ايه خطوات تشطيب شقة ع الاحمر ؟

السلام عليكم ورحمة الله

الشقه ع الاحمر ولسه البرج باقيه تحت الانشاء ولسه متعملوش مواسير لحد الشقه والميه موجوده والكهربا مقدم عليها خلاص
وصاحب البرج بيقول شطب من قبل ما يوصل العمومى من صرف وميه وكهرباء ...
بصراحه البرج حديث البناء وصاحب العقار كل همه يدخل الكهرباء الاول عشان يطلع بباقى الادوار السكنيه الاخرى
يعنى هياخد وقت على ما يدخل العمومى للبرج كله
تنصحونى بإيه اشطب عادى واكسب وقت ولا استنى لما العمومى يدخل للبرج كله

هل شغل الجبس لما نعمل المحارة والكهربا الاول ؟
ولا ع الاحمر عادى ؟
وكنت عاوز اعمل حديد على شبابيك المصقط وسور البلكونه وتركيب سلك عليهم
ممكن يتعمل ع الاحمر ولا بعد المحارة افضل ؟

وهل تركيب الحديد والسلك دلوقتى قبل عمل الشبابيك سواء خشب او اولوميتال ؟

وايه تقريبا التكلفة المبدئية ؟


متابعينكم للاهميه
وشكرا جزيلا

أول حاجة بتعملها الكهرباء والسباكة ..ودول بيتعملوا علي الطوب ...ولو مفيش عداد عادي ...الكهربائي بيعملك التمديدات الداخلية لحد ما يخرج الاسلاك لحد لوحة العدادات

والسباكة نفس الموضوع ...بس مشكلة السباكة لو مفيش مية مش هيعرف يجرب ودي مشكلة شوية

بعد كدا بتركب حلوق الابواب والشبابيك برضو علي الطوب الاحمر ....والحديد بيتركب في الاخر بعد تشطيب المحارة وممكن يتركب بعد تشطيب الشقة كلها مفيش مشكلة

بعد كدا يبدأ شغل المحارة والتبيض والدهانات والجبس والديكورات ..الخ

بعد كدا يبدأ شغل السيراميك او البلاط



بخصوص الشقة لو مساحتها من 100 ل120 متر ...التشطيب اللوكس من 50 ل 60 الف بدون عدادات وكدا ( يعني محارة ودهان وتوصيلات كهرباء وسيراميك ولمض وديكورات ومصنعيات ......الح

أولاً : أغلى نصيحه .. أوعى تشطب في الشتا .. خلي كل شغلك في الصيف
بسبب تمدد وإنكماش الخامات وحجات كتير .

1- تأسيس الكهرباء + السباكه
( ماتبخلش في فيش الكهرباء والدش والتليفون والنت .. كل غرفه اعمل فيها جنبين على الأقل من الحجات دي )
وماتنساش تعمل حساب كهرباء التكييفات .. ومفيش مانع مفتاح موتور مياه إحتياطي بالسلك جاهز )
ولو هتعمل كشاف إضائه فوق مراية الحمام .. تعمل حسابها في توصيله ومفتاح

2- تركيب حلوق الابواب والشبابيك
3- المحاره والمصيص وشغل الجبس ( كله تبع المحاره )
4- السيراميك

5- رخامة المطبخ ( تكون شاري حوض المطبخ قبلها علشان يتفرغ مكانه في الرخامه بالمقاس )
6- تركيب الابواب والشبابيك والكوالين بدون أوكر
7- تسيب المحاره تنشف أطول فتره ممكنه ( في الصيف شهرين تلاته عالاقل )
8- تركيب مفاتيح الكهرباء ومد السلوك داخل الخراطيم ( تكملة التأسيس )

9- شغل النقاشه والدهان مرحلة المعجون ( سيب المعجون ينشف براحته اوي علشان لو في تنميل يظهر قبل الدهان )
10- لو هتركب تكييف او اي حاجه هيتفحرلها في الحيط .. ركبهاً بعد الوش التاني للمعجون وقبل الدهان
11- تركيب الزوايا الخشب والبرور على المعجون وقبل الدهان
12- تفنيش المعجون وتصليح الامور
13- الدهان والالوان للحوائط والخشب وكله

14- تفنيش الكهرباء ( تركيبب اللمض والكشافات والنجف و اوشاش المفاتيح الخارجيه وكله )
15- تنفنيش السباكه ( تركيب الأحواض وأطقم الحنفيات والدش وقاعدة الحمام والمحابس .. الخ )
16- تركيب اوكر الابواب
17- تنظيف الشقه وتبخيرها وتعقيمها ومسحها مسحه نضيفه
18- شغل الشنيور ( تعليق براويز وستائر ومرايات وخلافه )
19- مسحه جميله تاني للشقه .

مبروك عليك إنتهاء التشطيب .. أفرش عفشك :)

متشكر جدا لافادتكم القيمة
بالنسبة لتركيب شاشة التلفزيون بفشر عادى ولا بيتفحرلها فى الحائط ؟

جزاكم الله خيرا

شبابيك الالوميتال بتركب على حلوق خشب ؟ ولا الوميتال برده ؟

وتركيب الحديد ينفع ع الاحمر ولا بعد المحارة ؟

و تركيب شاشة التلفزيون بفشر عادى ولا بيتفحرلها فى الحائط ؟

ولو هعمل تكييف مستقبلا يعنى مش دلوقتى خالص اعملها القاعدة بتاعته من دلوقتى ولا اكتفي بعمل توصيلاته الكهربية فقط ؟

متابعكم
وشكرا جزيلا

اقتباس:

---

المشاركة الأصلية كتبت بواسطة wael6

شبابيك الالوميتال بتركب على حلوق خشب ؟ ولا الوميتال برده ؟
وتركيب الحديد ينفع ع الاحمر ولا بعد المحارة ؟
و تركيب شاشة التلفزيون بفشر عادى ولا بيتفحرلها فى الحائط ؟
ولو هعمل تكييف مستقبلا يعنى مش دلوقتى خالص اعملها القاعدة بتاعته من دلوقتى ولا اكتفي بعمل توصيلاته الكهربية فقط ؟
متابعكم
وشكرا جزيلا

---

بخصوص الشبابيك الالومينتال
في 3 أفكار
1- تركيبها على حلوق خشب ( الوضع السائد )
2- تركيبها على المحاره بدون حلق خشب ( لازم صنايعي المحاره يغلفلك الشباك مظبوط اوي كأن في حلق راكب )
3- الفكره التالته اللي جت في بالي
ان كل الشبابيك تتغلف سيراميك زي شباك الحمام والمطبخ والالومنتال يركب عليهم
شايفها انضف وافضل لأن السيراميك بيتعمل بميزان الميه وبيبقى حته واحده مظبوط ومش هيكلفك كتير .. ممكن بواقي السيراميك يتعمل بيها الشبابيك

و انصحك تعمل البلكونه سيراميك في الحوائط بتبقى انضف وتتحمل عن الدهان
وفي الحاله دي مش هتحتاج لا تمحرها ولا تبيضها .

ولو هتركب ستاره في البلكونه .. اشتري ماسوره حديد من عند اي محل ادوات سباكه .. وركبها قبل المحاره .. علشان هيتفحرلها بهيلتي في الحيطه عالجنبين
وطبعا تركب فيها الحجات اللي بيتعلق فيها الستاره قبل ما تركب الماسوره .

بخصوص الحديد على سور البلوكونه .. ركبه عالطوب الاحمر لو هتمحرها
لو هتعملها سيراميك استشير الحداد وبتاع السيراميك ( مش قادر افيدك فيها )

بخصوص الحديد على شبابيك المسقط او المنور .. أستشير فيها بردو الحداد وحددله انت هتغلف الشباك سيراميك ولا حلق خشب
لان في حدادين بيركبوا على حلوق الخشب وفي بيركبوها بكانات في الحيط

تركيب الشاشه عالحيطه بيكون بفيشر كأنك بتعلق ستائر او برواز .. يعني في الاخر خالص عادي مفهاش بهدله .

تركيب التكييف سواء الحامل الحديد بتاع الوحده الخارجيه او تركيب ومد خراطيم الوحده الداخليه
بيكون بهيلتي وتخريم وبهدله

بس البهدله دي اثارها بتقل وتدارى حسب الفني اللي بيركب .. لو فني نضيف مش هيبهدلك جامد

لو فني اي كلام .. ممكن يبوظلك الحيطه والدهان ويوقعلك كتل بالمحاره عالارض .


و الله يعينك عالصنايعيه .

فى نقطة مهمة وهى العزل المائى للحمامات والمطبخ -والعزل المائى والحرارى لو انت فى اخر دور على الاقل فى المساحة التى تغطى شقتك او بالاشتراك مع باقى جيرانك ويوجد الان خامات عند كيماويات البناء الحديث غير منفذة للماء على الاطلاق بديلا عن شغل العك بتاع زمان الخيش والبيتومين
الحلوق الخشب بالابواب والشبابيك تركب الاول قبل المحارة وتترك مغلقة حتى لا تتعوج
الالوميتال ممكن تركيبه بدون حلوق والسيراميك افضل لو تم وضعه للحلوق بدل الخشب
يفضل السيراميل يتم تركيبه قبل الوجه الاخير للدهانات حتى لا يتلوث بالدهان مهما حاول الصنايعى حمايته
لا تنسى وصله خزان مع السباكة احتياطيا فقد تحتاجها فى اى وقت
وصلات الكهرباء اعملها بزيادة فانت لا تعرف المستقبل ووصلات منفصلة للمكيفات وكذلك السباك يجب ان يقول بعمل مواسير خاصة بصرف المكيف مع الصرف الرئيسى(مهم جدا)
فى المطبخ مهم جدا ان تقوم بعمل 3 وصلات ماء و3 وصلات صرف للغسالة الاوتوماتيك وغسالة الاطباق والمجفف لوناوى تشترى يا برنس
وكذلك فى حوض المطبخ وصلة فلتر مياه واحدة من اعلى وواحدة من اسفل
اوعى تنسى وصلة مياه وصرف فى الحمام لو مساحته كبيرة لانك ربما تحب تنقل الغسالة فيه كمان
اعمل حسابك فى اى حاجة تخطر على بالك حتى لو مالهاش عوزة دلوقت لانك ممكن تغير رايك مستقبلا واللى بتعمله بجنيه فى التاسيس هتعمله ب 100 ج بعد التشطيب
دى خبرة تشطيب بيت كامل لم ينته بعد
تقبل تحياتى

هل ينفع اعمل سلوك للسماعات الكمبيوتر داخل الحائط
وازاى بوصلها لمكان الكمبيوتر عن طريق وصلة الصب ؟ ولا بيكون لها فيشه مخصوصه زى مثلا فيشة النت او الدش او التليفون ؟
وممكن اعمل مثلا فى كل اوضه كده ؟
واعلق السماعات ع الحيطة ولا بتكون السماعات مفحورها فى السقف ؟


متابع
وشكرا جزيلا

مواد العزل المائي بتتحط مع المونة بتاعة السيراميك؟
وكمان فى باقى محارة الشقه ؟
ودى نفس المواد اللى بتكون ضد الرطوبة ولا دى حاجه تانية ؟

جزاكم الله خيرا

اقتباس:

---

المشاركة الأصلية كتبت بواسطة wael6

مواد العزل المائي بتتحط مع المونة بتاعة السيراميك؟
وكمان فى باقى محارة الشقه ؟
ودى نفس المواد اللى بتكون ضد الرطوبة ولا دى حاجه تانية ؟

جزاكم الله خيرا

---

لا العزل المائى ده حاجة تانية خالص بتتعمل لوحدها طبقة كاملة قبل السيراميك غير منفذة للماء على الاطلاق علشان لو فيه اى ماية فى ارضية الحمام لا تسرب ابدا للدور الاسفل وبيتم اختبارها بوضع ماية فى المكان 3 ايام للتاكد من عدم التسريب
موضوع السماعات مش فاهمك بس لو هتعمل سقف معلق بيكون بعد المحارة وده حاجة شيك اوى نسيت اقولك عليها وكفاية تعملها فى الريسيبشن وافضل انواعها الجيبسون بورد وممكن تركب سماعات فيه بس يعنى شئ مش ظريف دى مش قاعة اجتماعات لكن طبعا سعادتك حر فى بيتك
تقبل مرورى

تكلفة العزل المائي اد ايه من فضلك ؟
وبتكون للحمام والمطبخ ولا لكل الشقه ؟

وهل من الافضل استعمال مواد مضاده للرطوبة فى المحاره ولالا ؟

انا كان اصدي مثلا لو عاوز اعلق سماعات الصب ع الحائط مثلا
فقولت بدل ما احط السلوك من بره الحيطه اعملها جوه وتتوصل بجاك فى الحيطة ؟


وجزاكم الله خيرا

العزل المائى للحمامات والمطبخ فقط او السطح و السعر لا اعلمة بدقة لكن يمكنط الاتصال بكيماويات البناء الحديث وسؤالهم عن كل التفاصيل
لا اعلم شئ بخصوص اضافة مادة للرطوبة مع المحارة صراحة
توصيل الاسلاك داخل الحيطة والسماعات كل ذلك امر سهل جدا بالاتفاق مع الكهربائى وبالمناسبة الموضة الجديدة مد مواسير الكهرباء من الارضيات
تقبل تحياتى

السلام عليكم
ممكن اعرف اسعار المصنعيات ايه ؟
1- شغل الحديد ؟
2- الكهربا
3- السباكة
4- المحارة
5- المصيص والجبس
6-السيراميك
7-النقاشة
يعنى بيتعاملوا بالمتر ولا بالمقاولة ولا ايه ؟


وايه رايكم فى ابواب الاوكرديون او الالوميتال الجرار
من ناحية العملية والاسعار ؟

http://www.nilemotors.net/Nile/162728-a.html