الموضوع: تقرير عن أوبل أسترا j هاتشباك بعد 40000 كم وسنتين ونص

أوبل أسترا J هاتشباك

تقرير حصري لنايل موتورز بعد 40000 كم وسنتين ونص استخدام وبعد السوفتوير الجديد

أولا: مقدمة

- التقرير بناءا على وجهة نظري الشخصية عن العربية موديل 2012 وماشية حوالي 40000 وبقالها حوالي سنتين ونص .. كوزمو هاتشباك

- ده أول تقرير ليا على نايل موتورز .. وللأسف معرفتش أغير الخطوط وألونها

- نصيحة .. دايما استمتع بأي نعمة ربنا يديهالك .. واحمد ربنا عليها ومتبصش لغيرك

- أنا مركب System كامل بشاشة 7 إنش وكاميرا خلفية و GPS وبلوتوث موبايل و USB لأن العربية مكانش فيها USB في 2012

- حأحاول أكون موضوعي قدر المستطاع عشان أقدر أفيد اللي عاوز يشتري العربية

- التقرير حيكون عملي ومختصر قدر المستطاع

- أنا سقت عربيات كتير بالترتيب على حساب طول المدة : فيات جراند بونتو 2009 دوالوجيك – أوبل كورسا مانوال – شاهين - فيات 127 TOP- ياريس أوتوماتيك – لانوس – كيا سيراتو 2007 أوتوماتيك – رينو سانديرو أوتوماتيك 2012 – كيا سيراتو اوتوماتيك – سكودا أوكتافيا A7 .. ده إللي انا فاكره

ثانيا: صور من الطبيعة

مابحبش أجيب صور من النت عشان بتخلي التقرير بلاستيك

وكان نفسي أصورلكم صور بليل عشان الإضاءة والكلام ده .. بس للأسف ملحقتش

المقدمة الهجومية والنقلة النوعية في التصميم الخارجي



المؤخرة والتصميم الإنسيابي الجميل



وديه صورة للعربية من الجنب تبين الخطوط الإنسيابية ..



التابلوه والخامات واضحة شياكتها وفخامتها في الصورة



الصالون واسع .. والفرش شيك جدا .. والقعدة مريحة .. زي ما هو واضح في الصور





ثالثا: الإيجابات

1- جودة التقفيل والخامات المستخدمة 9.0/10

2- تصميم السيارة من الداخل أكثر من رائع سواء التابلوه أو الدركسيون أو شكل العدادات مع الإضاءة الجميلة 9.5/10

3- الصالون ممتاز وواسع .. ومناسب جدا لعائلة صغيرة .. والكراسي مريحة جدا .. مع الفرش الشيك .. 9.5/10

4- الشنطة حجمها رائع بالنسبة لعربية هاتشباك 9.5/10

5- الإستابيليتي ممتازة جدا 9/10

6- العفشة أكثر من رائعة لا ناشفة بزيادة ولا العربية مفككة .. على الرغم من الجنوط ال 17 9.5/10

7- مستوى الأمان عالي جدا .. فرامل ممتازة جدا مع ABS و EBD وTraction Control .. تحس فعلا بالأمان وانت سايق على سرعات عالية مع 6 إيرباجز و5 نجوم في إختبارات السلامة 9.5/10

8- التصميم والشكل الخارجي ممتاز من وجهة نظري .. العربية شكلها جذاب جدا

9- الإعتمادية بالنسبة لعربية أوروبي أكتر من ممتازة8.5 /10

10- التكييف للراكب قدام جيد جدا خصوصا إنه دوال زوون 8/10

11- الإحتياجات الأساسية للعربية بالنسبالي موجودة كلها .. أماكن تخزين كتير وكبيرة جوه العربية .. مالتيفانكنشن .. كروز كنترول .. وسع .. 9/10

12- العزل جيد جدا .. ممكن أديله 7.5/10

رابعا: السلبيات

1- السحب على السرعات القليلة وخصوصا الطلعة ضعيف .. لكنه اتحسن كتير بعد السوفتوير الجديد 6.5/10

2- كان فيه كركرة ورجة بتحصل لما تبقى على الD ودايس فرامل .. أو لما تتحرك فجأة على السرعات العالية لكن اختفت تماما بعد السوفتوير الجديد ويمكن ديه اهم حاجة كانت منغصة على الأستراوية حياتهم لكن اتحلت خلاص الحمد لله

3- كان فيه نتشة خفيفة في الفتيس بين بعض النقلات .. بس السوفتوير حلها برضه الحمد لله

4- فيه صوت هوا من عند مراية السواق على السرعات العالية وعشان كده أدي للإيروداينامكس 6 /10

5- التكييف بالنسية للقاعد ورا .. أحيانا بيكون ضعيف في أيام الصيف اللي بتبقى حر بزيادة .. بالإضافة إلى إن مافيش فتحات تكييف خلفية التكييف للي قاعد ورا 7 /10

6- العربية في 2012 مكانتش بتنزل ب USB ولا Parking Sensor ولا Bluetooth Mobile مع إن تجهيزاته وزرايره موجودة.. بس تم تركيب الكلام ده بال systemالكامل اللي جيبت سيرته فوق ما عدا الParking Sensor

7- فيه ناس اشتكت من مشاكل في التيل والطنابير .. بس أنا الحقيقة محصلتليش المشكلة ديه.

8- صوت الموتور عالي سنة وخشن كعادة الأوبل لكن العزل كويس جدا فمبتحسش بيه أوي


وأخيرا:

- من باب الإنصاف .. العربية قبل السوفتوير حاجة .. وبعد السوفتوير حاجة تانية خالص .. فعلا نقلة نوعية .. العربية دماغها نضفت وفيه سلاسة واضحة في النقلات

- العربية إجمالا صفقة ممتازة بالنسبة لسعرها ولو قارنتها بالعربيات التانية إللي في فئتها .. مش مثالية لكنها جيدة جدا ومافيش حاجة كاملة في الدنيا .. الكمال لله وحده .. أقدر أديها إجمالا 8/10

- أتمنى أكون غطيت بحيادية معظم جوانب العربية وأكون أفادتكم

حصري لنايل موتورز

مع خالص تحياتي
عمار