مشكله مش شخصيه بس قلبى موجوع منها جدااااااااااااااااااا

السلام عليكم

انا ساكن فى عماره فى اكتوبر والعماره ال امامنا يوجد بها حارس للعقار ( رجل وزوجته و 3 اطفال ) عايشين كلهم فى حجره حوالى 2 متر * 2 متر المهم بعض سكان العماره جمعوا فلوس وخلوه يعمل حجره بجوار الحجره ال عنده ومفهاش اى مشكله فى الشكل وسكان العماره موافقين ومفيش اى مشكله خالص وهما ال دفعوا الفلوس كمان

ولكن جه صاحب العماره ال بنيها ( حاليا هو لا يملك غير شقه واحده فقط فى العماره وباقى العماره متباعه تمليك لناس تانيه ) وعمل مشكله مع الحارس وراسه والف سيف انه يمشى ويهد الحجره دى ولما السكان اتكلموا قالهم العماره بتاعتى ومحدش ليه حاجه والعقود بتاعتكم ملهاش اى قيمه ولا اى لازمه اساسا ( هل الكلام دا صح )


انبارح فوجئت ان الراجل لم حجاته ومشى طبعا كلمته ومش عارف اقوله ايه وكل ما اشوف الحجره دى بعد لما كانت هتكون سبب فى ستر اسره مسلمه وفى واحد كل هدفه انه يمشى الحارس دا وخلاص بدون سبب جوهرى مش عارف اقول ايه حسبى الله ونعم الوكيل فيه


هل كلام صاحب العماره دا صح ..... سكان العماره المفروض يعملوا ايه .... هل العقود ال معاهم دى ملهاش لازمه وهو صاحب العماره فعلا ومش من حق اى حد انه يتكلم

ايه التصرف الصح مع الراجل دا

لا طبعاً طالما بايع الشقق بحصه فى الارض يبقى مالك العماره مبقاش يملك غير شقته فقط وحصة شقته فقط فى الارض
بدليل انه لو كان باع الشقه اللى ساكن فيها مكانش جه بص على العماره أصلاً

المفروض فى كل عمارة بيبقى فيه حد بيلم فلوس المياه و النور و الصيانةو لو فيه نظام ح يبقى فيه مجلس لادارة العمارة ممكن تكلم الشخص ده و هو لما حد ح يديه الفلوس ياخد رايه و لو الرأى بالاجماع على بقاء البواب ساعتها خدوا القرار و و رجعوا البواب خصوصا انتوا اللى بتدفعوا اجرته و الاوضه بتاعته تعتبر ملكية عامة للسكان زى المنور و الجراج و صاحب البيت مبقاش ليه الحكم على العمارة

مافيش طبعا الكلام دة , يخبط راسة فى الحيطة , عقود اية , دية شقق تمليك الكلام دة لو ايجار

هو مالك لشقة ليس اكتر , مالوش اى وجهة حق انة يتصرف بقرار فردى , لازم قرار جماعى وكمان 80% من السكان يكونوا موافقين

سيبكوا منة وطالما السكان عايزين " حارس العقار " يبقى يرجع تانى وتعملوا اللى انتوا عايزينة طالما الاغلبية عايزة كدة

انا اتكلمت مع السكان وكلهم تقريبا موافقين على بقاء الحارس بس السكان محترمه اوى وصاحب العماره عايز واحد يكلمه باسلوب معين علشان الموضوع يخلص اسلوب تهديد اسلوب بلطجه اسلوب قله ادب مينفعش معاه غير كدا

اقتباس:

---

المشاركة الأصلية كتبت بواسطة احمد المصرى

انا اتكلمت مع السكان وكلهم تقريبا موافقين على بقاء الحارس بس السكان محترمه اوى وصاحب العماره عايز واحد يكلمه باسلوب معين علشان الموضوع يخلص اسلوب تهديد اسلوب بلطجه اسلوب قله ادب مينفعش معاه غير كدا

---

حضرتك مالك العقار اصبح الآن مجرد ساكن زيه زيكم يعني ممكن تتعاملوا معاه كانه جار و مضايقكم بكل الاساليب.. وصلت؟

اقتباس:

---

المشاركة الأصلية كتبت بواسطة far!d

حضرتك مالك العقار اصبح الآن مجرد ساكن زيه زيكم يعني ممكن تتعاملوا معاه كانه جار و مضايقكم بكل الاساليب.. وصلت؟

---

دا ال بقوله برضوا بس السكان سلبيين جدااااااااااااااااااااااا اااااا

طبعا صاحب العقار خلاص بقى مجرد صاحب شقة زي أي حد فيكوا و ملوش انه يتحكم و يقرر لوحده. انما بصراحة هو عنده حق. كل البوابين ساكنين في أوضة صغيرة يا اما بعيالهم يا اما لوحدهم و عيالهم في بلدهم و بيزوروهم كل فترة. أكيد الأوضة الزيادة دي منظرها سئ و يبوظ منظر العمارة و بعدين شوية شوية و يقلك حأبني حمام و شوية و يقولك العيال كبروا و عايزين أوضة كمان!!!!! هو أساسا محظوظ انه يلاقي شغل فيه سكن, غيره معندوش خالص, و لا حضرتك شايف ان المفروض سكان العمارات يسمحو لأي حد يبني أوض جنب عمارتهم عشان الناس غلابة و مش لاقية سكن؟؟

لو الراجل صعبان عليك حاول تتفاهم مع صاحب العمارة انه يرجع في الاوضة الصغيرة و يشتغل حارس زي ما كان, و المفروض الأوضة الزيادة دي تتهد و تبقى المشكلة اتحلت حل وسط.

و على فكرة الموضوع لو موضوع عقود هو من حقه كساكن يجيب للبواب ده البوليس يهدله الأوضة اللي مبنية بدون وجه حق و لا تراخيص طبعا, و مش المفروض السكان يتفقوا على حاجة ممكن يتضرر منها باقي السكان من غير اجماع.

اقتباس:

---

المشاركة الأصلية كتبت بواسطة hh

طبعا صاحب العقار خلاص بقى مجرد صاحب شقة زي أي حد فيكوا و ملوش انه يتحكم و يقرر لوحده. انما بصراحة هو عنده حق. كل البوابين ساكنين في أوضة صغيرة يا اما بعيالهم يا اما لوحدهم و عيالهم في بلدهم و بيزوروهم كل فترة. أكيد الأوضة الزيادة دي منظرها سئ و يبوظ منظر العمارة

بالعكس خالص هيا منطقه ميته وهيعمل حجره صغيره مش شقه يعنى وكل سكان العماره موافقين ال هما اساسا اول ناس ممكن يكون عندها مشكله كلهم موافقين على عمل الحجره بدون اى مشاكل

و بعدين شوية شوية و يقلك حأبني حمام و شوية و يقولك العيال كبروا و عايزين أوضة كمان!!!!! هو أساسا محظوظ انه يلاقي شغل فيه سكن, غيره معندوش خالص, و لا حضرتك شايف ان المفروض سكان العمارات يسمحو لأي حد يبني أوض جنب عمارتهم عشان الناس غلابة و مش لاقية سكن؟؟

دا وضعه مختلف بقاله سنين معانا وامين وكويس مش اى حد وخلاص يا باشا ثانيا اكبر ناس ممكن تتاثر بالحجره دى موافقه جدااااااااااا وثانيا اكيد لو فكر يعمل حجره تانيه مفيش حد هيوافق وثانيا مفيش مكان لحجره اخرى

لو الراجل صعبان عليك حاول تتفاهم مع صاحب العمارة انه يرجع في الاوضة الصغيرة و يشتغل حارس زي ما كان, و المفروض الأوضة الزيادة دي تتهد و تبقى المشكلة اتحلت حل وسط.


قالو كدا برضوا رافض من باب رخامه وخلاص المشكله ان السكان مش عارفين يتعاملوا معاه


و على فكرة الموضوع لو موضوع عقود هو من حقه كساكن يجيب للبواب ده البوليس يهدله الأوضة اللي مبنية بدون وجه حق و لا تراخيص طبعا, و مش المفروض السكان يتفقوا على حاجة ممكن يتضرر منها باقي السكان من غير اجماع.

---

لو دخلنا فى القصه دى ما هو مش من حقه يبنى مخالف وهندخل فى قصه ملهاش لازمه هو اساسا بانى دور بدون ترخيص يعنى هتيجى على الحيطه بتاعت الراجل دا تفكير عقيم جدا من الراجل دا

لو بايع بحصة في الارض , و هو المفروض , يبقى زيه زي اي حد فيكم

و اتحاد الملاك هو صاحب القرار مش صاحب العمارة (السابق)

بس يبدو انه مقضيها بلطجة و محتاج تعامل (خاص)