .
هل دي مشكلة عادية? ولا لازم نعمل حاجة تانية …
انا مش عاجبني حوار الضرب ده وشايف انه غلط و هياثر علي شخصيته و مش هيجيب نتيجة ..
متضربش عشان ميعندش و يكون عنده تنافر من موضوع الحمام
انا عندى بنت ١٠ سنين وولد ٨ و بنت ٣
الولد لحد ٥ سنين كان شويه كده و شويه كده البنتين من سنتين و نص الحمد لله ولا حاجه فهو الولاد كده كده بيتاخرو فى الموضوع ده و خصوصا مع اللعب و كده
انت من نفسك كل شويه دخله الحمام و اعمله مكافاه لما ميبلش نفسه و متنساهوش فتره و تزعلو منه بعد كده و زى مانتا بتعمل عقاب من الحاجات اللى بيحبا و مكافاه انه ياخد الحاجات اللى بيحبها هو ده الطريق و ربنا معاكم
كان عندي نفس المشكلة مع أولادي.....
أولا: الموضوع ده بيبقي ليه عوامل كتير منها زي ما حضرتك قلت بالظبط انه بيقعد لفترة طويلة أمام الكمبيوتر أو الكرتون فبالتالي ممكن ينسي نفسه أو ممكن يكون بيغير من اخواته أو مثلا بيشوف أفلام رعب أو بيسمع عن حاجات مخيفة.
ثانيا: بلاش الضرب لأن ده هيؤثر علي شخصيته وممكن يعند معاكو { عارف المثل اللي بيقول من كتر الضرب جتته نحست }...... والسن ده أساسا مش هوه سن ضرب الأطفال .... حاول تفهمه ان اللي بيعمله ده غلط ولو عملها تاني عنفه والدرجة التالتة انك تحرمه من حاجه يكون بيحبها.
ثالثا: خليك وراه ..... يعني مش لازم تسيبه لما يعمل علي نفسه بالعكس حدد مواعيد متقاربة وفي هذه المواعيد أطلب منه دخول الحمام حتي لو قالك مقولة الأطفال الشهيرة ( مش مزنوق يابابا )..... هتقوله: معلش حاول مش هنخسر حاجة.
رابعا: الطفل بطبعه بيبقي معدل ال ( i. Q) بتاعه عالي يعني ذكي جدا وعلميا الجلوس لفترات طويلة أمام الكمبيوتر و شاشات العرض بيحد من هذا المعدل و بيولد درجة من التبلد و ( slow response ) أو ضعف الأستجابة عند الطفل.. الأحسن من كده حببه في الرياضه من خلال ممارستها زي الكاراتيه مثلا.
حضرتك اعمل حسابك ان البنت غير الولد وماتقرنوش باخواته البنات ممكن ميكونش حاسس بنفسه فعلا
بعض الولاد بيحتاجوا تعويد يعني حضرتك و مامته تقولوله كل ساعتين يروح للحمام
وممكن الموضوع يمتد لحد سنة تدريب اصبروا عليه لحد مايكمل 4 سنين
الحالة دي محتاجة تعليم وتدريب وكشف طبي ان لزم الامر مش عقوبة
العقوبة البدنية في حالة وحده بس لو بيعمل حاجة ممكن تهدد حياته وسلامته والموضوع لا يحتمل الانذار والتحذير والتدرج لازم يتضرب ويخاف بجد لكن الحالة دي محتاجة تدريب مش ضرب
فحضرتك كلم مماته عن انها كل شوية تفكره يروح وتشجعه كل مره يروح الحمام فيها
الضرب دائما بيجيب نتيجة عكسية وبيسبب كراهية وشخصية ضعيف فيما بعد . لا انصحك بالضرب بل اتبع معه اسلوب الثواب و العقاب بان تكافئه على الصح و تحرمه مما يحبه عندما يخطأ
اؤيد بشدة فكرة انشغال الاطفال بالرياضة والعقل السليم فى الجسم السليم
العيال عموماً يببقى واقف يحرك رجله يمين وشمال ومستخسر يروح الحمام لاحسن اللعب يخلص
بالتعود ان شاء الله وبالتوفيق
خليت المدام تشوف الموضوع و ده ردها :
المشكله انه لما يحس بقله اهتمام من امه وزياده اهتمام شويه باخواته بحس انه بيعاقبها وبيعمل علي نفسه وكمان بيعمل ستول بالذات لانه عارف ان دي اكتر حاجه بتدايقها
يعني مثلا امبارح كان نايم ومامته خدت اخواته البنات وراحت تدريب الجمباز بتاع البنت الكبيره وصحي وهي ف التدريب وكان. مع باباه فكان العقاب بتاع الام انه يعمل ستوول علي نفسه
ولما الام قعدت فتره تجبله لعب وتهتم بيه بطل يعمل علي نفسه…
ربنا يخلي لك أولادك أ/ مزازنجيالأولاد في العادي أنهم بتأخروا شوية في التواليت والنطق كمان ، فدا عادي – لكن للإستفسار هو بيعمل كدة وهو صاحي يعني خلال النهار ؟ ولا وهو نائم ليلاً فقط ؟في حالة النهار – يرجى عرضة على طبيب لإحتمالية وجود سبب عضوي أو نفسي قوي .أما في التبول اللارادي الليلي فدا عادي في الذكور لفترة طويلة حتى 6 سنوات وعندها يبدأ القلق ولابد من عرضه على طبيب .وعلاجه المؤقت خلال هذه الفترة :-1)عدم شرب سوائل بعد صلاة المغرب تقريباً أو ما شابه ( لبن / برتقال / يوسفي / ... )2)دخول التواليت قبل النوم مباشرة .3)الإستقياظ مرة بعد النوم بساعتين ، ومرة قبل صلاة الفجر ، وإذا كان بيستقيظ متأخر مرة أخرى على الساعة التاسعة مثلاً .4)عدم ضربه أبداً أو عقابه أمام أخواته أو أي حد .5)مساعدة الأم في نقل مفروشات السرير والمشمع إلى الحمام وغسلها معها لتحمل مسؤلية خطأه .6)مكافأته عند عدم حدوث ذلك .وربنا يشفيه إن شاء الله ويهديه ويهدي جميع أولادنا .
أنا أسفة ما شوفتش مشاركتك السابقة
( ستول ) !! ياريت تعرضه على طبيب - صعب أوي عليه وعلى الأم وممكن يكون مش عنده القدرة أصلاً على التحكم ... لأن العادي في الذكور موضوع التبول اللاإرادي .
ربنا يشافيه ويعافيه
وياريت تطمنا عليه
أنا كنت داخل الموضوع علشان أقول نفس الكلام المحترم دهاقتباس:
المشاركة الأصلية كتبت بواسطة friendship7897
ده كلام سليم
طبعا موضوع انه يكون بيلفت الانتباه لنفسه ده صحيح, انما حتى دي علاجها مش الضرب. الطفل لما بيكون عايز اهتمام زيادة من مامته ساعات حتى الضرب و الزعيق بيكون بالنسبة له أهتمام. عارف ايه أكتر حاجة بتأثر في الطفل في الحالة دي؟؟ التجاهل التام. يعني لما يعمل كدة متعمد هي تزعل منه و تخاصمه مترضاش تكلمه, غالبا حيحاول يستفزها بحاجات تانية كتير بس هي لازم تثبت على موقفها. ده ممكن يأثر فيه أكتر كتير من الضرب و الاهانة.اقتباس:
المشاركة الأصلية كتبت بواسطة mazagangee
و بعدين أنتوا كمان المفروض تحاولوا تتجنبوا الحاجات اللي بتزعلوا. يعني هو أكيد مرواح التدريب مع اخواته ده بالنسبة له فسحة, فلما هما يروحوا من غيره هو كدة بيحس انه متعاقب من غير سبب و بيحاول ينال اهتمام امه حتى لو بطريقة سلبية.
بصفة عامة الضرب مش حل و بصراحة هو تنفيس لغضب الأم أو الأب أكتر منه عقاب, بدليل انه مش بيجيب النتيجة اللي هما عايزينها ده غير انه بيخلى الولاد يتعاملوا مع بعض بعنف و يضربوا بعض لأنهم بيتعلموا منا انه طريقة مقبولة للتعامل مع الحاجة اللي تضايقنا.
يا ريت تحاول تلغي موضوع الضرب ده خالص رغم كل الضغوط و الاستفزازات بتاعة الولاد. ربنا يعينا كلنا على ولادنا و يجازي أبائنا و أمهاتنا خير , بجد تربية الأولاد محتاجة صبر و طولة بال و مجهود جبار
بعيدا عن وجود سبب عضوى و دى مش هتعرفها الا لو الموضوع زاد قوى و لازم تشوف دكتور ... كلام المدام سليم ... ساعات بيكون نوع من انواع الاحتجاج على الظلم من وجهة نظره .... الحل فى رأيى انك تميزه بحاجه لما تبقى عارف انه ممكن يجيله الاحساس ده ... يعنى مثلا لو التدريب .. مش لازم تاخد اخته لتوأم و تسيبه و لو هتاخدها يبقى تعمل حسابك اول ما يصحى تاخده و تنزلو تعملو اى حاجه عشان ميحسش انه هو اللى متساب فى البيت لوحده .... كده يعنىاقتباس:
المشاركة الأصلية كتبت بواسطة mazagangee
ربنا معاك و الموضوع ده بيحتاج صبر و تمسك اعصابك و اعصاب المدام لان العنف بيجيب نتيجه عكسيه
ممكن حاجه برضه دخله جمباز هو كمان ... شعور بالنتماء لنادى او التعامل مع ناس تانيه بيخليه يعرف انه مش محور الكون فبالتالى حساسيته لتصرفاتكم خصوصا مع اخواته هتقل ... بس برضه خلى بالك ان اخته التوأم هى اللى هو بيبص عليها اكتر من الكبيره
ربنا يخليهوملك
ولادى فى سن ولادك بالظبط و ساعات بيعملوا كده بس عندى مامتهم كل شويه تفكرهم و تقولهم يدخلوا الحمام.
الموضوع ده عاوز صبر لانى ساعات بالاقى مامتهم بقت بتبقى عارفه انهم عاوزين يدخلوا الحمام من طريقتهم فى الوقفة و تحريك رجلهم و تقوم مفكراهم و كل ده بسبب انه مش عاوز يسيب اللعب.
لاتضرب ابنك فهو معذور ولاذنب له فيما يفعله حتى لايتعقد نفسيااقتباس:
المشاركة الأصلية كتبت بواسطة mazagangee
دى ظاهرة اسمها التبول اللاارادى
وابنى كان يعانى منها وكان عمره حوالى ثمان سنوات
وده بيكون نتيجة ضعف فى عضلات الحالب والمسؤلة عن حبس البول لحين تصريفه اراديا
ومع انى كنت اتابعه شخصيا بان لايشرب سوائل كثيرة ويذهب للحمام ليتبول قبل نومه وانى اصحيه من نومه بعد ربع او نصف ساعة لتبول مرة اخرى كان برضه يتبول
وكانت والدته تغضب منه وتنهره ومنعتها من ذلك ولكنى كنت اعامله بلطف وذهبت به لدكتور وكان علاجه بسيط جدا عبارة عن دواء هرمونى ذوبخاخة يتم رشه فى فتحتى الانف يوميا وكان تمنه حوالى 140 جنيه استخدم منه عبوتين فقط والحمد لله بقى تمام وعمره الان 29 سنة
اذهب به لدكتور المسالك البولية ليعطيه هذا الدواء الهرمونى وبصراحة انا نسيت اسمه
ولاتضربوه او تعنفوه بل عاملوه بلطف ولاتشعره انه عنده مشكلة ولازم يتعود يروح للحمام فى مواعيد محددة ومن تلقاء نفسه مع تمنياتى لابنك بالشفاء العاجل