-
الندم على عدم الرد
كتير منا بيتعرض لمضايقات فى الشغل او فى الحياه الشخصيه و فى بعض الاحيان الظروف بتجبره على انه يمتنع عن الرد عن هذه المضايقات او يرد رد ما يرجعلهوش حقه
مثلا مديرك فى الشغل ضايقك بكلمتين انت ما قدرتش ترد عليه علشان ما تكبرش المشكله تعمل ايه فى الحاله دى هل ترد عليه بنفس اسلوبة و تغامر بوظيفتك ........هو عارف انه يقدر يأذيك او يضرك و علشان كده بيضايقك و هو شبه متأكد انك مش هترد عليه
نفس الكلام لو حد كبير فى العيله سنا ممكن يهزر او يتريق بأسلوب مش لائق و مش هتقدر ترد عليه لأنك الصغير و لو رديت عليه تبقى ما بتحترمهوش
المواقف دى بتحصل كتير معايا شخصيا على الاقل ... لكن ازاى تتخلص من الضيق و الندم الى بيجيلك لأنك ماردش الرد المناسب
-
لو رديت علي كل واحد ضايقك ,مش حتبقي فاضي لشغلك ولا لحياتك
دا غير ان الرد مش حيكسبك حاجة بالعكس حيخسرك ,يعني في حالة مديرك حتخسر وظفتك
بس في حاجات معينة مينفعش معاها السكوت وعدم الرد , لما يكون في شئ بيهدد حياتك او حياة اسرتك
غير كدا ارمي ورا ضهرك
-
ماشى بس لو ماردتش هفضل فاضل الموقف ده علطول خصوصا لو فيه مس للكرامه
-
أهم حاجة إمتصاص الغضب قبل الرد حتى لا تقع فى أخطاء تندم عليها . على الأقل إمتص الصدمة الأولى و دى عايزة تعود نفسك عليها مع الوقت .
تانى حاجة يكون عندك ذكاء فى الرد اللى ما تلبس فيه غلط
-
زي مافيه ضرب يوجع وميعلمش. في كلام يحرق وميغلطش صاحبه.
بس ده في اخر.مرحلة بعد مراحل الطناش وتكبير الدماغ.
-
اللي يتكلم يتكلم
كبر دماغك
هو الكلام بفلوس ؟ :)))
-
كل الردود إتفقت على حاجه واحده ..بس بأساليب مختلفه ..خلاصة الكلام ..لا غضب إلا فيما يستحق الغضب ..مثل الدين والعرض ..غير كده ..خليك واعي ..وإحرق وما تتحرق
-
للاسف في فئة وقحة من البشر بتفتكر ان عدم الرد ضعف وسذاجة مش ادب او احترام وبالتالي لازم يكون التعامل معاهم حاسم والكلمة بكلمة والاهانة باهانة اكبر حتى لو اكبر في السن لانه اولى بيه يحترم نفسه وسنه، واي تواصل او علاقة في الكون ان مكانش اساسها الاحترام فهي لا تستحق الاستمرار حتى لو عمل وفي النهاية اللي بيني وبينه عمل بأديه بشكل معين واي تجاوز غير مقبول على الاطلاق، بس اهم من الرد الحكمة ووزن الكلمة قبل الرد بها حتى لا يؤدي ذلك الى مشكلة اكبر
-
الانسان الناجح هو اللي بيعرف امتى يتكلم و امتى يسكت, و لما يتكلم يقول ايه و يمتنع عن ايه..
لو انت سكاتك في موضوع ما سببلك شعور بالندم يبقى انت مش مقتنع ان تصرفك ده كان سليم..
في ناس بيبقوا دايماً واخدين الحياة قفش و كرامتهم بتنقح عليهم شويتين, الناس دي بتتعب اوي في تعاملهم في مواقف زي دي لانهم مبيعرفوش يمسكوا لسانهم, فغالباً ردودهم بتكون متهورة و بتزيد المشكلة سوءاً..
الحل الامثل انك تحط الامور في نطاقها السليم حسب اهميتها و متديش موقف معين اهتمام اكتر مما يستحقه,
في بعض المواقف هتتطلب تسيب فيها كرامتك على جنب و تتعامل بموضوعية, زي لو موقف مع مديرك مثلاً, مينفعش ابداً بأي حال من الاحوال انك تخلي نفسك في موقف راس براس معاه لانك هتكون انت اللي خسران في الاخر, إلا بقى لو مديرك عقليته مرنة فتقدر وقتها تكسبه بالحجة مش بالخناق..
-
الموضوع دا مش سهل خصوصا لو بتتعامل مع عدد كبير من الناس مختلفة الثقافة و المستويات الاجتماعية.
الخلاصة ... حط حدود لتقبل السخافات دى و مع الوقت اللى حواليك هيعرفوا حدودك و لما حد يعديها وقفه عند حده بكل حزم. بعد فترة هتستريح و كل اللى حواليك هيبعدوا عن اللى بيضايقك او يبقوا قاصدين يضايقوك و هنا بقى الطش فيهم بقلب .
فالشغل الوضع مختلف شوية لان اللى انت مش محتاج وشه النهاردة بكرة تحتاج قفاه.
Content Relevant URLs by
vBSEO 3.6.0 PL2