الحمد لله مشكلة كبيرة وتم حلها ابيزا 2002

**MEAMY1980** · 03-04-2015 12:14 AM

السلام عليكم اعضاء نايل موتورز
الموضوع باختصار العربية سحبها كان ضعيف وبتاكل بنزين وبتبرجل فى السلانسيه وغيرت طقم دبرياج وفلاتر هواء وبنزين وبوجيهات وكشفت بالجهاز والجهاز قال ان كله تمام والمشكلة اتحسنت شوية بس لسة موجودة والوحد تعب نفسيا من تلك المشكلة
المهم وبالصدفة اكتشف ان وحدة الكنترول ecu اللى مكانها بجانب المساحات حواليها كمية اتربة فظيعة ورطوبة نتيجة غسيل السيارة بالمياه ونظفت الاتربة الموجودة وحاولت افك فيشة الكنترول معرفتش فبحثت فى اليوتيوب على طريقة فكها وبالفعل فكتها ونظفتها باسبراى وطلع عينى على ما ركبتها تانى وكان ممكن تتكسر منى بس ربنا ستر
النتيجة الحمد لله العربية بقت حاجة تانية خالص والعربية فاقت وبقت حالتها احسن من ما كنت شاريها والسحب بقى ممتاز بفضل الله وبرضه كان فى رجرجة للموتور فى السلانسيه والحمد لله راحت .
فياريت ناخد بالنا من نظافة وحدة الكنترول وانا كاتب الموضوع ده لافادة السادة الاعضاء لعلى وعسى يكون حد عنده نفس المشكلة ويستفيد وشكرا

**ahmed sabaa** · 03-04-2015 05:42 AM

1000 شكر

**hossamalsadik** · 05-04-2015 04:54 PM

الف مبروك ظبط العربيه واهتم بالسرفس عشان العربيه تكون فيقه معاك وتاخد افضل أداء وبلاش تجيب مايه نحية الكنترول ولو حبيت تغسل الماتور بالغسيل الكيماوى مافيش مشكله
وشكرا على الافاده

**hossamalsadik** · 07-04-2015 09:09 AM

أتأكد ديماَ ان فتحة تصريف المياه الى موجوده تحت التربيدو (الغطاء البلاستيك ) وبجوار الكمبيوتر من أتجاه الرفرف من جوه سلكه لان ورق الشجر بيسدها
ولف الكنترول بكيس بلاستيك للأمان

**MEAMY1980** · 13-04-2015 02:11 AM

عندي استفسار يا استاذ حسام. الصبح بس وانا بدور العربية بسمع صوت خبط ورزع في الموتور لمدة 7 ثواني وبعديها الموتور بيظبط فيا ترى ايه السبب مع العلم اني مغير زيت وفلتر من اسبوعين وشكرا