مشكله مع شركه فودافون

**Bassem Youssef** · 30-03-2015 12:19 AM

انا بستخدم خط بتاع واحده قريبتي و هي حاليا خارج مصر و عايز اسجل الخط بأسمي

روحت الشركه و اتلطعت نص ساعه

حظي الظريف رماني مع واحده عماله تمضع في لبان و لطعتني 3 دقايق لما خلصت رغي في الموبايل

المهم قولتلها عايز اسجل الخط بأسمي و صاحبه الخط مش موجوده

تقولي عايزه اخر 3 كروت شحن و اخر 3 ارقام بتصل بيهم علي طول و اخر 3 ارقام تم تحويل رصيد منهم للخط

اخر 3 كروت شحن ايه و انا بحول رصيد اصلا مش بشحن بكروت و فرضا شحنت بكروت فهل انا مطالب اني احتفظ بالكروت دي ؟؟؟ يعني لازم اشحن 3 كروت عافيه و بلطجه ؟؟؟

اخر 3 ارقام تم تحويل رصيد منهم للخط علي اساس اني هخش لصاحب السنترال و اقوله رقم خطك كام اللي بتحول منه و بعدين انا مش بتعامل الا مع سنترال واحد و السلام فهل انا مطالب احول رصيد من سنترلات اخري و اقولهم و النبي يا عمو رقمك كام اللي بتحولي منه الرصيد ؟؟؟

اعمل ايه في ام التخلف ده ؟؟؟ كل ده لازم اعمله و بعدين ابقي اعدي عليهم كمان شهر

الكريزه علي وش التورته اني لسه محول النهارده لنظام فيلكس يعني 56 جنيه رصيد

انا اتفقعت

**ramymechanics** · 30-03-2015 09:35 AM

عجيب امركم ايها المصريون
طب وهو حضرتك متخيل اى واحد يعدى معاه اى خط يقولهم عاوز اعمله باسمى يقولوله اتفضل ؟؟ افرض انت سارق موبايل بالخط مثلا ؟؟ و كمان حضرتك بتقول انه متسجل باسم واحدة تانية ؟؟

**Karim_Mohy** · 30-03-2015 09:42 AM

السلام عليكم...
الفكرة في ان فيه شوية ضوابط ممكن تكون خانقاك ولكن دي حماية لصاحب الخط
مثال لو حد لقي خط مثلا او معاه خط حد من السهل انه يروح ويسجل الخط باسمه...وده هايفتح باب للمشاكل كتير للشركة ولصاحب الخط...
الكلام ده مالوش علاقة بشركة بعينها...الشركات كلها بتطبق نفس السياسة
لو حضرتك جيت في يوم ولقيت خطك باسم واحد تاني هاتعمل مشكلة لان الخط المفروض باسمك
الفكرة ان طالما انت مستخدم الخط وليس المالك في الوقت الحالي حاجة من اتنين....يا المالك يتنازل عن الخط لحضرتك وده ماينفعش لانك قلت انه سافر.....او انك تجمع المطلوب لفترة وتسجل الخط باسمك.
حبيت اوضح لحضرتك بس الشركات كلها بتطبق نفس المبدأ...ممكن تكون مش كويسه بالنسبالك او ممكن تسبب اي مشاكل لاي حد مالوش ذنب او ان الخط معاه من فتره ومش باسمه...بس تبقي للاحسن
تحياتي

**أحمد كمال** · 30-03-2015 10:57 AM

مش شايف انهم غلطانين .....

**ahmad--ezzat** · 30-03-2015 11:31 AM

فين الغلط صحيح

**Mu7ammeD** · 30-03-2015 12:03 PM

انا سجلت خطي بأسمي بأستخدام أخر ثلاث كروت شحن فقط

**mmkhattab** · 30-03-2015 12:45 PM

أي مكان في الدنيا ليه ضوابط و قوانين بتحكمه و العاملين لازم يلتزموا بيها
زي ما انت اكيد شغال في مكان و بتشتغل وفق منظومة
أو حتى لو ليك عمل خاص فأكيد أنت حاطط ضوابط معينة للعمل

**Qmax** · 30-03-2015 01:26 PM

الخط ده مش متسجل بإسم حد عشان لو متسجل كانت طلبت منك إحضار مالك الخط يتنازل لك عنه.
أما موضوع كروت الشحن سهله لو انت فاكر تواريخ الشحن عالطاير بتقول لهم عليها عشان يتأكدوا انك صاحب الخط ومستخدمه
لو كنت كلمتهم قبل حضورك الفرع كانوا هايعرفوك المطلوب عشان متروح وتنتظر عالفاضي
إنما أن جيت للحق فودافون مبتعملش عروض وان عملت بتكون آخر حد عمل وتلاقيه مشروطه هي طول عمرها كده