كيفيه حساب مصنعيه النقاشه؟

**punisher** · 13-04-2015 01:38 PM

دلوقتي انا شقتي 130 متر ده اللي مكتوب في العقد يعني الصافي اكيد اقل من كده

صاحبي جابلي نقاش ف طلب ف الشقه 6000 والأبواب والشبابيك 2000 علما ان جميع الخامات اللازمه انا اللي هشتريها

هوا لما حسب سأل الشقه كام متر وضرب ف تلاته وبعد كده قالي المتر من 15-20 حسب الشغل بس صاحبي قاله يعمل نفس الشغل او 20 جنيه بس نحاسبه علي 15 جنيه

هل سعره كده غالي؟

ليه بيضرب مساحه الشقه في تلاته؟

**yassin_samir** · 13-04-2015 02:23 PM

ممكن علشان الحيطه بتاعه ال٣ غرف دور علي نقاش تاني

**هيثم مجدي** · 13-04-2015 02:42 PM

هو بيضرب مساحة الشقة في تلاتة عشان يعرف مسطح الدهان. والافضل تحسب مسطح الدهان بنفسك لكل حائط. متعمدش على مساحة الشقة المكتوبة في العقد قيس عرض كل حائط في الشقة واضرب في الارتفاع.
طبعا حسب المنطقة اللي انت فيها بيتحدد سعر مصنعية المتر. لكن السعر اللي بتقوله حضرتك مبالغ فيه
جرب تجيب نقاش تاني.

**Forever.Leo** · 13-04-2015 02:47 PM

ال 130 متر دول متر مسطح للارضية .. النقاش بيتحاسب على مساحة الحوائط و السقف .. و هو ضرب في ثلاثة اخصارا للحساب .. باعتبار ان مساحة السقف = مساحة الارضية .. يضاف ليها مساحة الحوائط اللي هو قدرها بضعف مساحة ارضية الشقة .. انت ممكن تقيس المساحة بنفسك زيادة في الاطمئنان .. بالنسبة للشبابيك و الابواب بتبقى بالقطعة او المقاولة و ممكن برضه تفاصل معاه .. اهم حاجة ما تستخسرش في الخامات و تتأكد من سمعة الصنايعي اللي هتتعامل معاه .

**punisher** · 13-04-2015 03:05 PM

هوا طلب حاجات من نفط ل غراء ل سبيداج هبو واسمنت ابيض ومسامير صلب جبتهاله والبويا ناوي اجيبها من جوتن

الشقه في سموحه وهوا شغال دلوقتي ف شقه ف رشدي ومستواه من كلام صاحبي نضيف ف الشغل

انا فرحي ف اول اغسطس فطبعا لازم اخلص نقاشه بالكتير ع اول يونيو عشان لسه العفش متجبش

السؤال دلوقتي هل السعر كده مناسب ولا غالي اعتبارا ان شغله نضيف؟

**A.Saad** · 13-04-2015 11:12 PM

غالى طبعا لو بدون ديكورات
وياريت تقيس مساحة الحوائط وعدد الشبابيك والأبواب

**4fun14** · 14-04-2015 01:31 PM

لو التعامل كده يباه اتأكد ان مساحه شقتك الفعليه "الصافى"130
لان ممكن يكون مكتوب في العقد 130 والصافى الحقيقة ميحصلش 100
طبعا هتعمل فرق كبير في حساب المصنعية

**amr011111** · 14-04-2015 03:50 PM

هى لو شقه 130 متر وهتعمل فى الريسبشن حائطين ديكور وهتعمل فى الاوض كل اوضه حيطه واحده ديكور وهتدهن كرانيش الشقه كلها لو فيها شكل معين هتدهنا بذهبى او نحاسى او فضى والابواب هتتعمل كلها استر يبقى 7000 معقول
انما لو الابواب لاكيه يبقى 6000 معقول