المشاركة الأصلية كتبت بواسطة gamal1807
السلام عليكم ورحمة الله و بركاته
انا مقيم في الإمارات وجبت العربيه دي زيرو 2012 اللي هو الشكل القديم المرفق صورته (
هنا)، وهيا هنا و في امريكا اسمها اسكيب .. بس لما شفتها في اوروبا كان ليها اسم تاني واعتقد انه كوجا .. الموديل الجديد مختلف في حاجات كتير فممكن يكون تقييمي مش في محله اوي، عموما ليا صديق جابها جديد وممكن اساله عن اي حاجه انتوا عايزينها، وبصراحه فرحت اوي لما نزلت مصر وكنت مستغرب انها مش موجوده في مصر من قبل كده. انا ما سقتش العربيه الشكل الجديد لسه بالرغم من ان صديقي عرض عليها اجربها بس قلتله استنى لما تخلص التليين لان سواقتي عنيفه و سريعه .
الشكل الجديد اسباني مش امريكي و موتوره سي سي اقل بس تربو وعزم اعلى بكتير
تجربتي مع العربيه على مدى تلات سنين ونص استخدام فوق الممتازة، عربية مفيهاش غلطه، الفور ويل وال esp هايل يعني تمشي في الرمل وتطلع الأرصفه بسلاسة، محصلش فيها اعطال ابداً ما عدا مرة فانوس اتحرق واتغير في الضمان، ثبات هايل مع السرعة، ده غير معدل الأمان العالي فيها وكانت واخدة تقييم دولي لمعدل الأمان عن سنة 2010 على ما اذكر، وكانت من اكتر السيارات استخداماً كتاكسي في نيويورك.
كمان شركة فورد عاملة كنترول على الوكلا بتوعها من حيث الأسعار والخدمة فمش بايديهم يتلاعبوا كتير
للعلم انا ركبت نيسان و مرسيدس و كامري و لكزس و بيجو قبل كده، كل واحدة فيها عيوب شكل .. إلا دي مش لاقي فيها عيوب .. و على فكرة مفيش اي وجه مقارنه بينها و بين اي suv في فئتها
سعرها في مصر هو مرة و نص سعرها في الإمارات و بالتالي دي قيمة هايلة بالنسبة لسيارة في مصر، يعني تحط فلوسك في حاجه تستاهل بجد.
صيانتها مش معقدة، و اسعار قطع غيارها زي التويوتا تقريباً
عملت حادثه في مره، ميكروباس خبطها من ورا، الميكروباس اتطبق الكبوت بتاعه واتكسر الرادياتير و الفوانيس، وعندي محصلش حاجه ابدا .. بمعنى الكلمة .. مجرد مسمار من اللي رافعين غطا الإكصدام ريح شويه.
لما كنت بفكر اجيبها سألت مهندس ميكانيكا مخضرم، وكانت اختياراتي ساعتها هي فورد اسكيب و كيا سورينتو و هيونداي سوناتا .. و كان رده بشكل قاطع الفورد بالرغم من اتجاهي كان للسوناتا علشان كمالياتها (باعتبار ان كان معايا لكزس) بس هو صمم على رأيه وقاللي مفيش وجه مقارنة و الحمد لله انني خدت باستشارته
اي سؤال انا جاهز
المفضلات