السلام عليكم ورحمه الله ...
تعالوا نتكلم بصراحه شوية وبدون تحيز ...
الاعلام بالنسبة لينا هو التليفزيون والدش طبعا ...
الايام دى بقيت بفتح التليفزيون و ادور على البرامج علشان ابعد عنها!!!
ايوه فعلا البرامج المصرية مضرة بالصحه ..
وفى ابحاث علميه اجريت من ايام بتاكد على مشاهده البرامج الكوميديه كثيرا ..
طب تعالى كده معايا افتح اى برنامج عشوائي كده من غير ما تكون منتظره ...
برنامج رياضى !!!!
هتلاقى المقدم والضيوف ياأما بيتكلموا عن هروب لاعب_ او ازمه نادى _ او مشكله انتخابات _ سلوك لاعبين سيء _ حد مرفوع عليه قضية _ حد بيهاجم حد _ هتلاقى حد بيفتى وبيقول خبر محصلش _ الــــــــــــــــخ...
طب غير القناة وهات برنامج تانى ..
برنامج اخبارى !!!
اول حاجة هيقولها .. لاقى كام شخص مصرعهم فى اى حاجة _ قتل معرفش مين _ استشهد كام فلسطينى _ عمليه انفجار فى العراق _ حوادث فى الشيشان _ ويحسسوك ان خلاص الدنيا مافيهاش غير حروب ...
غير القناه ..
برنامج دينى !!
مفيش احلى من انك تسمع ذكر الله طبعا
ولكن تعالى للفقرة بتاعت الحرام والحلال ...
هتلاقى ان كل حاجة بتحصل فى البلد حراااااام
تصرفات الناس كلها حرام فى حرام ..
قتل _ اغتصاب _ ربي _ زنى _سرقه _ ...... اعوذ بالله ..
وممكن تكون انت بتعمل حاجات متعرفش انها حرام زى فوائد البنك كده ممكن تكون ربي والله اعلم ...
برنامج ثقافى !!
متتفرجش على البرنامج ده لوحدك ارجوك ..
لازم يكون معاك صحابك ... ليه؟
هقولك ليه .... علشان تشوف كام واحد فى القعده عارف تاريخ بلده ولو كانت معلومات خفيفة ..
هتلاقى الناس فى البرنامج بيتكلموا عن حاجات انت اول مرة تسمع عنها ويا سلام لو دخلوا فى تاريخ الفراعنة .. هتحس انك من موزمبيق !!
تعالى بقى لاحلى البرامج ..
برنامج تكنولوجيا !!
ببساطه هتلاقى المذيع بيتكلم عن شيء انت ممكن تكون سمعت عنه
لكن للاسف عمرك ما شفته ...
هتلاقيه بيقول كلاتى ..
اخترعت الصين جهاز معرفش ايه اللى بيعمل كذا وكذا وكذا ....
ابتكرت اليابان اول صواريخ بتعمل كذا وكذا وكذا وكذا ...
كوريا تكشف عن احدث اجهزة المحمول فى العالم ويقعد يشرح لك فى المواصفات سنه كامله ..
وفى نهايه البرنامج يقولك ونتمنى اننا نشوف الحاجات دى فى الاسواق المصرية ....!!!!
قبل ما تقفل التليفزيون استنه شويه وتعالى على نفسك وهات اخر نوع من انواع البرامج ..
احدث انواع السيارات !!
اول شيء هتلاقيه مذيعه حلوة بتتكلم عن احدث السيارات وامكانيتها

ومرة واحده يقوموا رايحين تقرير وصور عن السيارات دى ..
سيارة ب 10 مليون دولار
سيارة بتعوم فى المياه
سيارة تصل الى اقصى سرعتها فى 7 ثوانى
ويتكلموا عن الشركات اللى الشعب الغلبان ده محروم منها..
فيرارى
لامبورجينى
ماى باغ
الــــــــــــــــــــخ....
تقوم تبص على اللانسر بتاعتك من الشباك وتدخل تنام على طول..
وطبعا واكيد بين كل برنامج وبرنامج 100 اعلان وللاسف اكثر الاعلانات دى بتبقي اعلانات 0900
قمه الهبل والتخلف ....
اتصل ب 0900 تكسب شقه وعربيه و مليون جنيه واللى نفسك فيه كمان ... يااااااااااااه على التخلف اللى احنا فيه ده ..
عم احمد اتصل ب 09004455 وكسب 100 مليون دولار..
مش عارف بقي ليه المستوى الهابط ده ؟؟
يا ترى علشان مبقاش فى اخبار حلوة فى البلد دى !؟
ولا علشان اى حد معاه فلوس بيفتح قناة !؟
ولا مبقاش فى اعلام هادف !؟
انا عن نفسي معرفش..
بس اللى يعرف يتصل على 09001774 ويقولنا ..