صباح الفل؟ عايز حد يفيدنى هل الجوك عربية كويسة؟ ولا ظهر فيها مشاكل؟ عايز اشتريها لأختى وبنفاضل مابينها ومابين اوبل استرا 2015 عشان فى نفس الثمن؟ ممكن حد يساعدنى ؟
صباح الفل؟ عايز حد يفيدنى هل الجوك عربية كويسة؟ ولا ظهر فيها مشاكل؟ عايز اشتريها لأختى وبنفاضل مابينها ومابين اوبل استرا 2015 عشان فى نفس الثمن؟ ممكن حد يساعدنى ؟
دي فئه ودي فئه...الجوك في فئتها متفوقه وتقفيل انجليزي واوبشنز عاليه جدا في مقابل تمنها..بس الكنبه الخلفيه ضيقه وشنطتها في الموديل 2015 اوسع من قبل كده لكن يادوب تفي بالغرض..لكن تظل الجوك ركوبه ناعمه وسلسه ومشاكل شبه معدومه فيتيس وموتور حلوين جدا واوبشنز رائعه وعفشه قويه وفوق كل ده خمس نجوم في الامان وعاليه عن الارض
لو لبنت او ست فالجوك احلي ... عشان عالية
طيب انا هقولك شئ شوف التيدا الجديده انا لسه شايفها امبارح عربيه مفيهاش غلطه ومناسبه جدا للبنات انا معرفش حاجه عن الجوك مجرد اقتراح ومش هتخسر حاجه لو شوفتها وبالتوفيق
والله dreslam قال اللي كنت عايز أقوله .. أنا معايا جوك 2014 مش المعدلة الجديدة وعربية ممتازة الحمدلله .. مريحاني جداً .. سحبها حلو وموتور وجير تمام قوي .. اوبشنز تمام عالية عن الأرض وثابتة جداً حتى مع السرعات العالية .. وأكتر حاجة عجباني فيها العزل الداخلي ممتاز .. عيبها فعلأ موضوع الشنطة ضيقة.. الكنبة الخلفية ضيقة .. لو عائلة صغيرة أو مبتركبش ناس كتير يبقى العربية هتنفعكم .. فيه عيب كمان يمكن متقالش وهو تانك البنزين اخره 40 أو حاجة و اربعين لتر .. مش كبير للأسف .. بس مش ممثلي أي مشكلة الموضوع ده .. ده غير إنها مش كبيرة في الحجم يعني سهل تعدي بيها بين العربيات أو الأماكن الضيقة .. عربية ملمومة بمعنى أصح .. لو حضرتك في الشيخ زايد ممكن افرجك على العربية على الطبيعة لو تحب .. وبالتوفيق إن شاء الله ..
طالما لبنت يبقى ارشحلك الجوك و ذلك لا ينقص من الاسترا فى شىء
شباب سؤال لو سمحتم لنفس الموضوع لاني لما شوفت الجوك بقيت محتار جدا بينها وبين البيجو 3008
امكاناتها وسعرها افضل بكتير من البيجو 3008 لكن سؤالي في الكنبه الخلفيه هل تاخد اتنين مرتاحين ولا الكنبه الخلفيه للاطفال بس
تاني شي هل هيه بتاعة مشاوير طويله يعني ساعتين ثلاته باستمرار ولا جوه المدينه بس
انا محتار بينها وبين البيجو 3008 موديلات 2015
بالسعوديه سعرها كاش فل اوبشن 73 والبيجو الاستاندرد بس 82000 اما الفل اوبشن للبيجو 93000 ففيه فرق واضح بالسعر ده غير ان القوه الحصانيه للجوك اعلي لكن المساحه الداخليه هيه المشكله
معايا جوك 2015 عاملة 5000 كيلو مفيهاش مشاكل
الأوبشنز وعوامل الامان والثبات والشكل مقابل تمنها معقول جدا
استاذ عمر .مش فاهم معقوله جدا دي تقصد ان الاوبشن الي فيها مش عالي ولا ايه
وبخصوص المساحه الداخليه .كام واحد بيقدرو يجلسو مرتاحين فيها اقصد الكنبه الخلفيه
لاني عاوز اجيبها بس هتكون لاسره مش لفرد يعني لازم تكون مريحه في الجلوس لمدة مثلا ساعه او اتنين للناس الي راكبه بالخلف
ايه رايك
عربيه تقفيل انجليزى ومتقدمه جدآ ثبات وتسارع ممتاز وعاليه عن الارض وخامات الصالون ممتازه ومثبت سرعه وesp من تجربتي لها افضل من الاوبل فى الاعتماديه اكيد وكماليات والشكل
الف الف شكر يا جماعة شكرا عالمساعدة جدا.... وشكرا استاذ gundal ... انا كده كده رايح معرض اوتوماك وهتفرج على كلو بإذن الله ... متشكر جدا مره تانية
اقتباس:
المشاركة الأصلية كتبت بواسطة gundal
سؤال جديد معلش ..... اخبار اسعار صيانتها ايه واسعار قطع غيارها ايه لو تعرف؟ وايه افضل توكيل ليها؟
اقتباس:
المشاركة الأصلية كتبت بواسطة moh-crv-2000
معقولة اقصد بيها صفقة رابحة
بص انا هقولك كل الأوبشنز
الفرامل والأمان : ABS, EBD , BA , BRAKE LSD + 4 air bags
الثبات : VSC الي هو ESP في العربيات الكوري الي هو ELECTRONIC STABILITY CONTROL
اهم ميزة مش موجودة غير في الجوك انك بتحكم في الكمبيوتر ما بين NORMAL / SPORT / ECO
الفرق بيهنهم بيكون في تقل الطارة وتسارع العربية وتوفير البنزين
العفشة : راضية بس طبعا مش مريحة بنسبة 100% عشان الجنوط ال 17
الدلع : داي لايت ليد امامي وزينون وليدات خلفية ، مثبت سرعة ، محدد سرعة ، كمبيوتر رحلات ، فوجات امامية / خلفية ، مساحات مطر اوتوماتيكية، مرايات كهرباء / ضم كهرباء ، جنوط 17 مقاس 215/55 ، كمبيوتر للسائق ، زجاج فاميه جانبي وخلفي ، تكيف اوتوماتيك ، طارة مالتي فانكشن ، بلوتوث ، USB /AUX / IPOD/CD
الحاجة الوحيدة الي مش موجودة فتحة السقف
فاعتقد كل الأوبشنز ديه في عربية يايابني تقفيل انجليزي وبالسعر ده تبقى صفقة كويسة
المساحة الداخلية : الراكبين الأمامين مرتاحين جدا وسافرت بيها مسافات طويلة بدون اي تعب
الخلفية : متنفعش لناس كبار لأنها ضيقة حدا بصراحة
الشطنة مساحتها بقت معقولة عن الشكل القديم 356 لتر
افضل وكيل : السبع ، اوتو ايجيبت
انا شريها من السبع واول صيانتين محانا مدفعتش مليم وغيرت الزيت مرتين
اسعار الصيانات : زي اي عربية بالنسبة للمصنعيات ، فلتر الزيت ب 70 جنيه ، فلتر الهواء كل 20 الف ب 260 جنيه ، بوجيهات كل 100 الف ب 650 جنيه ، تيل فرامل 650 جنيه
من الآخر ميعبهاش غير ضيق الكنبة الخلفية
يا باشا انا متشكر جدااااا وربنا يباركلكوا فيها وفى عربياتكو
عربيه هايله كانت معايا 2014 ...ضيقه جدا من ورا ....قطع غيار غاليه...التيل بعد الضريبه ب 900 جنيه وبيتغير بسرعه قبل ال 20000 كيلو يعني ...ده غير اني كنت سامع اسعار عجيبه يعني الكوبلن مثلا ب 18000 جنيه زي القاشقاي(ده مش اكيد )بس الاسعار دي حد حاططها في المنتدى هنا ....هي هايله بس الوكيل مش مهتم بيها الصراحه
طيب هي التفويلة بتعمل كم لتر وبتمشي كام كيلو تقريبا
التانك 45 لتر لو مفيهوش ولا نقطةاقتباس:
المشاركة الأصلية كتبت بواسطة mustafa_farouk
التفويلة داحل المدينة 450 - 500 كيلو على حسب الدوسة
على طرق السفر 500 - 550
الاسترا محتاجه عنايه خاصه و مش هتنفع بنت في الاعتماديه
أنا اسف جداً جداً على تأخري الشديد في الرد بس غصب عني .. بالنسبة للصيانة أنا عامل بيها 27 ألف تقريبا لغاية دلوقتي .. أكتر صيانة كلفتني كانت ال 20 ألف غيروا فلتر هوا وتكييف وزيت 10 الاف وخدو 1700 جنيه إجمالي الفاتورة :120146bاقتباس:
المشاركة الأصلية كتبت بواسطة ggabal
أنا شايف إنها غالية شوية .. مقارنتهاش بحاجة تانية بس أنا حابب العربية الحمدلله .. تيل الفرامل الأمامي (طقم تيل أمامي) غيرته ب 800 وشوية وده إجمالي الفاتورة بالضريبة وكله .. مش فاكر كام بظبط بس غيرته عند صيانة ال 25 ألف وده بيختلف من شخص لشخص حسب طبيعة سواقتك وضغطتك على الفرامل وبتمشي في زحمة كتير كل شوية فرملة .. بس اللي عرفته متوسط من 20 ألف ل 25 ألف ممكن تغير تيل والله أعلم .. غير كده الصيانات عادية في التكلفة 200 وشوية تقريبا لو مغيرتش زيت .. بالنسبة لقطع الغيار التانية معرفش الحقيقة غير المواضيع اللي في المنتدى .. الحاجة الوحيدة اللي كنت سألت عليها كانت المرايا قالوا تعمل في حدود 750 علشان كهربا وطي الكتروني وكده .. وأنا بتعامل مع اوتو ايجيبت في أبو رواش ومستريح معاهم جداً .. دي وجهة نظري ..
بعتذر مرة تانية لتأخري في الرد :)