تجربتي مع اختيار الشقه المناسبه للشراء

 انا عاوز اشتري شقه بس مش عارف اشتري شقه فين ! ويا تري اشتريها مساحتها قد ايه !
امر محير بيواجه كل واحد مننا لما بيفكر انه يشتري شقه سواء لاسرته او شقه للزواج , ان شاء الله في تجربتنا النهارده هندردش شويه مع بعض في كيفيه اختيار الشقه المناسبه للشراء و ازاي ببعض النقاط الاساسيه تضمن انك اشتريت فعلا الشقه المناسبه ليك مع ذكر بعض الملاحظات الهامه التي يجب ان تأخذ في الحسبان عند شراء اي شقه .

سبب الشراء ( هشتري الشقه لايه ) :

سؤال مهم جدا لازم تسأله نفسك , انا عاوز اشتري الشقه لايه ؟ , هل هشتري الشقه علشان العائله اسره و لا هشتري الشقه علشان الزواج و لا انا واحد اعزب و يادوب عاوز شقه اقعد فيها ولا انا عاوز اشتري شقه للاستثمار العقاري علشان ااجرها و بعد فترها ابيعها
لان الاجابه علي السؤال ده بتفرق كتير جدا , لو هتشتري شقه لعائله يبقي لازم تشتري شقه مساحتها كبيره تناسب عدد افراد العائله و تبقي 3 غرف لو العدد كبير , اما لو شقه للزواج فهنا ممكن شقه مساحتها صغيره مفيش مشكله , اما لو واحد اعزب فهو ممكن يعيش في شقه بغرفه واحده بدون مشكله و هكذا .



الامور الماديه ( انا معايا كام ) :

النقطه ديه مهمه جدا جدا جدا , المبلغ الذي تمتلكه هو الي هيتحكم في اختيارك للشقه الي هتشتريها , الواحد مننا لو معاه مليون جنيه هيشتري شقه زي ما هو عاوز عاوز يشتري في المطريه هيشتري عاوز يشتري في التجمع الخامس هيشتري , اما لما يبقي معاك مبلغ قليل هنا الجزء المادي بيتدخل في الحسبه و بيوجهك لمناطق معينه و طبعا كل ما زاد الجزء المادي و المبلغ الي معاك كل ما هتقدر انك تشتري شقه في مكان افضل و في دور افضل و في موقع افضل .

المنطقه التي توجد بها الشقه ( هشتري الشقه فين ) :

سؤال مهم و اجابته هتوفر عليك راحه طول العمر , طب ليه ! , لما انا ابقي موظف مثلا في القاهره و اروح اشتري شقه في الاسكندريه , يبقي انا كل يوم الصبح هخد 3 ساعات و زيهم اخر النهارد 3 ساعات , علشان بس اروح الشغل و ارجع منه , يبقي انا ضيعت من يومي 6 ساعات في مواصلات و قرف و تعب , و ايضا لما يبقي عندي اولاد و مدارسهم في مكان و اروح انا اخد شقه في مكان بعيد عن المدرسه بوقت كبير جدا يبقي انا بقسي علي اولادي و بتعبهم
والحل ؟ الحل انك وانت بتختار شقه و بتبحث عنها تبحث عن شقه تكون اقرب ما يمكن من مكان عملك و مكان عمل زوجتك و مكان مدارس اولادك , الامور الاساسيه الي بتحدث كل يوم و هتأثر عليك و علي افراد اسرتك .

موقع الشقه في العماره ( هشتري اي شقه في العماره ) :

الدور الواحد في اي عماره بيبقي فيه كزا نموذج للشقق , في شقه بتبقي ( خارجي ) في شقه بتبقي ( داخلي ) بمعني في شقه الخارجي بتبقي علي الشارع و الداخلي الي بتبقي جوا في ضهر العماره , الفرق بين الاثنين في المميزات و العيوب , ان الشقه الخارجي بتبقي اغلي من الداخلي , لان الخارجي بتكون علي واجهه العماره داخل ليها هواء بتشوف الشارع , علي عكس الداخلي بتبقي مفيش فيها رؤيه للشارع , بتبقي مخنوقه شويه من الهواء .
هخد الشقه في دور مرتفع ولا دور منخقض , ده سؤال مهم جدا ايضا , انا واحد من الناس مش بحب الادوار العاليه جدا زي الدور السابع و الثامن و التاسع و هكذا , و بحب اخد في الادور المنخفضه لعده اسباب ان انا بقلق من الادوار العاليه , و ان الاسانسير لو الكهرباء قطعت هتبقي مشكله في الطلوع و النزول كل يوم , بس في اشخاص اخرين لا يحبوا الادوار العاليه اوي يقولك مزاج و هواء صافي و جميل و تبعد عن الدوشه و الازعاج
اختصار لمميزات الادوار المرتفعه في العماره و عيوبها : – مفيش تراب و عفره الشارع
– الهواء جميل جدا الي فوق و غير ملوث و نسمه هواء جميله
– مفيش اي دوشه او ازعاج نهائيا
– المنظر من فوق رائع للي مش بيخاف من المرتفعات
العيوب :
– الكهرباء لو قطعت باستمرار بتبقي مشكله في الطلوع و النزول بسبب توقف الاسانسير
– مشكله المياه بتوصل ضعيفه للادوار العاليه الا بالموتور و فيها بعض المشاكل برضه مع انقطاع الكهرباء
مميزات الادوار المنخفضه في العماره و عيوبها :
– الكهرباء تقطع متقطعش مفيش مشكله الاسانسير بيبقي ملوش لزمه اوي السلم شغال
– المياه بتوصل للشقه قويه طوال اليوم
العيوب :
– الشقه بيبقي جي عليها تراب الشارع باستمرار
– دوشه السيارات و الخناقات في الشارع بتوصل و تسمع في الشقه و بيبقي في ازعاج
فالافضل طبعا هو اختيار الادوار المتوسطه الرابع , الخامس , السادس هو الاختيار الامثل
و محاوله تجنب الدور الاول و الاخير , لان بالمعني العامي هما الاسوء , فالاول انت اي حد بيعطس في الشارع كانه معاك في صالون الشقه بالظبط و الخوف من سرقه الغسيل و الشقه و خلافه , والدور الاخير في الصيف الشقه بتبقي فرن لان الشمس ضربه في الشقه باستمرار

تشطيب الشقه ( هخد الشقه علي ايه ) :

الجزء ده مرتبط بالناحيه الماديه جدا , ليه ؟ لان الشقه الي علي الطوب الاحمر سعرها اقل من الشقه المتشطبه سوبر لوكس و بفرق كبير
طيب انا هختار طوب احمر او سوبر لوكس بناء علي ايه ؟
اولا بيبقي بناء علي انا معايا فلوس قد ايه , ثانيا في بعض الناس يقولولك انا اخد شقه علي الطوب الاحمر و اقسم الغرف و الشقه علي مزاجي و اعمل فيها ديكورات زي ما انا عايز و تبقي علي ايدي و كل حاجه فيها معموله صح الصح
واحد تاني يقولك لا انا مفيش فيا حيل امسك شقه علي الطوب الاحمر و اقعد بقي اجيب بتاع الكهرباء يعملي كهرباء و السباك يعملي سباكه و مش عارف السيراميك و مش عارف الجبس و مش عارف المواسير و مش عارف بتوع المحاره و لسا النقاشه و موال يقولك لا انا اخدها متشطبه و يادوب اعمل فيها نقاشه جديده و خلاص
فهو الامر عائد عليك علي حسب امورك الماديه و علي حسب اختيارك انت .
اوراق الشقه ( وضع الشقه قانونيا ايه ) :

لازم تبقي عارف ان مع تدهور الاوضاع الامنيه بيتم هدم الكثير من المنازل و بيطلع مكانها ابراج و بيبقي كتير منها غير مرخص , فلازم تعرف شقتك ورقها عامل ازاي هل الشقه في برج مرخص ولا لا ديه نقطه مهمه و طبعا الشقه الي في برج غير مرخص بتبقي سعره قليل جدا مقارنه بالشقه الي في برج مرخص
النقطه الاخري هل الشقه ليها حصه في الارض ولا لا
واحد هيسألني و يقولي يعني ايه ( حصه في الارض ) هقوله حصه في الارض يعني لا قدر الله العماره وقعت لو مفيش معاك حصه في الارض يبقي انت ملكش حاجه ولا ليك حق في ارض العماره , اما لو ليك حصه في الارض لما بيلموا من بعض علشان يطلعوا بالعماره مره اخري بتبقي ضامن حق شقتك بالمساحه و السم بالظبط بعدد الامتار
وطبعا سعر الشقه الي بدون حصه في الارض منخفض جدا مقارنه بالشقه الي ليها حصه في الارض .

ملاحظات هامه عند شراء اي شقه :

في شويه ملاحظات كده لازم تضعها في الحسبان ايضا لما تشوف شقه و تكون خلال هتشتريها و لازم تتأكد منها
– اوراق الشقه لازم تعرضها علي محامي علشان يقولك وضع الشقه القانوني و تطمن منها
– تسأل علي عمر العماره و تعرف هل عليها مشاكل ولا لا و تشوف حاله العماره هل جيده ولا فيها شروخ و مشاكل
– تشوف الشقه قبلي و لا بحري مش بتقدر تعرفها من بصتك علي الشقه فلازم تشوف هل الشقه هواها كويس ولا لا , ولو عجباك بس قبلي هل هتقدر تشتري تكييفات و مراوح و تتحمل الحر و لا لا .
– هل في محلات مزعجه تحت العماره زي محل مشويات محل خشب ميكانيكي , كل دول ممكن يتسببوا في قرفك حتي لو كانت الشقه جنه فلازم تختار الشقه في موقع جيد و تبص علي الي ممكن يؤثر عليك لان ممكن يكون صاحبها هيبيعها بسبب العيب ده .
– تقسييم الشقه هل مناسب ليك ولا لا , واقصد بالتقسييم مكان الغرف مكان الصاله مكان المطبخ يعني كان في شقه شوفتها و عجبتني بس كانت غرف النوم علي الشارع واخده الازعاج كله و الريسبشن معزول جوا و ملوش تهويه

واخيرا اسأل الله ان يوفقنا جميعا للخير , و دايما يجب انك تستخير ربنا قبل الانتهاء من الموضوع , و الحرص علي انك تخد اراء الي حوليك علشان ممكن غيرك يكون شايف حاجه انت مش شايفها تفرق معاك جدا


المصدر :
تجربتي في اختيار الشقة المناسبة للشراء