انا ابنى فى مدرسة بنين فقط و كنت عايز احول لة من المدرسة لان مستواها وحش و قدامى مدرسة بس مشتركة فى المرحلة الثانوية ، اية رايكم احولة ولا السن دة خطر انة يكون معاة بنات فى الفصل
عرض للطباعة
انا ابنى فى مدرسة بنين فقط و كنت عايز احول لة من المدرسة لان مستواها وحش و قدامى مدرسة بس مشتركة فى المرحلة الثانوية ، اية رايكم احولة ولا السن دة خطر انة يكون معاة بنات فى الفصل
رأيي الشخصي خطر جدا حتى لو في الإعدادي مش الثانوي
ناس هتقولك ما هي الجامعة فيها اختلاط ! هقول ده مش مقياس نبني عليه طبعا ، لأن الجامعات فيها بلاوي ونسب الزواج العرفي فيها مرتفعة جدا ده غير اللي مش زواج عرفي ! نسأل الله العافية
نصيحة بلاش لو عايز تحافظ عليه ، ومتقارنش بجيلنا لأن جيلنا مختلف كلية عن جيل أفلام السبكي وهيفاء وهبي وصافيناز !
دور علي مدرسه تانيه مش مشتركه حتي لو بعيده حاجه بسيطه ، التليفزيون والنت خربوا عقول البنات والولاد
انا فعلا قلقان انى ادخلة مدرسة مشتركة لان جيلنا غير جيل دلوقتى و برضة فى سن المراهقة بيكون فية اندفاع غير الجامعة ممكن يكون ابتدى يعقل شوية
اسمحلي ارد على موضوعك انا حاليا في 3 ثانوي يعني تقريبا في سن ابن حضرتك ..
الموضوع مش هيفرق لو بنين بس او مشتركه الموضوع هيفرق على حسب شخصية ابنك .
انا هرد على الموضوع من رأيي بناء على الي شايفه من زمايلي وخصوصا اننا كمان من الارياف يعني مدرسه مشتركه بدون نظام وبدون حتى زي مدرسي يعني سايبينها على ربنا .
ابن حضرتك لو عاوز يكلم بنت هيكلم حتى لو مش في مدرسه مشتركه . ولو ابنك مش عاوز لو قدامه ملكة جمال حتى .
انا شايف انها بالعكس حاجه حلوه لان ابن حضرتك اكيد مش هيحب ان مدرس يقوله كلمه مش حلوه قدام بنت فهيذاااكر ودي حاجه في صالحه لانه غصب عنه هيذاكر عشان ميتحرجش قدام حد .
الحاجه التانيه اني شايف معظم الناس الكبار بيخافوا من الحكايه دي طب لييه ؟؟
مش لازم تدخل في دماغ ابنك ان الولد والبنت مع بعض يبقى على طول حاجه غلط .
لانه هيلاقي صعوبه بعد كدا في التعامل ومش شرط دلوقتي بعدين لما يكبر وشغله يفرض عليه التعامل مع كل الناس ساعتها هيفشل .
ابنك ممكن في الاول هيبقى فاهم حجات غلط وان بناات بقى وهيصه بس لما يتعامل فكره هيتغير وهيتعامل كانهم ولاد مش بنات وحيااته هتتغير 180 درجه وهيبقى لبق في الكلام وهتلاقيه بقى بيعرف يتصرف ويتكلم مع الناس مش انطوائي ومحروج ومكسوف .. هتلاقي خبره راجل عنده 40 سنه موجوده في ابن حضرتك الي في 3 ثانوي الزمن اتغير واحنا جيل ما يعلم بيه الا ربنا :-d
ورساله لاي اب : لو انت شايف ان وجود ابنك مع بنت في المدرسه غلط متغيرلوش المدرسه .. غير تربية ابنك
ياريت مكونش غلطان في حاجه وانا اتكلمت بالي انا حاسه وشايفه حتى من بقيت زمايلي :)
كلام سليم تماما
أوافق عليه بشدة لأن الزمن تغير و عصر أقفل علي عيالك ده أنتهي
اليوم كل حاجة متاحة و بكل سهولة................... النت ماسابتش حاجة
التربية و زرع الثقة في الأولاد أهم من أي حاجة لأن الوازع التربوي هو أللي ممكن يحمي الأولاد من المخدرات مثلا (أو أي حاجة فيها ضرر)
مينفعش نحط البنزين جنب النار ونقول ممكن ميحصلش حاجة أو الموضوع هيفرق حسب اتجاه الهوا !
مينفعش مثلا أخلي ابني يشرب سجاير ويجربها علشان يتأكد انها مضرة بالصحة ولما يكبر ميفكرش فيها !
الدين بتاعنا أمرنا بغض البصر ونكلم النساء من وراء حجاب يعني ساتر وحائل ومقالش اننا نقعد في فصل واحد ونكلم بعض كأنها ولد زيي أو أختي والكلام الفاضي ده لأن الشيطان بيجري من ابن آدم مجرى الدم والإنسان بطبعه ضعيف والحل هو البعد عن مواطن الفتنة والشبهة مش التعرض لها والاحتكاك بها
طول عمرنا مكنش فيه مدارس مختلطة وطلعنا جيل محترم في أغلبه شوف لما زاد الاختلاط بقى حال الشباب الصغير عامل ازاي
ممكن كلامك ده ينفع في مجتمعات منفتحة بطبيعتها ومتحررة زيادة عن اللزوم فمش هيأثر فيها احتكاك زيادة في التعليم لأنها كده كده بتحتك ببعضها في كل مجالات الحياة وده برده ممنعش أبدا من انتشار الزنا والدعارة والاغتصاب والخيانة الزوجية والتفكك الأسري والشذوذ إلى آخر الموبقات ، الاختلاط محلش كل البلاوي دي بل على العكس زودها ، مجتمعنا الشرقي والمسلم طبيعته مختلفة ومينفعش نعمل زي المجتمعات الغربية
برده مسألة انك عايش في قرية وكان فيه اختلاط ومحصلش حاجة -افتراضا- ممكن يختلف كتير عن حال المدن فالمقارنة بين المجتمعين غير منضبطة لأن مجتمع القرية بطبيعته لسة عنده شوية آداب واحترام ورجولة وشهامة أكتر من مجتمع المدينة اللي كل الناس متعرفش بعض تقريبا والجار ممكن ميعرفش اسم جاره اللي فوقيه على عكس مجتمع القرية اللي كله يعرف بعض وبيتعاملوا مع بعض كأنهم أسرة واحدة فعلا
وده يا ترى رأي حضرتك الشخصي ولا في دليل على الكلام ده ؟
إذا كان أمهات المؤمنين والصحابة الأطهر قلبا وعفة والأكثر دينا أمروا بذلك لعلة (ذلكم أطهر لقلوبكم وقلوبهن) أفليس من باب أولى أن يؤمر بذلك من هم دونهم في طهارة القلب والعفة والدين ؟!
قال ابن جرير الطبري رحمه الله في "تفسيره" (20/ 313) : " يقول : وإذا سألتم أزواج رسول الله صلى الله عليه وعلى آله وسلم ، ونساء المؤمنين اللواتي لسن لكم بأزواج ، متاعًا : فاسألوهن من وراء حجاب " انتهى .
وقال القرطبي رحمه الله في "تفسيره" (14/ 227) : " في هذه الآية دليل على أن الله تعالى أذن في مسألتهن من وراء حجاب ، في حاجة تعرض ، أو مسألة يستفتين فيها ، ويدخل في ذلك جميع النساء بالمعنى " انتهى .
وقال القرطبي رحمه الله أيضا ، في تفسير قوله تعالى : ( وَقَرْنَ فِي بُيُوتِكُنَّ وَلا تَبَرَّجْنَ تَبَرُّجَ الْجَاهِلِيَّةِ الْأُولَى ) الأحزاب/33 : " معنى هذه الآية الأمر بلزوم البيت ، وإن كان الخطاب لنساء النبي صلى الله عليه وسلم ، فقد دخل غيرهن فيه بالمعنى ؛ هذا لو لم يرد دليل يخص جميع النساء ، كيف والشريعة طافحة بلزوم النساء بيوتهن ، والانكفاف عن الخروج منها إلا لضرورة ، على ما تقدم في غير موضع ." انتهى . من " تفسير القرطبي" (14/179) .
وقال الجصاص رحمه الله في "أحكام القرآن" (5/242) : " هذا الحكم وإن نزل خاصا في النبي صلى الله عليه وسلم وأزواجه ، فالمعنى عام فيه وفي غيره ، إذ كنا مأمورين باتباعه والاقتداء به ، إلا ما خصه الله به دون أمته " انتهى .
قال الشيخ محمد صالح المنجد: "تعليل الأمر بالسؤال من وراء حجاب بقوله : ( ذَلِكُمْ أَطْهَرُ لِقُلُوبِكُمْ وَقُلُوبِهِنَّ ) ؛ فالعلة من الأمر كونه " أطهر للقلوب " ، ومعلوم أن أمهات المؤمنين أطهر النساء قلوباً ، فغيرهن من النساء أشد حاجة لتحصيل ما يحقق أطهرية القلوب" .
قال الشيخ محمد الأمين الشنقيطي رحمه الله : " قوله تعالى : ( وَإِذَا سَأَلْتُمُوهُنَّ مَتَاعاً فَاسْألُوهُنَّ مِن وراء حِجَابٍ ذلِكُمْ أَطْهَرُ لِقُلُوبِكُمْ وَقُلُوبِهِنَّ ) : قد قدّمنا في ترجمة هذا الكتاب المبارك أن من أنواع البيان التي تضمّنها : أن يقول بعض العلماء في الآية قولاً ، وتكون في نفس الآية قرينة تدلّ على عدم صحة ذلك القول ، وذكرنا له أمثلة في الترجمة ، وأمثلة كثيرة في الكتاب لم تذكر في الترجمة ، ومن أمثلته التي ذكرنا في الترجمة هذه الآية الكريمة ، فقد قلنا في ترجمة هذا الكتاب المبارك : ومن أمثلته : قول كثير من الناس إن آية " الحجاب " ، أعني : قوله تعالى : ( وَإِذَا سَأَلْتُمُوهُنَّ مَتَاعاً فَاسْئَلُوهُنَّ مِن وَرَاء حِجَابٍ ) خاصة بأزواج النبيّ صلى الله عليه وسلم ، فإن تعليله تعالى لهذا الحكم الذي هو إيجاب الحجاب بكونه أطهر لقلوب الرجال والنساء من الريبة في قوله تعالى : ( ذالِكُمْ أَطْهَرُ لِقُلُوبِكُمْ وَقُلُوبِهِنَّ ) قرينة واضحة على إرادة تعميم الحكم ، إذ لم يقل أحد من جميع المسلمين إن غير أزواج النبيِّ صلى الله عليه وسلم لا حاجة إلى أطهرية قلوبهن ، وقلوب الرجال من الريبة منهنّ ، وقد تقرّر في الأصول : أن العلّة قد تعمّم معلولها " انتهى من "أضواء البيان" (6/ 242) .
وروى البخاري (5232) عَنْ عُقْبَةَ بْنِ عَامِرٍ رضي الله عنه أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : ( إِيَّاكُمْ وَالدُّخُولَ عَلَى النِّسَاءِ ، فَقَالَ رَجُلٌ مِنْ الْأَنْصَارِ : يَا رَسُولَ اللَّهِ أَفَرَأَيْتَ الْحَمْوَ ؟ قَالَ : الْحَمْوُ الْمَوْتُ ) .
قال الشيخ الشنقيطي رحمه الله "أضواء البيان" (6/249) : " فتحذيره صلى الله عليه وعلى آله وسلم هذا التحذير البالغ من دخول الرجال على النساء , وتعبيره عن دخول القريب على زوجة قريبه باسم الموت ، دليل صحيح نبوي على أن قوله تعالى : ( فاسألوهن من وراء حجاب ) عام في جميع النساء كما ترى ؛ إذ لو كان حكمه خاصًا بأزواجه صلى الله عليه وعلى آله وسلم , لما حذر الرجال هذا التحذير البالغ العام من الدخول على النساء " انتهى .
كلامك في الصميم الله ينور عليك بصراحة قلت اللي كنت بحاول اعبر عنه فعلا.
بالنسبة للاراء اللي بتقول بنزين جنب النار.. فصدقني حضرتك المشكلة الفعلية انك متخيل ان ابنك "بنزين" و البنات "نار" اللي بيفرق حاجتين مفيش تالت لهم - تربية ابنك - تربية المدرسة. لكن فكرة ان اقفل على ابنك دي انتهت و زي ما طُرح هنا ان جيل زمان اللي كان ممكن يتقفل عليه بقى مستحيل. بالتالي اللي يحكم يروح انهي مدرسة هو فقط فقط سمعة المدرسة و التعليم فيها بغض النظر عن ولاد-بنات-مشتركة.
لا يا فندم ده مش تخيل ده واقع حذر منه الرسول صلى الله عليه وسلم في عدة أحاديث منها (ما تركت على أمتي بعدي فتنةً أشد من النساء) وحديث (ما خلا رجل بامرأة إلا كان الشيطانُ ثالثهما)
وهو واقع أيضا لا ينكره إلا مكابر فالمجتمعات الغربية لم يمنعها الانفتاح والاختلاط من الوقوع في الدعارة والزنا والاغتصاب والخيانات الزوجية وما وقعنا نحن في هذه الموبقات إلا بسبب مسايرتنا لهذه المجتمعات المنحلة
دلوقتي احنا فتحنا على أولادنا ومقفلناش عليهم وكانت النتيجة إننا من أعلى دول العالم في نسبة التحرش وازدادت حوادث الاغتصاب بشكل بشع ناهيك عن زنا المحارم عياذا بالله وغير ذلك من المهلكات
اللي بيفرق مش اني أفتح على ابني أو أقفل عليه وإنما أتبع الهدي النبوي بأنه إذا بلغ سن الزواج زوجته وعففته لكن الراجل يبقى عنده ٣٠ سنة وبيشتغل في مكان فيه اختلاط وكان في جامعة فيها اختلاط والتليفزيون والإنترنت فيه كل الفتن والمفروض أنتظر منه يكون إنسان سوي مش بيفكر في غريزة طبيعية عند كل المخلوقات ؟! كده احنا بنضحك على نفسنا لأننا عارفين كويس إيه اللي بيحصل وبنحاول نظهر في مظهر القوة والعفة والاستغناء عن الشهوة والوضع غير كده تماما
انا كنت فى مدرسه مشتركه من اول حضانه ل 3 ثانوى و الموضوع مش هيفرق خااااااالص لو ابنك بتاع بنات هيخرج من المدرسه يخش المدرسه الى جنبها بتاعهه البنات و يعيش و لا هتحس بحاجه و لو مش بتاع بنات هيبقو معاه وش مش عايز و مش عارف يتكلم بالعكس لو هو شخصيه محترمه هيساعده يكون ليه زمايل من الجنس الاخر عشان الصدمه فى الجامعه متبقاش اوى كده
انا فاكر اول يوم جامعه لما كلمت زميلتين على نقل المخاضره كان جنبى 8 ولاد من مدارس غير مشتركه شايفنى جايمس بوند عشان متكسفتش اتكلم معاهم و لا فكرت فى ولا واحده فيهم اى شىء اكتر من زماله
اى شىء تانى هو نسبى جدا و بتفرق من شخص لاخر و عمر المدرسه مهى الى هتخلى ابنك مش بتاع بنات او العكس
و برضه فى الاول هيبقى مبهور بالفكره شويه و بعدين هتروح يعنى لو هو لسه فى اولى مثلا ماشى عشان الانبهار هيروح قبل الشهاده ويلحق يركز و هيفيدو فى الجامعه جدا
هوا كلام حضرتك في جزئيه صح ان مينفعش اننا نسيب الولاد مع البنات ونحط البنزين على النار
بس دا لو الولد صايع مثلا والبت مش مؤدبه
هما لو الولد والبنت مش كويسيين ماهما ممكن يتقابلوا ويخرجوا في الشارع مش محتاجين المدرسه
ومينفعش تقارن برضه ان التحرش سببه الاختلاط التحرش سببه عدم التربيه والاخلاق
الابن لازم يتربى كويس ويبقى هوا المحترم عشان لما يختلط بمجتمع وطلع فاسد ميتأثرش
الرسول صلى الله عليه وسلم مولود وسط الكفره وعباد الاصنام وكان بيسيبهم ويتعبد في غار حراء ..
المجتمع الفاسد مش هيأثر قد ما التربية نفسها هيا الي هتخلي الولد محترم او ﻷ
وافرض ان مدخلتوش مدرسه عشان الاختلاط وحش وفي المستقبل حب يدرس في اوروبا او امريكيا الي فيها كل حاجه مفتوحه ... اكيد هتعرف انه هيفشل ويبوظ ويعصي ربنا
لكن لو حضرتك واثق انك مربي ابنك كويس لو حاطه مع ابو لهب والشله هتبقى متطمن ان الغلط في حته وابنك في حته تانيه
90% من الخيانات الزجية بتكون بين زملاء العمل وده طبعا احد نواتج الاختلاط
عموما استاذ اسر لا تشغل بالك لان كل واحد عند فكر في دماغة مش هيغيره تقوله قال الله وقال رسوله صلى الله عليه وسلم هيلف هيلف ويرجع لرأيه
ا
النبي صلى الله عليه وسلم نهى حذيفة رضي الله عنه من التواجد في اماكن الفتن خوفا على دينه وقد اجمع العلماء بحرمة التواجد في اماكن الفتن
وبعدين الشهوات ملهاش دعوة بالتربية خالص خالص ودليلي ان الله عزوجل اثنى على يوسف عليه السلام عندما دعته امراة العزيز مع انه نبي الله ومع ذلك همت به وهم بها لولا ان رأى برهان ربه (طبعا مع اختلاف العلماء في تفسير المقصود بهم بوسف عليه السلام )
وكما وقوع الزنا في عهد خير القرون واقامة النبي صلى الله عليه وسلم حد الزنا ودليلى المرأة التي قال النبي صلى الله عليه وسلم (لقد تابت توبة لو قسمت على اهل الارض لكفتهم ) انها تربية نبي الله صلى الله عليه وسلم ومع ذلك الطبيعة البشرية موجودة
[overline]ثم نأتي للنقطة الاهم التربية
نحن جيل لا يربي اولاده بل اولادنا هم من يربونا حقيقة موجودة التربية في البيوت المصرية اصبحت صفر من يربي الان هو السبكي وللاسف يربي الاب والابن
[/overline]
والله ابدا احنا كلنا مسلمين بس هوا الموضوع دا مبيتجزأش ياما منع الاختلاط تماما زي السعوديه
ممنوع الاختلاط في المطاعم ولا المدارس ولا الاسواق ولا حتى الحدائق والملاهي ولا الشغل ولا في اي حته دا المفروض الصح
انما متمنعش الاختلاط في المدارس وتفتحه في بقيت المجالات يعني هتمنعه في المدرسه يبقى زيها الشغل والمطاعم والحدائق والاسواق
انما انت لما تمنع الاختلاط في المدارس بتزرع جوا الابن ان ولد مع بنت بيبقى حاجه عيب ودا فعلا الي الولد بيتربى علييه مليون في الميه دماغه مس هتشيل ان فكره ولد وبنت يبقى حاجه غلط
عشان كدا ممكن تلاقي طلاب الجامعه مشاكلهم كتير لانه بيتخرج من الثانوي حاطت في دماغه ان كليه بقى يعني بنات واختلاط وفسح وحب والسبب في كده ان حضرتك الي زرعت جوا ابنك كدا
وحضرتك بتقول ان 90% من الخيانات بتكون بين زملاء العمل طب دي مشكلة اختلاط ولا مشكلة اخلاق ؟؟
كلنا متفقين ان في انحدار في اخلاق المجتمع المصري دلوقتي وقلة دين واخلاق وامانه ..
الانحراف سهل اليومين دول ومش محتاج اختلاط .. هوا محتاج نت وشوية add للبنات ..
وانا في الاول وفي الاخر مش بدافع عن الفكره بس بقول يا تطبق كلها في كل المجالات يا تتفتح كلها .
و الله انا بقالي 13 سنة أشتغلت في أماكن مختلفة و محصلش ان حد قدر يتعدى حدوده معايا مش تقول لي خيانة!! و الانحراف و الخيانة طبعا موجودين انما الموضوع ملوش دعوة بشغل الستات و تعليمهم زي ما مصرين تصوروا.
عموما اللي فكره كله ان النساء شياطين و ان الراجل كل اللي في باله الحرام أول ما يشوف أي واحدة و كل اللي بيحركه شهواته مش حيغير تفكيره هو حر. أما الناحية الدينية يا ريت كل واحد متبع فكر معين ميحاولش يفرضه على غيره و يبينه على انه هو الدين الصحيح لأننا الحمدلله أغلبنا حريص على دينه و مش شرط اخد المذهب اللي انت مقتنع بيه.
مش حأرد على نقاشات دينية أو فتاوى عشان انا مش بحب الجدال و كل واحد مقتنع باتجاه مش حيغيره
مع احترامي لحضرتك لكن مصر تحتل المراكز الأولى عالميا في نسبة التحرش حسب الإحصائيات الرسمية لدرجة أن المنتقبات اللي مش باين منهم حاجة بيتعرضوا للتحرش فمسألة ان حضرتك بقالك ١٣ سنة محصلش حاجة لحضرتك فلأني هفترض صدق حضرتك طبعا فدي حالة نادرة جدا مينفعش نقيس عليها وربنا يديمها عليكي طبعا
من الناحية الدينية ده مش فكر معين حد بيحاول يفرضه ، حضرتك جزمتي أن المقصود في آية (فاسألوهن من وراء حجاب) هم زوجات النبي صلى الله عليه وسلم فقط ولما طالبتك بالدليل حضرتك مجبتيش الدليل وتحججتي بأن حضرتك مش بتحبي الجدال ! يبقى حضرتك بتفسري القرآن برأيك بدون أي دليل وبالتالي حضرتك اللي عايزة تفرضي رأيك الشخصي علينا بدون أي بينة على الرغم من مخالفتك لأهل العلم والأئمة اللي فسروا الآية على خلاف ذلك
وأنا مأجبرتش حضرتك على الدخول في نقاشات دينية لأن حضرتك اللي رديتي على كلامي على سبيل تصحيح استدلالي بالآية ولما رديت على حضرتك وأثبت خطئك وأتيت بكلام المفسرين للآية فأسهل شيء طبعا هو التهرب بحجة إن حضرتك مش بتحبي الجدال !!
مسألة حضرتك مقتنعة بشيء ومش هتغيريه حتى لو كان مخالف لصريح الدين فده شيء يرجع لحضرتك طبعا وربنا هو اللي بيحاسب عباده مش أنا ولا غيري لكني أدعو لي ولكي بالهداية لأن مخالفة أمر الله عندا وكبرا خطر عظيم والرجوع للحق فضيلة
التحرش منتشر في مصر بشكل فظيع و انا ماتكلمتش عنه خالص, لأن للأسف مفيش واحدة في مصر ما أتعرضتش ليه مرات كتيرة. انما التحرش عادة مش بيبقى من زملاء الدراسة أو العمل و قليل لما ده بيحصل في المجتمعات دي الا لو فيه تشجيع (فيه استثناءات طبعا).
ربنا يهديك و يهدينا للحق. انت عارف كويس ان فيه تفاسير و اراء كتير في المسائل دي بدليل عدم الاجماع على النقاب مثلا, انما انا برضه مش مهتمة بالجدال و الكوبي بيست و لو معتبرني بتهرب براحتك :) أنا ما حاولتش أفرض رأيي على حد أو أزعم انه الصواب المطلق زي ما حضرتك مصر ان رأيي مخالف لصريح الدين و ده مش حقيقي, أنا رأيي مخالف لبعض التفاسير اللي بتخرج الأيات من سياقها و ان كنت مش بأنكر على حد انه ياخد بيها
على فكرة أنا مقتنع إن فرضية النقاب مش مجمع عليها وإن العلماء مختلفين فيها على قولين بالفرضية أو السنية لكن يبدو ان حضرتك عندك خلط في فهم الآية لأن المقصود بالآية هو الحجاب مش النقاب ، النقاب له أدلة أخرى غير هذه الآية واختلف العلماء في فهمها أما الحجاب فواجب بالإجماع ومفيهوش خلاف والآية دي عامة لكل المسلمين مش زي ما حضرتك قلتي إن فيها خلاف ! إلا بقى لو حضرتك تقصدي بالمخالفين إسلام بحيري مثلا !
المقصود بالأية الاحتجاب الكامل عند التحدث مع الرجال, مش الحجاب اللي هو غطاء الرأس خالص و هي من الأيات اللي بيستدل بيها من يروا بفرض النقاب.
بسم الله الرحمن الرحيم ( يا أيها الذين آمنوا لا تدخلوا بيوت النَّبِيّ إلا أن يؤذن لكم إلى طعام غير ناظرين إناه ولكن إذا دعيتم فادخلوا فإذا طعمتم فانتشروا ولا مستأنسين لحديث إن ذلكم كان يؤذي النَّبِيّ فيستحي منكم والله لا يستحي من الحق وإذا سألتموهن متاعا فاسألوهن من وراء حجاب ذلكم أطهر لقلوبكم وقلوبهن وما كان لكم أن تؤذوا رسول الله ولا أن تنكحوا أزواجه من بعده أبدا إن ذلكم كان عند الله عظيما) الأية بالكامل تتحدث عن بيت الرسول صلى الله عليه و سلم و زوجاته. حضرتك حقك تقتنع بتفسير يناقض صريح الأيات و يعمم الحكم على جميع النساء رغم وضوح النص, و من حقي أنا كمان مقتنعش بالتفسير ده, ايه المشكلة؟؟ أنا كمان مقتنعة بفرضية الحجاب انما ده ملوش علاقة بموضوعنا.
و الله العظيم ما مهتمة أدخل في مناقشة دينية خالص, لكن مقتنعة تماما أن شغل المرأة و خروجها بصفة عامة مش حرام و موضوع الأختلاط ده فيه تشدد عند البعض يناقض السيرة النبوية نفسها.
أنا عمري ما سمعت اسلام البحيري على فكرة و لا مهتمة اعرف بيقول ايه, بس كمان فيه كتييييييير من الشيوخ مش بقتنع بكلامهم و أدلتهم و بشوف ان فيه خلط كبير بين العادات و التقاليد اللي كانت و مازالت موجودة في الجزيرة العربية و بين أحكام الدين. النقاشات في المواضيع دي و الأختلافات و الردود منتشرة عالنت و مش مكانها هنا و لا ده هدف الموضوع, أنا أعتراضي الوحيد ان واحد يقول رأي أو فتوي دينية بأعتبارها الحق المطلق و اللي يرفضها يبقى بيرفض الدين.
شفت بقى أزاي دخلتني في جدل أنا مش عايزاه :) ؟
وأنا هحترم رغبة حضرتك في عدم الدخول في جدل لأن النقاش مع حضرتك مش هيبقى ليه أي فائدة طالما أنا بستدل بتفسيرات أئمة وحضرتك بتستدلي بتفسيرات عقلك وفهمك الشخصي اللي مع كامل احترامي لشخص حضرتك الكريم ليس له أي قيمة لأن حضرتك غير مؤهلة علميا لتفسير كلام الله وكذلك أنا ومرجعنا عند الاختلاف هو أئمة التفسير زي ما ربنا أمرنا (ولو ردوه إلى الرسول وإلى أولي الأمر منهم لعلمه الذين يستنبطونه منهم) وزي ما قال الرسول صلى الله عليه وسلم (من قال في القرآن بغير علم فليتبوأ مقعده من النار) رواه الترمذي وحسنه
انا مستغربة جدا من الكلام الغريب ده. الخيانات دي من ناس غير محترمة غير متربية سيئة السلوك عديمة الاخلاق و دي صفات اشخاص سواء اشتغلوا او لا . الانسان المحترم الناس بتحترموا و هو بيحترم نفسه رجلا كان او امرأة في اي مكان و الشركات و المؤسسات لها قواعد و مش معقول يبقي فيها تسيب للدرجة دي، لو واحد رجل حتي تعدي بالقول علي زميل رجل مثله بياخذ جزاء و خصم و ممكن الموضوع يحول للتحقيق فما بالك لو تعدي علي زميلة . انا مشفتش و لا سمعت عن اللي حضرتك بتقوله ده و لو حصل يبقي المشكلة بردة في أخلاق المجتمع التي تدنت و العمل منها برئ. العمل لكسب الرزق الحلال فقط و ليس لهدف اخر.
كمان مسألة التحرش دي في الشارع مش في الشغل . لو زي ما بعض الزملاء في موضوع اخر ذكروا نماذج للتساهل و التعدي في التعامل بين بعض البنات و الشباب في العمل ، دول كده كده ده سلوكهم و اخلاقهم و العمل مش هو السبب.
كلام السيدة hh عين العقل
أولًا لا يوجد أي دليل لا في الكتاب ولا في السنة يحرم الإختلاط بين الرجال والنساء وشكل الفصل الذي هو موجود في السعودية هو غريب على الإسلام
إنما المحرم هو ( الخلوة )
الذي يستدل بأن مصر الأولى عالميًا في نسب التحرش ليعلم أن السعودية التي تحقق الفصل بنسبة كبيرة جدًا رقم 3 في نسب التحرش عالميًا
وأفغانستان متصدرة المشهد
( إذًا الفصل لم يفعل أي شيء )
عشان نتكلم كلام منطقي وعلمي في الرجل الطبيعي تأتيه الشهوة سواء بوجود أو بلا وجود المرأة
إن كان معتاد على وجود المرأة لن يؤثر هذا في سلوكه الدائم إتجاهها
وإن فُصل عنها وتعامل معها في أي مناسبة ستأتيه كل الأفكار المتعلقة بالشهوة
في مصر نظرة الناس للمرأة على أنها جسد رغم أرتفاع نسبة الحجاب بل والنقاب زادة نسبة إنتهاك المرأة
لأنها في نظرهم ( جسد )
إذًا المسألة ثقافية وأخلاقية بالدرجة الأولى
حتى الأطفال يتم التحرش بهم
هل ستفصلون الأطفال كذلك !
هؤلاء مرضى ويجب علاجهم ثقافيًا وأخلاقيًا وقانونيًا لا يجب فصل و تغيير حياتنا الطبيعية من أجلهم وكأنهم بشر طبيعيين ونحن المرضى !
هذا إقرار بتعاطفنا مع هؤلاء المرضى
ومن يبرر لهم هو ببساطة لا يضع اللوم على الحثالة بل يريد تغيير شكل الحياة الطبيعي بين البشر
وليتهم يستركون النساء بعد كل هذا الفصل إلا إن وضعتم النساء في مدن منفصلة عن الرجال !
ماهذا الجنون
البشر ليسوا حيوانات من يمارس أفعال الحيوانات يتم ترويضه وتأديبه وتعليميه
حتى يعرف عن سلوك البشر حيال غرائزهم وإن لم يفعل نُكل به لا بُرر له
ياسيدي صاحب الموضوع
علم إبنك أن المرأة ليست جسدًا وأن الشهوة تأتي حتى للفئران والصراصير فهي ليست ميزة حتى يتم التفاخر بها بأي شكل
ومن يتقصدون التعبير عن هذه الشهوات بالكلام أو الأفعال أمام النساء الغريبات هم من المطعون في رجولتهم
ومن يتحرش بإمرأة أو ينتهكها سواء فكريًا أو جسديًا ( لا شرف له )
نمي في إبنك أن للرجل ( شرف ) لا يجب عليه تدنيسه
بعد أن تربيه على هذه القيم أتركه في أي مجتمع كان وسيتصرف كالبشر
على فكرة الكوبي بيست اللي حضرتك بتعمله ما أسموش دليل :) لو حضرتك دورت عالنت برضه اللي بتعمل منها كوبي حتلاقي مناقشات و ردود و أسانيد من الأحاديث و السيرة على مخالفة التفسير اللي حضرتك مقتنع بيه للسنة النبوية الشريفة ناهيك عن النص القرأني الواضح. انا مش مهتمة أدخل في سباق كوبي بيست ,انما اللي عايز يدور المجال مفتوح.
كل رأي هو أجتهاد يحتمل الصواب و الخطأ, انما المشكلة دايما في اللي شايف مذهب فقهي هو الصواب المطلق و كل ما عداه خروج عن الدين زي ما انت مصر كدة :)
هو مش حضرتك مش عايزة تدخلي في جدل ديني ؟!
وخلاص بعد كده مش هبقى اعمل كوبي وبيست هبقى أنقل كلام الأئمة وأكتبه بنفسي حرف حرف بدون كوبي وبيست :)
مسألة الاجتهاد اللي يحتمل الخطأ والصواب ده شيء أكيد لكن مش حضرتك اللي تخطئي اجتهاد العلماء أو تصححيها ، اللي يرد كلام الأئمة شخص مؤهل يكون زيهم مش لا مؤاخذة واحد أقصى حاجة عملها إنه قرأ الأربعين النووية أو رياض الصالحين وفجأة لقى نفسه قاعد قدام الكمبيوتر وقرأ تفسير إمام لف العالم وسافر شهور وسنين علشان يسمع حديث أو اتنين وبكل بساطة كده يقوم الأخ ده فارد ضهره على الكرسي تحت التكييف يمسك الكيبورد ويكتب: أنا مش مقتنع بالكلام ده ! ده اجتهاد منه وأنا مش ملزم بيه !
أنا نقلت كلام أئمة معتبرين في تفسير الآية وطالبت حضرتك بالدليل على كلامك وعلى رفضك لهذا التفسير فكان رد حضرتك انك مش بتحبي تدخلي في جدل ديني ! طيب على أي أساس مش عارف ؟ مش تنورينا حضرتك علشان ممكن نستغني عن تفاسير الأئمة دول كلهم ونتبع فضيلتك ؟ :)
لو حضرتك قرأت بقيت التعليقات كنت هتعرف اني مقولتش انه مش حرام بس هل الاختلاط في المدارس حرام وفي الشغل مش حرام ؟؟
لو حضرتك ممانع عشان الاختلاط حرام يبقى حضرتك المفروض مبتروحش اماكن فيها اختلاااط ابدا
حضرتك عاوز تفهمني انك مبتروحش حديقه !؟؟ مش بتلاقي هناك اختلاط عادي ؟! مشدا اسمه اختلاط برضه وحرام وهناك بدون رقابه يعني سايبه عن المدرسه الي بيكون فيها انضباط .. حضرتك بطلت تروح شغل عشان فيه اختلاط ؟؟
بطلت تركب ميكروباص وتقد وفي معاك نص الميكروباص حريم وممكن تحصل وتقعد جمبها ؟؟؟
حضرتك بطلت تروح مولات مثلا كارفور ولا مول العرب عشان فيه هناك اختلاط ؟؟؟
حضرتك مروحتش الجاممعه ؟؟؟؟؟ اكيد حضرتك روحت مش حرام عشان في هناك اختلاط ؟؟؟؟ بطلت تروح الجامعه ؟!!!
هوا انا مع حضرتك حرام بس مش حرام هنا وحرام في المدارس لو بطلت حضرتك تروح الاماكن دي يبقى عندك حق اننا نقول مدخلوش مدرسه مشتركه ..
انما هنقول لا مش هندخله مدرسه مختلطه عشان حرام وبعد 3 سنين ابن حضرتك يتخرج ويلاقي البنات في كل مكان وهوا مش عارف يتعامل معاهم يبقى حضرتك عملتلته مشكله ...
بعيد عن التعليقات الكتير باعات ابو آسر ربنا يجعلها في ميزان حسناته انه بيوضح للناس دينهم ..
بس في امور المجتمع هوا الي فرضها علينا كلنا محتاجين نروح اسواق وحدائق والشغل والمدارس رغم ان فيه اختلاط .. بس انا شايف ان دا مش بمزاج حد وطالما دا بقى امر واقع فمواجهته من البدايه افضل بكتييير
لم يرد دليل بتحريم الإختلاط
وحتى اللي بيعتبر وجود ( الأختلاط ) في الحدائق والمستشفيات و المواصلات والشوارع
هو فرض من المجتمع ياريت يقترح علينا الحل للمعضلة دي .. !
و صدقوني بجد
لو هنعمل مدن مخصصة للرجال ومدن مخصصة للنساء هيكون أوفر
ومدن النساء نعملها جدران عازلة ومرتفعة وعليها حرس غلاظ شداد .
وبعدين الأسر يبقالها استثناء ... يعني مثلًا يتعملهم مباني مخصوص لها ممرات تحت الأرض نعدي منه فقط الرجال اللي ليهم أسر
ونعمل كاميرات مراقبة لحد ما الراجل دا يدخل بيته يفضل مراقب ومرصودة حركته
والأسرة دي لو فيها ولد مجرد مايكمل 10 سنين يتم عزله لمدينة الرجال
كدا نبقى حليناها خالص .
حضرتك انا مش شيخ ولا بقرأ كتب وتفاسير عشان اقول لحضرتك انه حرام ولا مش حرام الموضوع ان الاستاذ ابو اسر جاب ادله وانا معارضتوش لاني معنديش حق اعارضه من غير ما اكون واثق من كلامي وانا وعنديش وقت اقرأ ولا ابحث في حرمانية الموضوع او عدمها
انا كل الي اعرفه ان في علماء قالو حرام وفي ناس اقالو مش حرام بس له ظوابط ....الخ )
والاعضاء الكرام مع العلماء الي بيقولوا انه حرام فانا حبيت ارد عليهم من مبدأ انه فعلا حرام ودا هيبقى احسن ما اجي اعمل زي حضرتك واقول لا مش حرام .. لان ساعتها الموضوع مش هيبقى مفيد لان الي قال حرام صح محدش يلومه بيتبع كلام علماء والي قال برضه مباح صح لانه بيتبع كلام علماء تانيين ...
يا جماعه من الآخر وبدون فزلكة وفلسفة
ابنك او بنتك محترم يبقى تحافظ على احترامه وتبعده عن الطريق اللي بيخرب اي احترام ولكنا عارفين كده
ابني فتوة اروح انزلة منطقة كلها بلطجية واقول اصله فتوة
الله عزو وجل خلقنا كلنا بفطرة محددة ومعروفة للكل الراجل بيميل للست
هنخترع بقه بعد كده ..... طيب انت حللتها لنفسك تعمل ايه للي مش محترم نعمل ايه للي ضعيف
هنقعد بقه ندرس كل واحد
النار جمب البنزين مالهاش غير طريق واحد ......... ما اجتمع رجل وامرأة الا وكان الشيطان ثالثهما ..... قولا واحدا
والقصد من الحديث مش التواجد والمكان وانما ان لم يحدد ان الراجل محترم فمش هيعمل حاجه او البنت محترمه فمش هتعمل حاجه وانما عموم الكلام يعني ان الفطرة هيا الميل واول ما توجد فرصه مع ضعف النفس البشرية ..... خلصت
اللهم اهدنا واحفظنا
بشكل عام النقاش جيد ومثمر ولا داعى للانفعال وكل يقول رايه فيما يعلم ويعتقد انه صواب
المشكلة انه نظام الحياة اساسا تم تخطيطه وتقنينه بعيدا عن الشريعة واصبح الاختلاط جزء اصيل من ثقافة المجتمع وبالتالى عندما نقول بانه حرام يكون الرد وكيف تكون الحياة اذن؟لن تمشى فى الشارع لن تذهب الى الحديقة لن تذهب الى العمل وهكذا
انا اعيش فى السعودية منذ اكثر من 15 سنة وطبيعة الحياة هناك فيها مراعاة كبيرة للقواعد الاسلامية فى مسالة اختلاط الرجال بالنساء فى معظم نواحى الحياة والحياة هنا منظمة جدا وفيها تطبيق لكافة النظم الغربية تقريبا فى كل شئ ولم يمنع ابدا فصل الرجال عن النساء فى البنوك والكليات والمدارس واماكن العمل العامة فى ان يكون نظام الحياة على مستوى راقى جدا لدرجة انى لما بانزل مصر اجازة باشعر بان عجلة الزمن عادت بى 50 سنة للوراء
هناك فرق لمن يطرحون اسالة وكيف تكون الحياة اذن بين مؤسسات قمت ببناءها ليذهب اليها شريحة معينة من المجتمع فى وقت معين من اليوم مثل الكليات والمدارس والجامعات وبين مكان اخر يذهب اليه كل الناس بشكل عشوائى مثل الحدائق العامة والشوارع فى اى وقت والقاعدة الشرعية فاتقوا الله ما استطعتم وايضا سددوا وقاربو ا بس تبقى النية موجودة الاول بدلا من اختلاق الف عذر للتهرب من الاوامر الشرعية
تقبلوا مرورى