الموضوع: رخصة القيادة اتسحبت

روحت انهارده مرور مدينة نصر عشان الرخصة المسحوبة .
الغرامة ١٠٠٠ جنيه :( و ١٠ جنيه عشان شهادة المخالفات دفعتهم و اتجهت على التجمع عشان اجدد و دفعت ٥٧ جنيه
انا مش معترض على اني ادفع المخالفة انا فعلاً الغلط من عندي بس مش عشان الرخصة خلصت من شهرين ادفع ١٠٠٠ جنيه
الناس بتعدي السرعة المقررة و مبتلبس حزام و بتتكلم في الموبايل و تعرض ارواح الناس للخطر و مبتدفعش المبلغ ده
الحمد لله

انا فعلاً مضايقني ان انتهاء رخصة القيادة ميضرش حد يعني مش معنى ان الرخصة انتهت معناها ان انا مبقتش صالح للقيادة و اساساً ملهاش اي تلاتين لازمة انا كنت عايش في كوبنهاجن و والدي معاه رخصة قيادة من هناك الرخصة من سنة ١٩٨٠ ولازالت سارية و مش بتتجدد غير لما يوصل لسن السبعين و ده عشان يشوفو اذا كان عنده لسه المقدرة انه يسوق
و برده مش مشكلة بس تكون العقوبة على قد المخالفة يعني يدفعني ١٠٠ او ٢٠٠ قرصة ودن مش ١٠٠٠
و انا فعلاً دايماً بقول لازم يكون في تغليظ للمخالفات عشان الناس تخاف تكسر القواعد بس الاولى انه يدفع ال ١٠٠٠ جنيه اللي بيكسر السرعة المقررة او الميكروباصات اللي بطلع دخنة او او او يعني في حالات كتير تستدعي الغرامة الغليظة بس مش رخص قيادة منتهية