السلام عليكم
الموقف ده حصل لي من فترة وحبيت أنقله لحضراتكم كنصيحة
كنت مسافر مع واحد صاحبي هو مكمل شغل 24 ساعة أما أنا كلها كام ساعة وراجع فروحت معاه في عربيته ورجعت مواصلات
وفي الطريق شاء ربنا إني أتعرض لحادث وأرى الوت رأى العين من بداية الموقف لأني بحب أتابع الطريق مع السواق
القصة بدأت إن العربية نزلة من على كوبري طبعا العربية مندفعة بسرعة عالية والسواق واخد الحارة الشمال وبعدين وصلنا عند مطب والعربيات كلها مهدية عليه وزحمة أصلا لغاية ما توصل للمطب ده لقيت السواق مهداش استغربت وقلت لنفسي هو ناوي يفرمل إمتى هليزقنا في الكراسي إللي قدمنا وفجأة لقيته سحب الهاند بريك "اللي أصلا مش شغالة خالص ولم تؤثر اطلاقا" عرفت إن مفيش فرامل وإننا هنعمل حادثة ففضلت مستني هنخبط في إيه؟ وهتقف العربية إزاي؟
السواق أخد أقصى الشمال نزل على التراب لكن طبعا عرض المكان لا يتسع للعربية بدأت العربية تتخبط من الجنبين في الحائط الخرساني من الجنب الشمال ومن الجنب اليمين في طابور العربيات وفجأة ارتفعت العربية عن الأرض ونزلت اصطدمت جامد جدا بوشاها في جنب عربية ملاكي وده إللي وقفها أخيرا
يا جماعة كل واحد يتأكد إن فرامل اليد عنده شغالة وبكفاءة علشان لا قدر الله في حالات الطوارئ لو في مشكلة ظهرت فجأة في دواسة الفرامل يكون في حل بديل حتى لو هيهدي فقط من سرعة العربية فده أكيد هيخفف من التصادم لأن الموقف صعب جدا إنه يتوصف........
سلمنا الله وإياكم