تقييمي للبريليانس v5 بعد 41000 كيلو متر
:hello:
الحقيقة أنا من مالكي السيارة بريليانس v5 منذ شهر ديسمبر عام 2012 وهذه أول مشاركة لي ، كانت معايا لانسر بومة 2007 سبورت لمدة ستة سنوات حتي قمت ببيعها وشراء السيارة v5 لذلك قمت بعمل مقارنة سريعة بينها وبين سيارتي القديمة اللانسر ، اولا من حيث خامات التقفيل تتفوق ال v5 ومن حيث عزل الصوت ال v5 تتفوق ومن حيث الثبات علي الطريق ال v5 تتفوق ومن حيث الساوند سيستم ال v5 تتفوق ومن حيث الراحة والرفاهية ال v5 تتفوق ومن حيث ثقل وسماكة الصاج ال v5 تتفوق ومن حيث الكماليات ال v5 تتفوق أما من حيث التسارع اللانسر تتفوق وده طبعا راجع لفرق الوزن بين السيارتين حوالي 300 كيلو تقريبا .
الفرق بين البريليانس v5 وأي سيارة تانية نفس الفئة بعض عيوب خامات التقفيل زي الكليبسات وخلافه اللي بتسبب في بعض الأحيان أصوات تزييق او تنميل . والحقيقة دي بس الحاجة اللي كانت مضايقاني في العربية لكن بخلاف ذلك العربية جيدة جدا وفعلا الحمد لله انا مبسوط بيها .
سبق وتم تغيير علبة الدريكسيون منذ حوالي سنة ونصف وشغالة معايا كويس جدا الحمد لله ، قابلتني مشكلة عند 30000 كيلو متر هي إرتفاع صوت الموتور يصاحبه تزنيدة بالعربية وعندما ذهبت للتوكيل أفادوا بأن الكومبريسور باظ وللأسف كنت عديت سنتين وبالتالي خلصت فترة ضمان الكهرباء فغيرت الكومبريسور خارج التوكيل وللأسف فضل العيب زي ماهو وغرمت ثمنه لأن الكومبريسور طلع سليم وده نتيجة خطأ التوكيل في تشخيص العيب ، المهم رجعتلهم تاني وطلع العيب من قاعدة الموتور وغيروها في الضمان ورجعت العربية لطبيعتها ونعومتها كما كانت - صحيح الواحد مبيتعلمش ببلاش - وبصراحة دي بس المشاكل اللي قابلتني في العربية وبمقارنتها بالمشاكل اللي كانت بتقابلني مع اللانسر فهما متساويتان لأني برده قابلني شوية مشاكل مع اللانسر مع الإستعمال والتوكيل اللي برده في أحيان كثيرة كان غير موفق ولبسوني شوية خوازيق
العداد عندي عامل 41000 كيلو متر والحقيقة من خلال تجاربي مع فروع التوكيل وبعض المراكز اللي فاتحينها الفنيين بالخارج اللي شغالين في بافاريا وبريليانس قدرت أعالج معظم مشاكل التزييق والتنميل اللي كانت مضايقاني وكلها كانت حلها بسيط جدا لأن المشكلة الحقيقية كانت معرفة سبب الصوت زي مثلا التزييق في فرش الابواب .. وربنا يحفظنا جميعا ..
علي فكرة اي حد عاوز يعمل صيانته او عنده اي مشكله يوجد فنيين ميكانيكا وعفشة وكهرباء وفك وتركيب وعاملين نظام سيرفيس وكل حاجة متاحة عندهم زي كمبيوتر كشف الاعطال وخلافه ومكانهم آخر شارع فيصل المريوطية اللي عنده رغبة يتواصل معايا ...
