من فضلكم اى عربية فى دول افضل ؟؟؟

لو سمحتم عاوز اعرف اى عربية فى دول افضل من حيث
1 - الاكثر تحمل
2 - الاوفر فى استهلاك البنزين
3 - صوت الموتور ونعومته ( مهم )
4 - الارخص فى سعر قطع الغيار
5 - الاشيك
6 - عدم السخونة
7 - راحة السواقة و الصالون
وهل الاوتوماتيك افضل ولا المانيوال

والعربيات اللى فى نفس الفئة السعرية اللى بامر الله اقدر اشترى واحدة منهم وشكلهم عاجبنى كالاتى :-

1 - كيا ريو حتى 2002
2 - فيات برافا حتى 2001
3 - ريو كليو حتى 2002
4 - فيات سيينا حتى 2004
5 - رينو ميجان حتى 1999
6 - هيونداى أكسنت حتى 1999
7 - هيونداى اكسل حتى 1998
8 - فورد مونديو حتى 1997

وياريت بجد المساعدة لان خبرتى تقف حتى 128 اللى معايا حاليا وعاوز اغير بحاجة متتعبنيش ومتصرفش عليا كتير واهوه الموضوع يبئا مقارنة لاى حد عاوز يشترى فى المستقبل يعرف الفرق بين العربيات دى وشكرا مقدماً

انا في نفس الحيرة و الله
بس أنا محتار ما بين إكسيل و كورسا 1200 لأن اللي معايا 35000 بالكتير و دي أول عربية ليا
ان شاء الله الإخوة يفيدونا

يارب حد يساعدنا وادينا منتظرين رأى باقى الاعضاء يا استاذ Hatem Sweif

مبدئيا انت عايز قطع غيار رخيصة وعملية واعطال قليلة يبقي ابعد عن الفيات والرينو خالص . اعتقد الافضل الاكسنت ثم الريو وهتتوقف علي حالة العربية

ابعد عن اى موديل قديم فى الرينووو نصيحة لوجه الله واحد معايا ف الشغل بدون مبالغة صارف ضعف فلوس الشراء على اصلاحها ، حاول تزود شوية وتشوف دايو لانوس او سوزوكى سويفت

سوزوكى سويفت معروضة اليوم على دوبيزل بـ 24.500 ج
و سعرها ممكن يوصل لحد 27/28 ألف حسب الحالة و الكماليات (تكييف و سنتر و خلافة)

https://egypt.dubizzle.com/ar/cairo/...NlJnBhZ2U9MQ==

تم حذف الفيات والرينو من الاختيارات ووضع الاكسنت اول اختيار ثو الريو طيب ايه اخبار قطع الغيار بتاعة سوزوكى سويفت متوفرة ورخيصة ولا لأ

انا سمعت ان الكيا ريو بيبئا فيها عيوب كتير وان الرينو كليو الفرنساوى شديدة وجميلة وهل الاكسنت الشاسيه بتاعها ضعيف فعلا ولا دا كان فى الاكسل القديم واتعدل فى الاكسنت انا محتار فعلا
كدا الاختيارات انحسرت بين
1 - الاكسنت
2 - الريو كيا الكورى
3 - الرينو كليو الفرنساوى

الاهم من الموديل هو حالة العربية ، بص يا غالى اعمل بحث على دوبيزيل او كونتكت كار برينج السعر بتاعك وشوف العربيات المتاحة ايه ممكن تلاقى حاجة انت مش حاطتها ف اختياراتك وتكون لقطة وربنا يوفقك واحنا معاك فى اى سؤال

السيارات اليابانية

تويوتا كورولا تمشي 600.000 كم وتبقى سيارة شغاله توفير وقود ومرتفعة عن الارض

السيارات الجديدة اغلبها اوتوماتيك

ربنا يكرمكم يارب معلش انتوا عارفين حيرة اى حد قادم على شراء سيارة وبالذات لو بدأ زييى كدا بال 128 وعاوز عربية تستقر معايا بتاع 5 سنين اقل حاجة ومتقرفنيش وتطلع عينى وعين اللى خلفونى ربنا يسترها

طب اقولك حاجة . السوق المصري فالعربيات عجيب جدا ، في عربيات ممتازة بتنزل ومبتنجحش فيه بسبب وكيل فاشل او سمعه مش كويسة . انا معايا عربية اسمها هايما فاملي ،صينيو العربية دي موتورها وعفشتها ماذدا ، المهم انا شاري العربية دي من 2008 كانت عاملة 79 ساعتها وكانت اغلي من الفيرنا واللانوس والاسبرانزا والاكسنت وانا فضلتها عن كل دول . اما عملت بيها تست داريف لقيتها عربية فمنتهي الثبات وفيها abs واير باج والعفشة رياضية وجنوط اسبور ومرايات كهربا . طبعا الاوبشن ده سنة 2008 مكنش موجود فاي عربية عادية ، المهم توكلت علي الله واشتريتها وكانت قسط كمان وسعرها وصل معايا 110 بالتقسيط والتامين . وفعلا العربية مخذلتتيش ولا مرة وبعد استعمالها 7 سنين انا العربية دي بقت جزء مني . عملت بيها حادثة علي طريق اسكندرية مطروح وكنت ماشي 120 وطوبة بلوك كبيرة خبط فيها وانا مش واخد بالي والمقص اتعوج خالص والعربية لفت مني . اي عربية تانية كانت اتقلبت مني اقل شئ 10 مرات . العربية فضلت ثابتة واتخبط بالجنب فعمود والاير باج فتح وانقذتي طبعا والمنقذ ربنا بس في سبب وهو الايرباج . المهم ان العربية فوق الممتازة . بس عيبها للاسف انها منتشرتش بسبب الوكيل الفاشل بتاعها وطبعا ملهاش قطع غيار بس اللي فاهمها يعرف يجيب قطع غيارها عادي ومش ماسكة سعر فالسوق يعني رنج 45 الف كدا . انا معايا العربية دي بقالها 7 سنين بالظبط ولله الحمد مغيرتش فيها غير عفشة ودسك واسطوانة وطنابير وكاوتش وسيور بس ، كل حاجة فبريكة وماشية زي الفل . مش هتصدق اني اما فكرت اجيب عربية تانية لظروف شغلي محتاج عربيه دفع رباعي . اشتريت تيريوس ومبعتهاش . والله دلوقتي بفضل اركبها عن التريوس .
انا مش هقولك اشتري واحدة شبها . بس هقولك لو عايز تركب عريية نظيفة وبفلوس علي قدك وتستحمل شويه حكاية قطع الغيار اللي هتجيب من كل عربية حاجة عشان تركبها عندك يبقي مفيش احسن منها .
انا بقيت حافظ كل جزء فيها و عارف كل جزء اجيبه منين .
هش اعمل سيرش عليها فجوجل او دوبيزل واتفرج عليها ولو عايز اي استفسار انا فالخدمة

هتلاقي كذا حد عارضها للبيع علي دوبزل

استاذ a7med ezz 20 انا شاكر جدا جدا لحضرتك ربنا يحميلك عربيتكط ويبارك فيها يارب انا فعلا عملت سيرش على جوجل ملقيتش ليها عيوب معرفش يمكن علشان مش منتشرة اوى ولا ايه وبردو بحثت فى دوبزل لقيت واحد عارض عربيته هايما فاملى 2008 ب 55 الف وانا الرنج بتاعى 40.000 الف يادوب اكسنت 2002 او كيا ريو وانا بفاضل بينهم لانى حتى لو فكرت اجيب لانوس مش هيجيبوا حاجة عدلة وانا شاكر جدا تعب حضرتك

العربية سوقها 45 مش 55 ، وشراء موفق باذن الله وافضل الاكسنت احسن من الريو