يا نساء مصر.. إحذرن

**OlaOsman** · 09-11-2008 07:31 PM

زميلتي في الشغل النهاردة بتحكي لي عن موقف حصل مع واحدة صحبتها مختصره هو ان واحد لابس ظابط وقفها و قال لها تركن على جنب و لما سألته فيه ايه؟ قال لها انتي مش حاطة الحزام، قالت انه انها حاطة الحزام، قال لها لأ انتي لسه حاطاه دلوقتي لما شفتيني و طلب رخصها و بص فيهم و قال لها خلاص المرة دي هانخليها غرامة فورية بس.. طبعا كل ده بزعيق و شخيط عشان يخوفها، فهي سألته الغرامة كام؟ قال لها 100 جنيه.. المهم من هنا لهنا قالت له ماعييش غير 10 جنيه و آدي الشنطة لو لقيت فيها مليم زيادة خده.. و فعلا الظابط الهمام (اللي هو مش ظابط و لا نيلة) فتش شنطتها ومالقاش فيها فلوس خالص فشخط فيها و قال لها خلاص امشي دلوقتي بس بعد كده ابقي البسي الحزام.. مشيت البنت و بتبص في المراية لقيته بيركب تاكسي كان مستنيه على جنب.

طبعا هو استهدف بنت عشان تخاف من الزعيق و تتخض و تديله كل اللي معاها، انما البنت دي كانت ثابتة و ما اتهزتش و كانت شايلة الفلوس لحسن الحظ في جيب بنطلونها فاديته الشنطة بعد ما شالت منها المفاتيح و الحاجات المهمة عشان يفتش فيها و هي عارفة ان مافيهاش فلوس.

مش عارفة في موقف زي ده المفروض نعمل ايه؟

**elassar2010** · 09-11-2008 07:38 PM

المشاركة الأصلية كتبت بواسطة OlaOsman

مش عارفة في موقف زي ده المفروض نعمل ايه؟

المفروض ان الضابط بيكون واقف فى لجنة يعنى مش لواحدة كدة لازم بيكون فى امناء شرطة حوالية فهو ممكن يتعرف الموضوع من الناحية دى
طبعا ممكن واحد يقول تشوفى الكارنية طبعا دة قانونى بس عندنا فى مصر دة فى المشمش

**aif** · 09-11-2008 07:43 PM

يا علا الموقف ده بيحصل لرجالة بشنبات كمان ...
المفروض لو انتي شكيتي في الظابط ده .... خصوصا انه لوحده من غير لجنة وامناء وعساكر و بوكس .....المفروض تطلبي منه تحقيق الشخصية و تقرأية وتحفظي الاسم اللي فيه كويس مش بس تبص وخلاص ....لو ظابط بجد عمره ما يقدر يقولك لأ ... حتي لو لابس ميري ... قوليله احنا كل يوم بنسمع عن ظباط مزيفين ....ولابسين ميري وصممي علي رؤية الكارنية بتاعة من قريب مش مجرد يطلع الكارنية من بعيد وخلاص
نصيحة لأخواتنا البنات ... دايما خلي السنتر بتاع الابواب مقفول .... والزجاج مقفول .... بحيث ما حدش يقدر يمد ايده داخل العربية .....

البنت دي المفروض تبلغ وزارة الداخلية .... علشان يعرفو ان فيه حد مزيف في المنطقة دي
ربنا يحفظنا كلنا من كل مكروه

**Noha.M** · 09-11-2008 07:57 PM

ربنا يستر

انا استحالة اقف لحد ولا ظابط ولا بتاع الا لو فى لجنة

غير كدة يخبط دماغه فى اتخنها حيطة

**kingtefa** · 09-11-2008 08:35 PM

[
المفروض صاحبتك كانت سألته انا ازاى اتأكد انك ظابط ؟؟ ورينى الكارنية لو سمحت ؟؟
لو عمل اى حاجة غير انه يوريها الكارنية قوليله انا اسفة مضطرة اكلم عمى اللواء فلان الفلانى و هو بقا ييجى يتأكد بنفسه انتا ظابط ولا لأ :)
] لا طبعا غلط هو لو مش ظابط حيسيبها حتى تفتح الشنطة عشان تجيب التليفون اكيد حيضربها و على فكرة من حقك انك تمشى بالعربية و متتعقبش لو لقيت ظابط من غير امناء شرطة او العربية او الموتوسيكل "يعنى لو شكيت فى امره اطلع اجرى بالعربية "

**OlaOsman** · 09-11-2008 09:02 PM

المشكلة بس هي ان التصرف ساعتها بيبقى عفوي إلى حد كبير، يعني مش كتير هايسألوا الظابط ده عن كارنيهه و ممكن فعلا يتصرف بقلة أدب و ساعتها مش عارفة هاعمل ايه

**Ghamrawy** · 09-11-2008 09:51 PM

المشاركة الأصلية كتبت بواسطة OlaOsman

المشكلة بس هي ان التصرف ساعتها بيبقى عفوي إلى حد كبير، يعني مش كتير هايسألوا الظابط ده عن كارنيهه و ممكن فعلا يتصرف بقلة أدب و ساعتها مش عارفة هاعمل ايه

اطلبى النجدة من الموبيل و قوليلهم الضابط اللى فى اللجنة اللى فى المنطقة الفلانية بيساومنى على 50 جنيه .....طريقة مجربة

**MedaSam** · 09-11-2008 11:07 PM

:k48::k48::k48: ............. معلش مش قادر امسك نفسي من الضحك ......

لما بتخيل الراجل اللي عامل نفسه ضابط و بعدين مالاقاش معاها غير 10 جنيه ........ و في الأخر بيقولها همشيها المره دي (و بعدين بزعيق)..... بس ابقي البسي الحزام بعد كده ........ تحس انه عايز يقولها يبقي شيلي معاكي فلوس اكتر من كده