تقرير مبدئي نيسان سنترا 2015 هايلاين

**dreslam** · 04-04-2015 01:29 PM

معلش التقرير المبدئي على السريع ...يغطي نقاط منها اشتريتها ليه ومميزاتها الفعليه بالنسبالي ومافيش فيه فنيات بالمعنى الواضح لكن ارجو اني اقدر اضيفها لاحقا ان شاء الله في القريب العاجل.

في البدايه احب ان اوضح بعض النقاط :

الاختيارات كانت محدوده جدا..لان المواصفات المطلوبه عربيه عائليه واسعه من جوه..مساحه شنطه واسعه..تكييف ممتاز..سواقه سلسه وهادئه ..باور ناعم..مواصفات امان عاليه ..فئه سعريه لا تتخطى 170 الف جنيه باي حال من الاحوال مع مواصفات اضافيه غير مطلوبه..اوبشنز مرضي..تقفيل عالي الجوده..عاليه عن الارض ماتحكش في المطبات..ويفضل استهلاك بنزين يكون كويس مش عالي..

الاختيارات تم تصفيتها الى القليل بعد استبعاد الكثير لاسباب مختلفه..تم استبعاد الاوروبي كله والكوري كله ثم تم استبعاد تويوتا ياريس ثم لانسر شارك.

المواصفات المرضيه جدا في السنترا :

مساحه داخليه واسعه..مافيش عربيه في الفئه دي تحديدا بهذا الوسع واعني المساحه الخلفيه تحديدا او المساحه المتاحه للارجل الخلفيه.

مساحه الشنطه 510 لتر من اكبر المساحات في هذه الفئه.

تكييف ممتاز .التكييف جبار بمعنى الكلمه ولا يوجد له "اي تاثير يذكر" على الموتور.مع وجود فتحات خلفيه للتكييف مش بضطر افتحها اصلا يمكن اضطر افتحها في الحر الشديد.

سواقه سلسه وهادئه.العزل في العربيه معمول كويس ومتكلف كويس ولو فتحت الكبوت حتعرف انهم عاملين حسابهم ان العزل يكون قوي..صوت الموتور غير مسموع غير في الحرق الجامد او اذا شغلت زرار ال sport mode وده اللي هوا بديل عن الموانيوال بتاع الستبترونيك .استجابه الفيتيس xtronic-cvt كويسه جدا وسلسه بدون اي احساس بالنقل وبعد اول 1000 كيلو كان قبلها فيه احساس بسيط بنتشه خفيفه في الفيتيس لما تفرمل موجوده في كل فيتيسات هذا النوع اختفت ولم تعد.

العفشه كل اللي اقدر اقوله عنها انها ياباني..ناعمه وطريه ومافيش هبد ولا رزع ولا احساس بالنقر والحفر واحساسهاجميل في المطبات العاليه.وتديك احساس انها قويه ومش بتاثر على الاتزان.

العربيه توازنها في الملفات على السرعات مرضي جدا واكبر مما توقعته لانها عاليه يمكن اعلى الموجود في فئتها بدون اي تاثير على الاتزان والثبات

فرامل العربيه قويه جدا ومسعفه للغايه ومن افضل الفرامل اللي ركبتها الحقيقه مع وجود ال ABS,BA اللي لسه متعرضتش لموقف يبين مدى اثره حتى في استخدامها مع المطر ..

الباور : سلس وكهربا وطري مع وجود تقل ملحوظ على السرعات العاليه.ومن اكثر الباورات اللي شفتها سلاسه يمكن مايعجبنيش شخصيا لاني بحب اعافر في الدريكسيون لكن مع مشاوير البلد والزحمه والركن باقعد ابوس الدريكسيون الحقيقه.

مواصفات الامان : 2 ايرباجز وفرامل ABS,BA..اساسي طبعا ودي عربيه عالميا فيه منها فئات بتنزل ب ESP,TC زي الكورولا فاللي بتنزل هنا اقل حاجه يبقى فيها كده.من ضمن اسباب استبعاد الكيا الكارينز ان الفئه اللي على قد الجيب مافيهاش التجهيزات دي.

تقفيل عالي الجوده..جدا..اللي ركب عربيات كتير يفهم ان العربيه دي خامتها وفرشها وقعده الكراسي والشنطه وتقفيلها وعدم وجود تزييق او اصوات داخل الكابينه تقفيلها جودته ممتازه في فئتها السعريه..باستثناء الاسترخاص الواضح في وجود فتحات التكييف البكر..وهي فئه بتنزل في الخليج كده ..لكن تكييف التيدا الاوتوماتيك ممكن يركب عليها ..انا مش بحب التكييف الاوتوماتيك لاسباب ولذلك بعت جبت بكر مختلف يدي منظر افضل وغير مكلف...ولوحبيت اجيب اوتوماتيك وزراير اجيب وركب ايه يعني..المهم التكييف نفسه ممتاز.

مع بعض الحكات والذي منه في مصرنا المحروسه قدرت اوصل ان العربيه بويتها كويسه ..اما عن الاوبشنز : ال keyless entry and start stop engine مع وجود فوانيس ليدات اماميه وخلفيه وطاره ملتي فانكشن وسي دي بفتحه aux ومخدع مريح وماشي مع كونسول العربيه ومخدع خلفي وراه فتحه مناسبه تمد ايدك وتوصل للشنطه الجباره اللي تاخد بني ادمين مش شنط وباركينج سينسور وايموبيليزر ...لا ينقصني الا ال dvd اللي حركبه ان شاء الله خلال اسبوعين وفيه البلوتوث وال gps مش حبقى محتاج حاجه فعليا اكتر من كده.

استهلاك البنزين..العربيه استهلاكها اقل من عربيات كتير في فئتها وده لانها معموله للغرض ده في الاساس وهو توفير البنزين برغم كبر حجمها. والعربيه بعد اول 1000 سحبها بقى قوي جدا ورغم اني كنت ناوي استخدم ال sport mode بعد اول 1000 لكني مش محتاجه يمكن مع اول سفريه ان شاء الله اشوف

يمكن اكمل بعدين التقرير ده واحدثه لما يخطر ببالي حاجه لكن ده تقرير مبدئي وانا عملته عالسريع متاسف ارجو انه يجاوب على تساؤلات كتير بالنسبه للعربيه

http://nileup.com/up/watermark.php?s...138839.jpg&p=c

http://nileup.com/up/watermark.php?s...138821.jpg&p=c

http://nileup.com/up/watermark.php?s...138837.jpg&p=c

http://nileup.com/up/watermark.php?s...138834.jpg&p=c

http://nileup.com/up/watermark.php?s...138833.jpg&p=c

http://nileup.com/up/watermark.php?s...138838.jpg&p=c

**a7medsh3rawi** · 04-04-2015 02:38 PM

ما شاء الله
ربنا يباركلك فيها
هى سعرها ومواصفاتها حلوه واحسن من الشارك والالنترا
هى السنترا يابانى 100 % ولا تقفيل مصرى
بالنسبه للبودى تقيل وقوى ولا خفيف زى الكورى

**dreslam** · 04-04-2015 02:44 PM

ربنا يبارك فيك ..
السنترا اللي بتجيلنا ياباني تقفيل تايلندي..بتروح للخليج واستراليا واحنا...السنترا الامريكي بتتقفل في مصانع المكسيك..تقفيل التايلندي عالي قوي قوي قوي ..البودي زي اي عربيه في فئتها لكن مش خفيف قوي الصراحه بحسه معقول واحسن من عربيات كتير في فئتها والاكصدامات مدعمه كويس والقوايم تقفيلها حلو جدا.
واعتقد انها حتتقفل بعد كده في مصر لسه معرفش بالتحديد

**tasaka** · 04-04-2015 04:27 PM

الف مبروك .. و فعلا اختيار موفق جدا

بصفه عامه cvt فكره تصميمه ان يكون موفر جدا للوقود ..

**tasaka** · 04-04-2015 08:31 PM

الف مبروك مره ثانيه

حبيت اضع شويه معلومات قد تكون مفيده لك .. شركه نيسان رائده فى هذا النوع من الفتيس .. و عموما فان الفتيس CVT مفترض ان يكون اكثر توفيرا للوقود ( حتى اكثر من الفتيس المنيوال ) .. عموما طبقا للفيديوهات على السرعات العاليه جدا ازدادت سخونه الفتيس ( هذا ليس بصفه عامه فى CVT للنيسان فى دول العالم .. و لكن فقط فى السعوديه بسبب درجه الحراره العاليه ( التى لم يأخذوها فى الاعتبار ) .. و اعتقد انهم تداركوا هذا الامر لاحقا

و لا أظن ان ظروف لسعوديه تنطبق على جو مصر .. و لكن ان كنت ممن يحبون تقفيل العداد السراعه .. الافضل ان تضع ملاحظه هذه النقطه فى تفكيرك ( و لا اظن انها ستكون موجوده عندنا فى مصر )

فيديوهين لتوضيح اداء النيسان و الفتيس ال CVT .. و خصوصا عند استعمال الستيبترونيك ( أداءه سريع )

ماكسيما ( حجم الكبير )

[youtube]https://www.youtube.com/watch?v=MUz4bCmGOfs&list=PLRTZqnHgdrN8Azk0Dk9hi0Yw KWX6uEk6t&index=9[/youtube]

التيما ( الحجم الاكبر قليلا من سنترا )

[youtube]https://www.youtube.com/watch?v=7ZP6C5o0Jwc&index=7&list=PLRTZqnHgdrN8Azk0 Dk9hi0YwKWX6uEk6t[/youtube]

فكره عمل ال CVT بصفه عامه

الفكره العامه و ليس تحديدا لفتيس النيسان سنترا
رابط
Toroidal System