الموضوع: تجربة جهاز "إنفرتر" سوكام الهندي

تجربة جهاز "إنفرتر" سوكام الهندي:
انا حبيت أنقل ليكم التجربه ديه بناءاً على نصيحة استاذ طارق عبد السلام بإني أشتري انفرتر، اليوم تم الشراء والتركيب بحمدلله هو قدرته 1500 وات، بيصفي 1200 وات، وبطاريتين 70 أمبير لإن الجهاز 24 فولت فالبتالي هو محتاج بطاريتين علشان يتوصله عليه، مع العلم إن في أجهزه "بيور ساين ويف" وأجهزه "موديفيد ساين ويف" بمعنى إن البيور ساين ويف هو موجه نقيه مخصصه للتعامل مع الاجهزه الحساسه زي اللي بتيجي من الحكومه، إنما الموديفايد ساين ويف بتكون مجهزه للمواتير وكده ولا ينصح بها في الإناره والمراوح والأجهزه الحساسه، ديه خلاصه بحث شهرين..
التكلفه:
الجهاز: 1800 جنـيه "سوكام، هندي، 1500 وات"
البطاريه: عدد 2 بطاريه سولار "ديب سايكل" نيو ماكس كوري، 2200 جنيه
الحامل: 300 جنيه
التركيب: 400
الإجمالـــي: 4700
الجهاز حالياً مشغل 18 لمبه موفره، و4 مراوح، و3 تليفزيون، وقدرة التشغيل القصوى بالنسبة للبطاريات المرفقه هتكون ساعه ونص كحد أقصى تقريباً، وكل ما قل التحميل على الجهاز كل ما زادت فترة التشغيل وقت الإنقطاع، يعني ممكن تشغل عليه 5 لمبات وتليفزونين ومروحتين وشواحن موبايل و2 لابتوب ورسيفير وراوتر ساعتين ونص، يعني خلي الحمل التقيل لو في ضيوف أو البيت مليان ناس، بالنسبه للعيوب والمميزات الخاصه بالشركه والجهاز:
المميزات:
1 - مفيش زيت ولا بنزين.
2 - صوت أقل بكثير جداً ولا يقارن بصوت المولد الأخر.
3 - الشركة كانت متفقه معايا على معاد وفعلاً وصلوا في الميعاد مظبوط.
4 - سهولة التركيب وقلة الأضرار مقارنة بالمولد الأخر.
5 - التشغيل التلقائي للتيار بدون التدخل بأي شكل من الأشكال.
6 - سعر الجهاز والبطاريه مناسب مع سعر السوق.
(بالنسبة لهذا النوع من الجهاز والبطاريات بالتحــــديد)
العيوب:
1 - إرتفاع سعر تكلفة التركيب، لو كهربائي فاهم هياخد 50 جنيه.
2 - إرتفاع سعر الطربيزه اللي محطوط عليها، 300 جنيه أخرها 120 جنيه.
2 - صنايعي التركيب إللي جي مع الشركه إسلوبه غير لطيف، وكان في تعديل بسيط في الشقه ورفض إنه يعمله، وطلبت الجهاز يكون في غرفه منفصله علشان صوته "صوته أصلاً لا يذكر" ورفض بس لما أصريت نقلوه للغرفه المقابله للعداد.
3 - مفيش ضمان مع البطاريات مع إنهم في أول مكالمه قالي الضمان 5 سنين، بس الجهاز معاه ضمان سنه بالفاتوره وشهادة الضمان. "عموماً النوع ده من البطاريات بعد البحث الطويل، هو أفضل نوع للأجهزه ديه"
4 - صوته مش زي ما معروف عنه انه سوبر سيلنت، بمعنى إنه لو محطوط في الريسبشن أو جمب الباب الصفاره بتاعته مزعجه، مش زي ما كنت فاكر انه فعلاً ملوش صوت تماماً، عموماً مع الوقت قاللي هتاخد عليه بس انا مصدقتوش وعلشان كده حطيته في غرفه منفصله ملهاش علاقه بغرفة المعيشه، مع العلم إن ده صوته الطبيعي مفيش عيب في الجهاز.
5- الكهربائي وصل مفاتيح الاحمال عليه، ووصل كهرباء الحكومه على الداخل بتاع الجهاز، اللي انا اكتشفته ان الجهاز هيفضل شغال طول السنه، وسألت الراجل قالي اه عادي، اولاً صوت الصفاره رخم، ثانياً ليه يفضل شغال طول السنه؟ يعني ليه مفيش حل كهربائي يخليني اوصله في الصيف، وفي الشتاء افصله؟؟ يا ريت حد من الخبراء هنا يفيدني :)
وأخيراً، لو عايز تشغل مراوح، إضاءه، أجهزه خفيفه، يبقى انفرتر، عايز ثلاجات وتكييفات وغساله وسخان، يبقى مولد، وربنا يعدي الــ 7 سنين اللي جايين على خير.
وشكر خاص للأستاذ طارق_عبدالسلام :)

المشاركة الأصلية كتبت بواسطة ebb

الف مبروك ومشكور على نقل التجربة

الله يبارك في حضرتك والعفو لا شكر على واجب :)