محتار اشتري ولا لأ فيليشيا ارجو المساعده

**eslam ezzat** · 07-04-2015 01:33 PM

في عربيه معروضه عليا فيليشيا موديل 1998 وفيها شويه حاجات محتاجه تتعمل علي كلام صاحبها

اولا : بتسخن بشكل ملحوظ وجابت وش سلندر وهو غيره بس بيقولي ان الميكانيكي ركب الجديد مش كويس ف لسه بتسخن جامد
ثانيا : في مقص ف العفشه مكسور وعايز يتغير ويتشيك علي باقي العفشه
ثالثا : التكيف بيقولي انه محتاج شحن وصيانه علشان في تسريب ف الماسوره الي مدخله للعربيه
رابعا : العربيه فيها توكيل وانا هبقي التوكيل التاني لو حبيت اسجل ممكن اسجل لوحدي ولا لازم المالك الاول والتاني الي هيبيعلي ولو ينفع ايه مصروفات التسجيل وكده

الحقيقه دي اول عربيه ليا وجايبها اتعلم عليها ومقتنع بيها الصراحه بس خايف من موضوع السخونيه ده
كمان مش عارف اماكن الصيانه وقطع الغيار فين ف حلوان لاني من حلوان

انا متابع القسم بقالي فتره لاني كنت بقارن بين الفيليشيا والكيا برايد والتمبرا

ياريت حد يفيدني اخدها ولا بلاش مع العلم ان سعرها كوس اوي وصاحبها قالي هكرمك فيها علشان عايز اخلص من وجع الدماغ خصوصا انه كان جايبها لمراته

السعر الي قاله مبدأي 25000 وقالي هيصلح الحاجه الي فيها بس انا طلبت منه اني انا الي اصلحها ونقدر ثمن التصليح ونخصمه من سعر العربيه

ف ايه رأيكم بما يرضي الله تستحق ولا بلاش ؟؟؟

واسف للاطاله بس انا ابيض ياورد لسه ف العربيات ف ياريت ماتبخلوش بالنصيحه عليا وربنا يوفق بالي فيه الخير

**eslam ezzat** · 07-04-2015 01:35 PM

مستني ردودكم بأسرع وقت لان الراجل مستعجل ف بيعها

**Ahmed abdkarim** · 07-04-2015 02:58 PM

بما انك حتتعلم و العربية اكيد حتحتاج تصليح ابعد عن التمبرا انا كان معايا تمبرا على فكرة ولسه بايعها من اقل من شهر عربية ممتازة بس عاوزه اللى فاهم لها .

خليك فى الكيا برايد او الفليشيا وانا ارجح الفليشيا

**Abo_Mazen** · 07-04-2015 03:02 PM

لأ خليه هو يصلح الحاجه اللي فيها .. ..ده كفاية موضوع السخونيه ده لوحده مصيبة ..ده ممكن المشكلة تطلع في البلوك ..هتعمل إيه وقتها ..هتلاقي نفسك لابس في حوار مكنه ..بص يابا ..يضبط موضوع السخونيه ده على الأقل ..وبعدين بقيت الحاجه تتقدر زي ما إنت عايز

**adiaa222** · 07-04-2015 03:58 PM

المشاركة الأصلية كتبت بواسطة m_m_sh_a

لأ خليه هو يصلح الحاجه اللي فيها .. ..ده كفاية موضوع السخونيه ده لوحده مصيبة ..ده ممكن المشكلة تطلع في البلوك ..هتعمل إيه وقتها ..هتلاقي نفسك لابس في حوار مكنه ..بص يابا ..يضبط موضوع السخونيه ده على الأقل ..وبعدين بقيت الحاجه تتقدر زي ما إنت عايز

+100
اوعى تشتريها بمشكلة السخونية

**Abo_Mazen** · 07-04-2015 04:02 PM

المشاركة الأصلية كتبت بواسطة adiaa222

+100
اوعى تشتريها بمشكلة السخونية

والله العظيم إنت راجل 100 100 ..أنا قلتله في الأول ..إلا شرائها وهي فيها مشكلة السخونيه ..ده السخونيه دي عفريت ممكن ما يطلعش غير بتغيير المكنه كلها

**eslam ezzat** · 07-04-2015 05:22 PM

يا جماعه انا متشكر جدا علي سرعه الردود
في واحد زميلي ميكانيكي قالي لو خلصتها علي 20 تمام ونحل كلل حاجه ونغير بجديد وانت الكسبان كلامه صح ولا بلاش علشان السخونيه ده

**Abo_Mazen** · 07-04-2015 06:04 PM

المشاركة الأصلية كتبت بواسطة eslam ezzat

يا جماعه انا متشكر جدا علي سرعه الردود
في واحد زميلي ميكانيكي قالي لو خلصتها علي 20 تمام ونحل كلل حاجه ونغير بجديد وانت الكسبان كلامه صح ولا بلاش علشان السخونيه ده

إمممم ..هتسقط مكنه في حدود أربع خمس تلاف جنيه ..أنا بقول هتسقط مكنه لإن أنا مش ضامن موضوع الحراره ده هيودينا لغاية فين ..وتعمل شوية الشغل اللي في العفشه ..إن كان كده ماشي ..إنت الكسبان ..بس سؤال ..ليك باااااااااااااااااااال لوقفة الصنايعية عشان تبقى تعمل الشغل اللي فيها ده ؟؟؟؟؟؟؟

**hardmind_doc** · 07-04-2015 03:06 PM

لو العربية دواخلها سليمة وهيخصم التصليح من السعر يبقى اتكل على الله وهاتها
ومشكله السخونة واحد صاحبى مركب رادياتير كبير بمروحتين وترموستات بيفتح بدرى شوية على 80 تقريبا
التكييف ممكن يبقى صعب فى تصليحه الاحسن تغير كل المواسير لو الكومبريسور سليم لان هتلاقى الدورة فيها اخرام كتير وهتتكلف شحن كتير
التوكيل عادى لحد تلات توكيلات فى العربية مش مشكلة والضريبة حوالى 1000 جنيه اقل او اكتر شوية
الفيليشيا كويسة بس تحل مشكلة السخونة كويس وتحط مياه خضرا فى الرادياتير عشان تظبط معاك ان شاء الله

**eslam ezzat** · 07-04-2015 06:18 PM

طيب انا دلوقتي قدامي فيات سيينا حالتها نضيفه 1400 موديل 2000 عامله 28000
وفي هيونداي اكسيل نضيفه جدا كامله 1500 موديل 1998 عامله 31000
تنصحوني بأيه ولو في اقتراحات تاني ياريت