الموضوع: شكراً مهندس عاطف و شكراً هيونداي

أعذروني إني عملت موضوع منفصل لعمل شكر واجب لمهندس عاطف على اهتمامه بمشكلة عندي إتحلت الحمد لله بسلاسة و سهولة جداً.
بدون الدخول في تفاصيل كنت رايح أعمل صيانة 10000 و كلمت مهندس عاطف علشان صوت تخبيط من قدام و الراجل مشكور كلم مدير مركز قليوب م/ثروت و الراجل أعطى الموضوع إهتمام كبير و كان في قطعة مطلوبة مش موجودة في قليوب فوجئت إنهم بعتوا جابوها من أبو رواش في نفس اليوم و خلصت العربية في نفس اليوم مساءاً و كلموني تاني يوم و إستلمتها و الحمد لله كله تمام و المشكلة إتحلت.
و نا مروح من قليوب بالعربية تاني يوم سمعت صوت و رجة من الجزء الخلفي تقريباً و نا نازل منزل طريق السويس يعني حاجة كدة بتاع 30كم من قليوب.. كسلت أرجع و كلمت مهندس ثروت قاللي مفيش مشكلة هاتها تاني يوم.
المهم وديتها تاني يوم و قابلت مهندس ناصر و ده بقى قصة.. شخصية محترمة فوق الوصف يكفي إنوا خدني معاه في الورشة و رفع العربية قدامي و يبدو إن الموضوع كان حبات رمل أو تراب دخل بين التيل و ديسك الفرامل المهم فضل واقف مع الميكانيكي و يراجع وراه بإيده و خلاه يعيد على كل حاجة و الأكثر من كدة إنوا خرج معايا للتجربة و لما قلتله إن الصوت مظهرش غير ونا نازل منزل طريق السويس يعني بعد فترة كبيرة قاللي مفيش مشكلة أنا معاك لحد ما تطمن...

الخلاصة... في هذا الموقف تحديداً هيونداي حققت معايا مبدأ customer satisfaction 100%.

على هامش الصيانة
1- تكلفة صيانة 10000 كم شامل زيت شيل ألترا 10000 و الفلتر هي 685 جنيه و قالولي إن الصيانة اللي جاية (15000كم) هتكون ببلاش.
2- في الاستقبال إستلم مني العربية مهندس محمود و هو شخصية محترمة جداً و مريح جداً و فضل معايا لحد ما مشيت.
3- المهندسين هناك أكدوا إن الباور الكهربا في الإلنترا زي ما هو و مفيش أي تغيير في موديلات 2009
4- شكل الإلنترا هو هو في 2009 و مفيش أي تغيير
5- كان في موضوع قبل كدة في المنتدى عن تشغيل التكييف و العربية ماشية بسرعة و إحتمال إن الموضوع ده يكون مضر بالكمبريسور... سألت م/ناصر و أكدل إن مفيش أي مشكلة من كدة و إن في حماية إلكترونية للكمبريسور و إنه كمان في حالة الكيك داون بيفصل ثواني علشان يديك طاقة أكبر و كمان بيفصل في كذا حالة بحيث إنه يمنع أي أضرار سواء عليه أو على أجزاء العربية (الكلام على الإلنترا بس غالباً كل العربيات كدة - يا ريت الناس تتأكد للإفادة).

طبعاً في النهاية مش ممكن أنسى أشكر كريم منير لإنه عرف الإخوة في منتدى هيونداي على شخصية محترمة و خدومة جداً زي مهندس/ عاطف.