سييد .. ليون .. 308 .. قاشقاى .. اوكتافيا .. جوليتا .. Ds5
السلام عليكم
كنت محتاج اراء حضراتكم فى الاختيار بين الموديلات دى علشان محتار جدا ... وانا عمه بدور فى فئه من 180 الى اقصى حاجه 300 الف بالعافيه ... و بميل للعربيات الهاتش باك بس فى نفس الوقت عائليه .... سواقتى عنيفه شويه وبحب الموتور القوى ... العربيه لازم تكمل معايا على الاقل 6 سنين ... بمعدل استهلاك حوالى 170 الف كم ... معظم سواقتى طرق سريعه ... طبعا لازم بنزين 92 ... بحب العربيه المليانه اوبشنز بالذات سقف بانوراما ولو امكن بيتفتح و زينون اصلى
اولا : سيات ليون هاى لاين ....
مميزاتها .. شكل خارجى مميز وخاصه الفوانيس ... سعرها كويس جدا .... سحبها كويس ... شنطتها كويسه ....اوبشتز كويسه ..... تدفع 5 الاف جنيه زياده تاخد ضمان 5 سنين ... سقف بانوراما بيتفتح وفوانيس متطوره بنظام ليد
عيوبها .... اسعار قطع غيار . سمعت ان الفانوس ب 13 الف ... تعمل مع 92 بس احد ملاكها كان بيقول انها كانت بتعمل كركره بسيطه اختفت مع ال 95 ... وطبعا موضوع الفتيس اللى حتى لو صدقوا ان عيوبه اختفت بس مازلت على الاقل بتعامله معامله خاصه و بحرص شديد ... مستوى الانتريور مش عاجبنى اوى بصراحه
ثانيا : كيا سييد هاى لاين ......
مميزاتها ...... سعر كويس .... شكل خارجى كويس ... وسع داخلى كويس جدا ... توكيل محترم ... اوبشنز كويسه ... انتريور معقول ( اللى نازل بره تحفه بالذات الشاشهالكبيره و شاشه العدادات ) ... مشتركه مع السيراتو فى قطع غيار كتير .. سقف بانوراما بيتفتح ...
عيوبها .... سحب بناءا على الارقام عادى حوالى 11 ثانيه .. متشال منها حاجات كتير نازله بره ...مش عارف عن استهلاكها وعلوها حاجه .. مفيهاش زينون
ثالثا : بيجو 308 ...
مميزاتها ... اوبشنز كويسه جدا ..... شكل داخلى و خارجى جيد جدا ... توكيل معقول .... سعر كوييس بالنسبه مستواها .... لو اعتماديتها زى 508 تبقى كويسه جدا ... استبن بنفس حجم وشكل العادى.... موتور قوى و بنزين 92 بدون مشاكل ... كشافات ليد متطوره
عيوبها ... شنطه صغيره .... كل الوبشنز تقريبا على شاشه تاتش فلو باظت هتبهدل .... احتمال تكون واطيه شويه بس لسه متجربتش ... فرش قماش وصعوبه تركيب فرش جلد علشان ايرباجات الكراسي ... سقف بانوراما ثابت
رابعا : قاشقاى .....
مميزاتها ... شكل كويس ... عاليه ... اوبشنز كويسه جدا .... بنزين تقريبا 92 .. زينون
عيوبها ... شنطه ديقه ... سحب عادى جدا ان مكانش تقيل ..... حجز 6 شهور واساسا الحجز موقوف دلوقتى ... سقف بانوراما ثابت
خامسا : اوكتافيا هاى لاين
مميزاتها ... انتشار و اعاده بيع و توافر بدايل لقطع الغيار ..اعاده بيع ..... فيها كل الاوبشنز تقريبا .... شنطه بحر ... عاليه عن الارض .. زينون .. وسقف بيتفتح
عيوب .. حجم كبير نوعا بالنسبه لشوارعنا فى اسكندريه ... موتور ضعيف ... شكل داخلى و خارجى عادى جدا ... مش حاسس ان فيها متعه السواقه اللى فى الباقيين
سادسا : الفا روميو جوليتا هاى لاين
مميزات ... انتريور و شكل خارجى جميل .... موتور تحفه ... بنزين 92 على كلام المبيعات ... شنطه معقوله .... اوبشنز كويسه ... على غير المتوقع بعض قطع الغيار اسعارها كويسه .... اختلفت الاراء فى علوها عن الارض ... بانوراما بيتفتح
عيوب .... سعر عالى نوعا ما .... توكيل جديد مع عربيه نادره مخاطره كبيره بصراحه ... مفيهاش زينون ... مفيش توكيل فى اسكندريه
سابعا : سيتروين ds5
مميزات ..... شكل داخلى و خارجى خرافى .... اوبشنز كويسه .... علو عن الارض كويس ... وسع صالون وشنطه كويس جدا ... سحب معقول ... بزين 92 ..فوانيس زينون متطوره و تتحرك مع اتجاه السياره
عيوب ... توكيل تعبان جدا و مش موفر قطع غيارها خاصه الخارجيه من تجربيه احد ملاكها واسكندريه التوكيل فيها تعبان جدا .... قطع غيار اسعارها غاليه نسبيا للباقيين .... استهلاك بنزين عالى جدا فى الزحمه .... سعر عالى ... عفشه ناشفه نسبيا ..
ملحوظه ... تم استبعاد الاتى ...
سيتروين c5 لقله الاوبشنز و كبر حجم العربيه
ستروين ds4 لصغر حجمها و عدم وجود شاشه وزجاج الابواب الخلفى مبيتفتحش
جولف بسبب الغاء الهاى لاين و الانتريور خاصه الفرش تعبان غير موضوع الفتيس
بيجو 508 بسبب حجمها الكبير مع انها عربيه رائعه
اوبل انسيجنيا .. حجم كبيير .. استهلاك بنزين عالى .. غلو قطع الغيار ... مشاكل فى التيل و الطنابير
اودى a3 هاتش باك .... بسبب انها واطيه جدا 11 سم
هيونداى ix35 و سبورتاج ... عربيات عاديه جدا ... مش بتاع جرى ... مش حاسس فيهم بمتعه السواقه
تويوتا اوريس شنطه صغيره .. انتريور عادى جدا .. اوبشنز اقل من الكورولا .. مفيش زينون .. سقف بانوراما ثابت
اوبل استرا هاتش باك ... سحب عادى .. شكل قديم ممكن يتغير قريب .. استهلاك بنزين عالى نسبيا .. اوبشنز عاديه جدا .. مفيش زينون ولا بانوراما ولا حساسات
هوندا سيفيك ... شكل عادى جدا .. اوبشنز عاديه .. انتريور خاماته سيئه .. واطيه على الارض
سوبارو XV ... عربيه جميله و قويه ... يعيبها قله الاوبشنز .. عدم توافر قطع الغيار ... شنطه صغيره
اسف على الاطاله ... بس لعل ارائكم و اختياركم يساعدنى على الاختيار ... متشكر جدا مقدما
اسلام ابراهيم