تقرير استلام سوزوكي سياز

**ebrahimsaed** · 06-04-2015 09:43 AM

السلام عليكم ورحمة الله
بعد الحيرة لفترة كبيرة بين عربيات كثيرة جدا وبحث طويل في معظم اقسام السيارات هنا في المنتدي وفقني الله في اختيار السيارة سوزوكي سياز .
السيارة ماشاء الله جميلة ومريحة وفخمة وتقفيل جيد ومرضي جدا بصراحة بحس اني راكب عربية ب 200 الف مش ب 123 .
العربية فعلا قيمة جيدة جدا مقابل الفلوس اللي بتدفع فيها ويمكن كمان انا شايف ان سعرها قليل جدا للكماليات والاوبشن بتاعها

طبعا كلنا عارفين ان السوزوكي ياباني بس السياز بتتقفل في مصنع سوزوكي اللي في الهند ودة مصنع قديم جدا وعريق جدا وعربياتة معروفة بالتحمل والجودة في التقفيل وانا شايف ان التقفيل كويس جدا ومرضي جدا بالنسبالي .

انا طبعا عمري مكنت اتخيل اني هركب عربية فيها كل الاوبشن دة بالسعر دة زي مثلا

المفتاح الزكي اللي مدي امان للعربية جدا
ستارت ستوب انجن
المرايات ضم اوتوماتيك
وتظبيط المرايات بردة اوتو وفي اشارات في المرايات
الطارة مالتي فانكشن
التكيف اوتوماتيك Climate Control
بلوتوث للموبايل والاغاني
فتحات تكيف خلفي وفيها مكان للشاحن
ايموبليزر وانذار علشان السرقة
مسند للسائق وفية اماكن تخزين
مسند خلفي وفية حامل اكواب
والعربية ماشاء الله واسعة جدا انا طويل وحجمي كبير وببقي مرجع الكراسي اللي قدام للاخر واللي قاعد ورا بيبقي مستريح جدا وفي وسع بين رجلة والكراسي الامامية .
والشنطة كبيرا جدا 510 لتر متهيالي اكبر شنطة مابين العربيات اللي كنت بقارن بينها كلها.
وتقريبا كل يوم بكتشف اوبشن جديد.

الحمد لله الي الان ماقبلنيش اي مشكلة للعربية ويارب يديمها عليا نعمة ويحفظهالي من كل شر ومن عيون الناس.

العربية سعرها وكيل 123 الف بس هتحجز وتستني تقريبا تلات شهور
في المعارض بتترواح ما بين 127 الي 129 انت وشطارتك بقي وتسليم فوري

بجد انا بعد مقارنات كتير انا شايف انها مكتسحة الفئة دي وكمان في عربيات اغلي منها بكتير ومفيهاش كم الاوبشن دة.

يارب التقرير يكون عجبكوا ودة لنك للجروب بتاع العربية علي الفيس الجروب دة ساعدني بشكل كبير في الاختيار بعد توفيق ربنا طبعا
.................................................. ....................

ودة لينك فية موضوعات مجمعة للعربية اللي عملة الاستاذ الفاضل YahiaAshraf

.................................................. ...............

دعواتك بقي ربنا يحفظهالي ويديني خيرها ويكفيني شرها.

ممنوع وضع لينكات خارجية لمواقع سيارات آخرى
م ع 7

**AhmedAliGSF** · 06-04-2015 09:59 AM

ألف مبروك... ربنا يباركلك فيها ويحفظك و يحفظها من كل شر...

**ebrahimsaed** · 06-04-2015 10:26 AM

المشاركة الأصلية كتبت بواسطة ahmedaligsf

ألف مبروك... ربنا يباركلك فيها ويحفظك و يحفظها من كل شر...

الله يبارك في حضرتك

**AhmedAliGSF** · 06-04-2015 10:51 AM

سؤالين بعد اذنك؟...
هل العفشة ناعمة و لا ناشفة؟
هل التسارع جيد؟

**ebrahimsaed** · 06-04-2015 01:18 PM

المشاركة الأصلية كتبت بواسطة ahmedaligsf

سؤالين بعد اذنك؟...
هل العفشة ناعمة و لا ناشفة؟
هل التسارع جيد؟

العفشة معايا حلوة قوي خصوصا بعد لما زبطت ضغط الكاوتش وعملتة نيتروجين
اما التسارع بقي راااائع جدا انا كنت فاكر انها هتبقي بطة علشان هي 1400 ولكن التسارع جيد ومرضي ومتحسش ابدا انها 1400 وكمان انا لسة مجربتش زرار الاوفر درايف اللي في الفتيس الناس اللي جربتة بيقولو انة بيخليها حاجة تانية بس دة طبعا بيزود استهلاك البنزين. هجربة بعد ال 5000

نسيت اقول حاجة في التقرير علي استهلاك البنزين انا التفويلة عملت معايا حوالي 650 ك والتفويلة بتبقي حوالي 40 لتر ( التانك 43 لتر بس ما بستناش لما يفضي ) الاستهلاك دة خيالي بالنسبالي
وكمان عرفت انة هيتحسن بعد ال 5000

العربية الحمد لله انا مبسوط بيها جدا وفعلا اختيار موفق.

وربنا يوفق الجميع للخير ان شاء الله

**amrseif** · 06-04-2015 04:40 PM

المشاركة الأصلية كتبت بواسطة ebrahimsaed

العفشة معايا حلوة قوي خصوصا بعد لما زبطت ضغط الكاوتش وعملتة نيتروجين
اما التسارع بقي راااائع جدا انا كنت فاكر انها هتبقي بطة علشان هي 1400 ولكن التسارع جيد ومرضي ومتحسش ابدا انها 1400 وكمان انا لسة مجربتش زرار الاوفر درايف اللي في الفتيس الناس اللي جربتة بيقولو انة بيخليها حاجة تانية بس دة طبعا بيزود استهلاك البنزين. هجربة بعد ال 5000

نسيت اقول حاجة في التقرير علي استهلاك البنزين انا التفويلة عملت معايا حوالي 650 ك والتفويلة بتبقي حوالي 40 لتر ( التانك 43 لتر بس ما بستناش لما يفضي ) الاستهلاك دة خيالي بالنسبالي
وكمان عرفت انة هيتحسن بعد ال 5000

العربية الحمد لله انا مبسوط بيها جدا وفعلا اختيار موفق.

وربنا يوفق الجميع للخير ان شاء الله

الف مبروك على العربية وربنا يديك خيرها ويكفيك شرها

بعد اذنك عندى اسئلة بالنسبة لاستهلاك البنزين .. ممكن نعرف ال 650 كيلو دول كانوا فى طريق سفر على سرعات عالية وللا فى وسط البلد وفى الزحمة .. وللا كانوا مختلط بين الزحمة والطوالى ..كنت مشغل التكييف وللا لأ ... .. ممكن تقوللنا اكبر سرعة جبتها كام ؟؟

**ebrahimsaed** · 06-04-2015 04:54 PM

المشاركة الأصلية كتبت بواسطة amrseif

الف مبروك على العربية وربنا يديك خيرها ويكفيك شرها

بعد اذنك عندى اسئلة بالنسبة لاستهلاك البنزين .. ممكن نعرف ال 650 كيلو دول كانوا فى طريق سفر على سرعات عالية وللا فى وسط البلد وفى الزحمة .. وللا كانوا مختلط بين الزحمة والطوالى ..كنت مشغل التكييف وللا لأ ... .. ممكن تقوللنا اكبر سرعة جبتها كام ؟؟

الاستهلاك دة ما بين سفر وداخل البلد وان كان داخل البلد اكتر سافرت مرة واحدة اسكندرية ( مكان الشراء القاهرة واخدتها الي الاسكندرية ) غير كدة باقي السير داخل البلد والزحام.

بالنسبة لسرعتي في السفر انا مبعديش ال 120 غير نادرا جدا لما بسرح عن العداد
وبالنسبة للتكيف انا بشغلة عادي.

في ناس معاهم العربية عملو اكتر من ال 650

العربية اصلا مصممة لتوفير البنزين بصورة كبيرة ومعظم الريفيوهات الاجنبية اللي شفتها للعربية بيقولو فيها ان مصنعين العربية بيقولو ان العربية دي استهلاكها هو 23 كيلو للتر اي ان ال 100 كيلو بتعمل 4 لتر وشوية دة طبعا علي حد قول صانعي السيارة وفي اعتقادي من خلال تجربة العربية ان العربية هتوصل للمعدل دة بعد صيانة ال 5000 . فعلا انا حاسس انها مبتاكلش بنزين خالص.

**amrseif** · 08-04-2015 04:17 PM

سؤال كمان بعد اذنك ... بالنسبة للباور والمشى على السرعات البطيئة والملفات فى وسط البلط .. سهلة وللا متعبة لانى قرات فى البروشور بتاعتها ان اقل نصف قطر دوران 5.4 تقريبا ودة رقم كبير اعتقد يخللى العربية تلف بصعوبة على السرعات المنخفضة بعكس السويفت 4.8 فقط ! ..
يا ريت تقوللنا تجربتك .. وربنا يباركلك فى عربيتك